O Le Manaomia o se Ekalesia
Ua a’oa’o manino mai e tusitusiga paia le tupu’aga ma le manaomia o se Ekalesia e taitaia e le pule ma i le pule a lo tatou Alii, o Iesu Keriso.
I le tele o tausaga ua mavae, sa amata ai e Elder Mark E. Petersen, o se uso o le Korama a Aposetolo e Toasefululua, se lauga i le faataitaiga faatusatusa lenei:
“O Keneti ma lona toalua, o Lusia, o ni tagata lelei, faamaoni ma amiosa’o. E lē ō i la’ua i le lotu, ma la te lagonaina ua lava lo la’ua lelei e aunoa ma le lotu. La te a’oa’oina le la fanau i le faamaoni ma le amiomama ma ta’u atu ia i latou o mea uma na e fai e le Ekalesia mo i latou.
“Ma o le isi tulaga, la te tausisi lava latou te manaomia a latou faai’uga o vaiaso mo tafaoga faaleaiga … [ma] o le ō i le lotu o le a faalavelave tele ia i latou.”1
O le asō, o la’u sāvali e faatatau i tagata lelei ma mafaufau faalelotu faapena ua lē toe ō pe auai i a latou ekalesia.2 A ou fai atu “lotu,” ou te tauaofa’i ai sunako, mosako, po o isi faalapotopotoga faalelotu. Ua matou popole ona o le auai i nei vaega uma ua matuā pa’ū maualalo lava, i malo uma.3 Afai tatou te taofia le faatauaina o a tatou lotu mo soo se mafuaaga, ua tatou faamata’uina lo tatou olaga patino faaleagaga, ma o se aofaiga iloga o tagata ua vavaeeseina i latou lava mai le Atua e faaitiitia ai Ana faamanuiaga i o tatou malo.
O le auai ma le toaaga i se lotu e fesoasoani lea ia i tatou ia avea ma ni tagata lelei atu ma ni tosinaga lelei atu i olaga o isi. I le lotu ua a’oa’oina ai i tatou i le auala e faaaoga ai mataupu faavae faalelotu. Tatou te a’oa’o mai le tasi ma le isi. O se faataitaiga faatauanau e sili atu ona mamana nai lo o se lauga. E faamalolosia i tatou e ala i fegalegalea’iga ma isi e tutusa mafaufau. O le ō i le lotu ma le auai i faatinoga, “e faasooina [ai] i le alofa”4, o tatou loto e pei ona fai mai ai le Tusi Paia.
I.
O tusitusiga paia na tuuina mai e le Atua i Tagata Kerisiano i le Tusi Paia ma i faaaliga o ona po nei, ua a’oa’o manino mai ai le manaomia o se ekalesia. Ua faaalia uma ai sa faatulaga e Iesu Keriso se ekalesia ma faamoemoe o le a faaauau pea e se ekalesia Lana galuega pe a mavae o Ia. Na Ia valaauina ia Aposetolo e Toasefululua ma tuu atu ia i latou le pule ma ki e taitai ai. O loo a’oa’o mai le Tusi Paia o Keriso “o le ulu ia o le ekalesia”5 ma o ona taitai sa tuuina mai “ina ia faaatoatoaina ai le au paia, latou te fai ai le galuega a auauna, ia atiina a’e ai le tino o Keriso.”6 Ua mautinoa lava le manino o le Tusi Paia i le tupu’aga o se ekalesia ma le manaomiaina i le taimi nei.
E fai mai nisi o le auai i sauniga faaleekalesia e le o fesoasoani ia i latou. E fai mai nisi, “Ou te le’i a’oa’oina se mea ananei” po o le “E leai ma se tasi na fiauo ia te a’u” po o le “Sa ou tiga [i se tala].” O ni lē fiafia faaletagata lava ia e lē tatau ai lava ona taofia i tatou mai le mataupu faavae a Keriso, o lē na a’oa’o mai i tatou ia auauna atu [i tagata], ae le o le auauna mai [o tagata].7 Faatasi ai ma lenei mea i le mafaufau, sa faamatala ai e se isi tagata le taulaiga o lona auai ai i le Ekalesia:
“I le tele o tausaga ua mavae, sa ou suia ai lo’u uiga faaalia e uiga i le alu i le lotu. Ua ou lē toe alu i le lotu mo a’u lava, ae ua ou mafaufau i isi. Ua fai ma au masani, lou faatalofa i tagata e nonofo na o i latou, ma faafeiloai tagata asiasi mai, … ua ou ofo atu lava a’u e faia se tofiga. …
“Pe a faapuupuu, ou te alu i le lotu i vaiaso taitasi, ma le faamoemoe ou te toaga, ou te lē faapalapala, ma ua ou faia se eseesega lelei i olaga o tagata.”8
Sa a’oa’o mai Peresitene Spencer W. Kimball e faapea “tatou te lē ō i sauniga o le Sapati ina ia faafiafiaina [i tatou] pe tau ina a’oa’oina. Tatou te ō e tapuai atu i le Alii. O se tiutetauave a le tagata lava ia. … Afai e faaletonu le sauniga ia te oe, o oe la e faaletonu. E leai se tasi e mafai ona tapuai mo oe; e tatau ona e faatalitali lava oe ia i le Alii.”9
O le auai i le lotu e mafai ona tatala ai o tatou loto ma faapaia ai o tatou agaga.
I totonu o se ekalesia tatou te lē auauna atu na o i tatou pe o so tatou lava ia filifiliga po o se mea ua talafeagai ai. E masani lava ona tatou auauna atu i totonu o se vaega. I sauniga tatou te maua ai avanoa e auina mai le lagi e tula’i a’e ai i luga atu o le tulagaese o lou matua. O sauniga e taitaiina e le Ekalesia e fesoasoani ia i tatou e faatoilalo le manatu faapito o le tagata lava ia lea e mafai ona faavaivaia lo tatou tuputupu a’e faaleagaga.
O loo i ai foi isi mea lelei ma taua e talanoaina, pe faapuupuu foi. I totonu o le ekalesia tatou te fegalegaleai ai ma tagata lelei o loo tauivi foi e auauna atu i le Atua. Ua faamanatu mai e lenei mea ia i tatou, e le o tuua na o i tatou i lo tatou tulaga toaaga i le lotu. Tatou te manaomia uma fegalegaleaiga ma isi, ma o fegalegaleaiga faalelotu o nisi ia o aafiaga aupito silisili e mafai ona tatou oo i ai, mo i tatou ma a tatou soa ma fanau. A aunoa ma na fegalegaleaiga, aemaise lava le va o fanau ma matua faatuatua, ua faaalia i sailiiliga le faateleina o le faigata mo matua ona tausi a’e fanau i lo latou faatuatuaga.10
II.
Ia o lea sa ou talanoa faalaua’itele e uiga i ekalesia. Ia ou te talanoa atu nei la i mafuaaga faapitoa mo le avea ma tagata auai, alu i le lotu, ma le auai i faatinoga i totonu O Le Ekalesia toefuataiina a Iesu Keriso o le Au Paia o Aso e Gata Ai.
Ioe, tatou te faamautu atu ua a’oa’o manino mai e tusitusiga paia, anamua ma aso nei, le tupu’aga ma le manaomia o se Ekalesia e taitaia e le pule ma i le pule a lo tatou Alii, o Iesu Keriso. Tatou te molimau atu foi ua toe faavaeina le Ekalesia toefuataiina a Iesu Keriso e a’oa’o ai le atoaga o Lana mataupu faavae ma ia faatautaia ai i Lana pule o le perisitua e faatino ai sauniga e tatau ai e ulufale atu ai i le malo o le Atua.11 O tagata o le Ekalesia latou te lafoa’ia le auai i le Lotu ae na o le faaleagaga o le tagata lava ia e faalagolago i ai, ua latou vavaeeseina i latou lava mai nei vaega autu o le talalelei: o le mana ma faamanuiaga o le perisitua, le atoaga o le a’oa’oga faavae toefuataiina, ma uunaiga ma avanoa e faaaoga ai lena a’oa’oga faavae. Latou te faalēaogaina lo latou avanoa e agavaa ai mo se olaga e faavavau ma o latou aiga.
O le isi tulaga lelei sili lava o le Ekalesia toefuataiina o le fesoasoani lea ia tatou tuputupu a’e faaleagaga. O le tuputupu a’e o lona uiga o le suia. I se faaupuga faaleagaga o lona uiga o le salamo ma le saili atu ia latalata atili i le Alii. I totonu o le Ekalesia toefuataiina ua tatou maua ai a’oa’oga faavae, faiga faavae, ma taitai musuia e fesoasoani ia i tatou ia salamo. O lo latou faamoemoega, e oo lava i fono a tagata o le ekalesia, e lē o se faasalaga, e pei o le taunuuga o se faamasinoga faasolitulafono. O fono o le tagata o le Ekalesia e saili atu ma le alofa e fesoasoani ia i tatou ia agavaa mo le alofa mutimutivale o le faamagaloga ua mafai ona o le Togiola a Iesu Keriso.
O le faaleagaga o le tagata lava ia e mafai ona maua ai sina uunaiga ma le faatulagaga mo auaunaga lē manatu faapito ia e tuuina atu e le Ekalesia toefuataiina. O ni faataitaiga maoae o lenei mea o alii ma tamaitai talavou ma tagata matutua latou te faataatia ese a latou gaoioiga faalea’oga po o le litaea ae talia ni valaauga faamisiona. Latou te galulue o ni faifeautalai i tagata ese i nofoaga e lē masani ai sa latou lē filifilia. E moni foi lena mea mo tagata faatuatua o le Ekalesia o ē auai i le faatinoga o auaunaga lē manatu faapito tatou te ta’ua o “galuega faalemalumalu.” E leai se mea o na mea e mafai e aunoa ma le Ekalesia o loo lagolagoina, faatulagaina, ma taitaiina.
O le faatuatua faalelotu o o tatou tagata ma auaunaga faale-Ekalesia ua a’oa’oina i latou i le auala e galulue ai i taumafaiga felagolagomai e manuia ai le nuu atoa. O lena ituaiga o aafiaga ma atina’ega e lē tupu mai amioga taatele i sosaiete i taimi nei lea e faaloloto ai le tagata ia i se auala e manuia ai na o ia lava. I le faatulagaga faafaafanua o o tatou uarota i le lotoifale, tatou te fegalegaleai ai ma galulue faatasi ma tagata atonu tatou te lē filifilia, o tagata e a’oa’oina i tatou ma tofotofoina i tatou.
E faaopoopo atu i le fesoasoani ia i tatou e a’oa’o ia tulaga auaumama faaleagaga e pei o le alofa, mutimuti alofa, faamagaloga, ma le onosai, tatou te maua ai avanoa e a’oa’o ai i le auala e galulue faatasi ai ma tagata e matua eseese lava talaaga ma mea e fiafia i ai. O lenei faiga lelei ua fesoasoani i le toatele o ō tatou tagata ma le tele o faalapotopotoga ua faamanuiaina i lo latou auai i le faatinoga. Ua lauiloa le Au Paia o Aso e Gata Ai i lo latou tomai e taitai ma autasi i ni taumafaiga felagolagomai. O lena tu masani na tupuga mai i o tatou paionia lototetele o ē na nofoia Atumauga i Sisifo ma faavae la tatou tu masani faatauaina o le felagolagomai lē manatu faapito mo le lelei autasi.
O le tele o taumafaiga o galuega alofa ma auaunaga alofa mama e manaomia ona faataunuuna e ala i le tuufaatasia o punaoa a le tagata lava ia ma galulue faatasi e auauna atu. E faia e le Ekalesia toefuataiina lenei mea faatasi ma ana taumafaiga tetele o galuega alofa i le lalolagi atoa. Ua aofia i nei mea sapalai faalea’oa’oga ma faafomai, fafagaina o ē fiaaai, tausiga o tagata sulufa’i, fesoasoani e toe faaleleia tagata mai aafiaga o vaisu, ma le anoano o isi mea. Ua lauiloa o tatou tagata o le Ekalesia i a latou polōketi o Lima Fesoasoani i faalavelave faalenatura. O le avea ma tagata o le Ekalesia ua mafai ai ona tatou avea ma se vaega o na taumafaiga i se fuataga tele. E totogi foi e tagata o le Ekalesia ia taulaga anapogi e fesoasoani ai i ē matitiva i o latou lava tulaga.
E faaopoopo atu i le lagonaina o le filemu ma le olioli e ala i le mafutaga a le Agaga, o loo olioli o tatou tagata o loo auai-i-le-Lotu i fua o le ola i le talalelei, e pei o faamanuiaga o le ola i le Upu o le Poto ma meatotino ma le uluuluola faaleagaga na folafola mai mo le ola ai i le tulafono o le sefuluai. O loo tatou maua foi le faamanuiaga o fautuaga mai taitai musuia.
O le palealii o nei mea uma o sauniga e faia i le pule o le perisitua e tatau ai mo le ola e faavavau, e aofia ai le faamanatuga tatou te maua i aso Sapati taitasi. O le sauniga taualuga i le Ekalesia toefuataiina o le feagaiga e faavavau o le faaipoipoga, lea e mafai ai ona faavavau mafutaga mamalu faaleaiga. Sa aoao mai e Peresitene Russell M. Nelson lenei mataupu faavae i se auala e lē mafaagaloina. Na ia saunoa mai: “Tatou te le na ona faamoemoe o tatou ala i le afioaga o le Atua. E ao ona tatou usiusitai i tulafono e autu [i ai lena faamanuiaga].”12
O se tasi o na tulafono o le tapuai atu lea i le lotu i aso Sapati taitasi.13 O lo tatou tapua’iga ma le faaaogaaga o mataupu faavae e faavavau e faalatalata atili atu ai i tatou i le Atua ma faalautele ai lo tatou tomai e alolofa atu ai. O Pale P. Palate, o se tasi o uluai Aposetolo o lenei tisipenisione, na faamatalaina le auala na ia lagonaina ina ua faamalamalama atu e le Perofeta o Iosefa Samita nei mataupu faavae: “Sa ou lagonaina e moni lava o le Atua o lo’u Tama faalelagi; o Iesu o lo’u uso, ma o le avā o lo’u fatafata sa o se soa tino ola pea, ma faavavau; o se agelu agalelei o auaunaga, ua tuuina mai ia te a’u o se faamafanafana, ma se palealii o le mamalu mo le faavavau, faavavau lava. I se faapuupuuga, ua mafai nei ona ou alofa ma le agaga faatasi ai foi ma le malamalama.”14
I le faaiuga, ou te faamanatu atu i tagata uma tatou te lē talitonu o le lelei ua na o se lotu e mafai ona ausia ai. E ese mai se lotu, ua tatou vaaia ai le faitau miliona o tagata o loo lagolagoina ma faatinoina galuega lelei lē mafaitauliaina. I le avea ai ma tagata taitoatasi, o loo auai le Au Paia o Aso e Gata Ai i le faatinoga o le tele o na galuega. Ua tatou vaaia le aoga o nei mea o se faaaliga o le upumoni e faavavau e faapea “o le Agaga na te tuuina mai le malamalama i tagata taitoatasi e sau i le lalolagi.”15
E ui i galuega lelei e mafai ona ausiaina e aunoa ma se ekalesia, ae o le atoaga o le a’oa’oga faavae ma ona sauniga faaola ma faaeaina e na o le Ekalesia toefuataiina e maua ai. Ma le isi, o le auai i le Lotu tatou te maua ai le malosiaga ma le faaleleiga o le faatuatua lea e sau mai le fegalegaleai ma isi tagata talitonu ma tapuai faatasi ma i latou o loo tauivi e tumau i luga o le ala o feagaiga ma ia avea ma ni soo lelei atu o Keriso. Ou te tatalo ia tatou tumau mausali i nei aafiaga faaleEkalesia a o tatou sailia le ola e faavavau, o le meaalofa silisili o meaalofa uma a le Atua, i le suafa o Iesu Keriso, amene.