O Le Ekalesia a Iesu Keriso o le Au Paia o Aso e Gata Ai

E mafai ona e matamata i le vitio “Living Apostles Testify of Jesus Christ” e faalogo ai i molimau mamana e uiga i le Faaola ma Lana misiona a sui o le Korama a Aposetolo e Toasefululua. E faapefea ona fesoasoani molimau a aposetolo ma perofeta ma isi taitai o le Ekalesia ia te oe e iloa ai o le Ekalesia toefuataiina lenei a le Atua? Aisea e taua ai le taitaia o le Ekalesia a Iesu Keriso e aposetolo ma perofeta i aso nei? O le a se mea ua e faia po o le a foi se mea e mafai ona e faia e iloa ai mo oe lava ia ua valaauina o tatou taitai o le Ekalesia e le Atua ma o Lana Ekalesia toefuataiina lenei i le lalolagi i aso nei?

Na aoao mai Peresitene Dallin H. Oaks: “O le a la le uiga o le faaupuga ua na o Le Ekalesia a Iesu Keriso o le Au Paia o Aso e Gata Ai le Ekalesia moni? E tolu itu taua—(1) atoatoaga o aoaoga faavae, (2) mana o le perisitua, ma le (3) molimau ia Iesu Keriso—o loo faamatala mai ai le mafuaaga na tautino mai ai e le Atua, ma i le avea ai ma ni Ana auauna ua tausisia ua na o le pau lenei o le Ekalesia moni ma le ola i luga o lenei fogaeleele atoa.” Talanoaina nei vaega e tolu ma le mafuaaga ua avea ai i latou ma se vaega taua o le Ekalesia moni a le Atua. Faasoa ni aafiaga sa fesoasoani ia te oe ua e iloa ai o Le Ekalesia a Iesu Keriso o le Au Paia o Aso e Gata Ai o le Ekalesia moni lea ma le ola a le Faaola. Ia talanoa i le auala na faamanuiaina ai lou olaga ona o lou iloaina o lena mea.

Mataupu Faavae o le Faatuatua 1:6

O le Toefuataiga o le Atoatoaga o le Talalelei a Iesu Keriso: O le Folafolaga i le Lalolagi mo le Lua Selau Tausaga,” Potutusi o le Talalelei

“O Le Tuputupu A’e o le Ekalesia a Keriso,” mataupu 8 i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 (2018), 76–86

Faitau ma mafaufau loloto i le Ioane 15:16. O le a le uiga ia te oe o le filifilia o oe e le Atua e fesoasoani e faataunuu Lana galuega i Lana Ekalesia? Na faapefea ona e lagonaina le uunaia e fesoasoani ia te Ia i Lana galuega o le faaolataga ma le faaeaga? Na faapefea ona faamanuiaina oe a o e gauai atu i nei uunaiga? Tusi ou manatu i lau api talaaga, ma mafaufau pe i ai se mea sa e manao e fai e faatatau i le galuega a le Atua e te lei faia lava. Ona fai lea o se sini e fai.

Na faamanatu mai e Elder John C. Pingree Jr. ia i tatou o le galuega a le Atua e “le faapolopolo mo ni nai tagata faamanuiaina ae [e] mo i tatou uma—e tusa lava po o le a le itupa, tausaga, ituaiga, atunuu, tulaga o tupe maua, tulaga faaagafesootai, po o valaauga i le Ekalesia. E tofu i tatou taitoatasi ma se matafaioi taua e faatino i le faalauteleina o le galuega a le Atua (tagai Mose 1:39).” Sa ia faaauau: “O nisi o i tatou e fesiligia pe mafai e le Tama Faalelagi ona faaaoga i tatou e faia ni sao taua. Ae ia manatua, na Ia faaaogaina pea tagata masani e ausia ai mea ofoofogia (tagai 1 Korinito1:27–28; MF&F 35:13; 124:1).” E mafai ona e talanoa e uiga i nisi o mea tulaga ese ua e vaaia o faia e tagata masani o le Ekalesia e fesoasoani ai i le galuega a le Atua o le faaolataga ma le faaeaga. Atonu e mafai ona e faia se sini e faia faatasi se mea i lenei vaiaso e faalautele ai le galuega a le Atua. Ona mafai lea ona e talanoa e uiga i mea na e aoaoina mai le aafiaga po o ou lagona a o e auauna atu.

Mataio 5:13–16; Efeso 4:11–15; Mosaea 18:27–29; Moronae 6:4–9

Dallin H. Oaks, “O Le Manaomia o se Ekalesia,” Liahona, Nov. 2021, 24–26

“How the Church Is Organized” (vitio), Potutusi o le Talalelei

Na matauina e Elder Gerrit W. Gong: “[O le Alii] ua finagalo o Ia ia tatou faia Lana [Ekalesia] o se nofoaga o le agaalofa ma se avanoa, ia e mafai ona faapotopoto ai tagata taitasi, ma maua se avanoa mo tagata uma. I le avea ai o ni soo o Iesu Keriso, e tutusa tagata uma, e leai ni vaega e tulagalua. E talia tagata uma e auai i sauniga faamanatuga, o isi sauniga i le Aso Sa, ma gaoioiga faaagafesootai. Tatou te tapuai ma le migao i lo tatou Faaola, e mafaufau ma amanaia e le tasi le isi. Tatou te vaai ma aloaia tagata taitasi. Tatou te soisoi, nonofo faatasi ma ē e nonofo na o i latou, aoao ia iloa igoa, e aofia ai tagata faatoa liliu mai, o uso ma tuafafine ua toe foi mai, o tamaitai talavou ma alii talavou, o tamaiti pele taitasi o le Peraimeri. Manatu faapea o tatou i ai i o latou tulaga, tatou talileleia uo, tagata asiasi mai, tagata faatoa masii mai i o tatou eria, o tagata e pisi i le fetosoa’iina i le mau itu.” O a nisi o auala e mafai ona e aapa atu ai ma fesoasoani i isi ia iloa e taliaina i latou i a tatou sauniga ma auai i le Ekalesia a Iesu Keriso? O ai e mafai ona e aapa atu i ai? Mafaufau e fai se sini e fai se mea e faaali atu ai i isi e te popole ia i latou ma o loo latou auai i lau uarota po o le paranesi.

E finagalo Iesu Keriso ia o mai tagata uma ia te Ia ma Lana Ekalesia, ma e mafai ona tatou fesoasoani e ala i le faia o ni valaaulia faigofie ma faamaoni ia i latou o siomia i tatou. Na faasoa mai Elder Gary E. Stevenson: “E faitau selau valaaulia e mafai ona tatou tuuina atu i isi. E mafai ona tatou valaaulia isi e “o mai ma vaai” i se sauniga faamanatuga, se gaoioiga a le uarota, se vitiō i luga o le initoneti e faamatala ai le talalelei a Iesu Keriso. O le ‘O mai ma vaai’ e mafai ona avea o se valaaulia e faitau le Tusi a Mamona pe asiasi i se malumalu fou i le taimi o maimoaga a o lei faapaiaina. O nisi taimi o le valaaulia o se mea tatou te tuuina atu i totonu—o se valaaulia ia i tatou lava, e tuuina mai ai ia i tatou le mataalia ma le vaaiga mamao o avanoa o loo siomia ai i tatou, e faatino ai. I o tatou vaitau faatekinolosi, e masani ona faasoa atu e tagata o le ekalesia savali e ala i faasalalauga faaagafesootai. E faitau fia selau, pe fia afe, o mea faagaeetia loto e te manatu e mafai ona faasoa atu.” Talanoaina nisi o valaaulia e mafai ona e faia i lenei vaiaso, ona o mai faatasi lea ma toe lipoti mai ou aafiaga.

Fai atu i se tasi o le vaega e tusi se ata faigofie o se tino, ma talanoa pe faapefea ona taua vaega eseese uma (e pei o lima, vae, mata, ma taliga). Ona faitau faatasi lea o le 1 Korinito 12:12–18 ma talanoaina mea na e aoaoina. E mafai faapefea ona tatou faatatauina nei fuaiupu i lo tatou auai i le Ekalesia? Na aoao mai Peresitene Boyd K. Packer: “Tatou te manaomia tagata faatoa liliu mai ma i latou o e na tupuga mai i paionia anamua. E manaomia ona tatou sailia i latou o e na se ese ma fesoasoani ia i latou ia toe foi mai i le lafu. Tatou te manaomia le atamai ma le malamalama ma le malosi faaleagaga o tagata uma. O tagata taitoatasi o lenei Ekalesia o se elemene taua o le tino o le Ekalesia.” E mafai ona e tusia i lalo se mea e mafai ona e faia i lenei vaiaso e fesoasoani ai i se tasi i lau uarota po o le paranesi ia iloa lo latou taua. Ona mafai lea ona e toe lipoti mai le mea na e faia.

1 Korinito 12:12–27; Mose 1:39

D. Todd Christofferson, “O Le Aoaoga Faavae o le Auai,” Liahona, Nov. 2022, 53–56

D. Todd Christofferson, “E Manaomia i Se A le Ekalesia,” Liahona, Nov. 2015, 108–11

Autu ma Fesili, “Eseesega ma le Lotogatasi i Le Ekalesia a Iesu Keriso o le Au Paia o Aso e Gata Ai,” Potutusi o le Talalelei

“Loto Lotogatasi i le Eseesega” (faaputuga vitio)