Ia Manatua Lau Au Paia Mafatia, Lo Matou Atua e

O le fuafuaga a le Tama Faalelagi o le fiafia e aofia ai se aafiaga faaletino lea o le a tofotofoina ai Ana fanau uma ma feagai ma faigata.¹ I le lima tausaga talu ai, sa faailoa mai ai ua ou maua i le kanesa. Sa ou lagonaina ma o loo lagonaina pea tiga faaletino mai ta’otoga, o togafitiga e faaaoga ai ‘ave o le uila, ma aafiaga ona o fualaau. Na ou oo i faigata faalelagona i taimi faigata o le lē mafai ona moe. Na ta’u mai i faitauga faafomai atonu o le a vave ona ou oti nai lo le mea sa ou faamoemoeina, ma tuua ai mo se vaitau, se aiga o ē o mea uma ia ia te a’u.

Po o fea lava e te nofo ai, o mafatiaga faaletino pe falelagona mai tofotofoga eseese ma vaivaiga o le olaga nei sa avea, o loo avea pea nei, pe o le a i ai se aso e avea ai o se vaega o lou olaga.

O mafatiaga faaletino e mafai ona afua mai le tulaga matua faalenatura, o faama’i e le’i mafaufauina, ma faalavelave tutupu faafuasei; o le fia’ai po o le leai o se mea e nofo ai; po o le sauaina, amioga saua, ma taua.

O mafatiaga faalelagona e mafai ona tulai mai le popolevale po o le atuatuvae, o le faalataina e se toalua, matua, po o se taitai faatuatuaina; galuega po o suiga tautupe; o faamasinoina faapito’au e isi; o filifiliga o uo, fanau, po o isi tagata o le aiga; sauaina i ona ituaiga eseese; o miti ua le taulau o faaipoipoga po o fanau; o ma’i tuga po o le oti o ē pele; po o le tele na’ua o isi faapogai.

Pe mafai faapefea ona e onosaia mafatiaga tulagaese ma o nisi taimi e faataumaoi ia e oo mai ia i tatou taitoatasi?

O le mea e faafetai ai, o loo i ai le faamoemoe i le talalelei a Iesu Keriso, ma e mafai foi ona avea le faamoemoe ma se vaega o lou olaga. O le asō ou te faasoa atu ai ni mataupu faavae se fa o le faamoemoe o loo maua mai tusitusiga paia, a’oa’oga faaperofeta, o le tele o asiasiga faaleauaunaga, ma o’u lava tofotofoga faifai pea o lo’u ola maloloina. O nei mataupu faavae e le na ona faatatau i le lautele, ae e patino loloto foi.

Muamua, o le mafatia e lē faapea ua lē fiafia le Atua i lou olaga. Ua lua afe tausaga talu ai, sa vaaia ai e soo o Iesu se tagata tauaso i le malumalu ma sa fesili, “Rapi e, po o ai ea na agasala, po o ia nei, po o ona matua, ina ua fanau mai o ia o tauaso?”

Sa peisea’i na talitonu sese Ona soo, e faapei foi o le toatele o tagata i ona po nei, faapea o faigata uma ma mafatiaga o le olaga o le taunuuga lea o le agasala. Ae na tali atu le Faaola, “E le’i agasala lenei tagata, po o ona matua: ae peitai ina ia faaalia ai o galuega a le Atua ia te ia”²

O le galuega a le Atua o le aumaia o lo tatou tino ola pea ma le ola e faavavau.³ Ae e mafai faapefea e tofotofoga ma mafatiaga—aemaise o mafatiaga e matua’ia mai le faaaogaina ma le amioleaga e se isi tagata o le faitalia⁴—ona i’u ina faalautele ai le galuega a le Atua?

Sa ta’u atu e le Alii i Lona nuu o le feagaiga, “Ua Ou faamamāina oe … ; ua Ou filifilia oe mai i le ogaumu o puapuaga.”⁵ Po o le a lava le mafuaaga o ou mafatiaga, e mafai e lou Tama Faalelagi alofa ona faatonutonu na mea e faamamāina ai lou agaga.⁶ O agaga ua faamamāina e mafai ona tauave avega a isi ma le loto malamalama moni.⁷ O agaga ua faamamāina na o mai mai “puapuaga e tele” ua saunia e ola fiafia i le afioaga o le Atua e faavavau, ma “e soloieseina foi e le Atua o loimata uma nai o latou mata.”⁸

Lona lua, ua silafia lelei e le Tama Faalelagi ou mafatiaga. A o i ai i le lotolotoi o tofotofoga, e mafai ona tatou mafaufau sese faapea, e mamao ese le Atua ma e le o popole mai i o tatou tiga. E oo foi i le Perofeta o Iosefa Samita na faaalia lenei lagona i se taimi faigata o lona soifua. I le taimi na faafalepuipuiina ai i le Falepuipui o Liperate a o tutuliese le faitau afe o le Au Paia o Aso e Gata Ai mai o latou fale, sa saili atu Iosefa i se malamalama e ala i le tatalo: “Le Atua e, o fea oe? Ma o fea o i ai le faapaologa ua ufi ai lou afioaga lafi?” Sa ia faai’u i le aioiga lenei: “Ia manatua lau au paia mafatia, Lo matou Atua e”.⁹

O le tali a le Alii na faamautinoa ai ia Iosefa ma i latou uma o e mafatia:

“Lo’u atalii e, ia filemu lou agaga; o lou tiga ma ou puapuaga o le a na o sina minute laitiiti;

“Ma ona oo lea, afai e te talitalia lelei, o le a faaeaina oe e le Atua i luga.”¹⁰

Na faasoa mai ia te a’u e le toatele o Au Paia mafatia le ala na latou lagonaina ai le alofa o le Atua i le taimi o o latou tofotofoga. Ou te manatua lelei lo’u lava aafiaga i se tasi taimi o a’u tauiviga ma le kanesa, ina ua lē iloa e foma’i le mafuaaga o nisi o tiga ogaoga. Sa ma nofonofo ma lo’u toalua, ma le faamoemoe e fai se faamanuiaga masani o le ma ‘aiga o le aoauli. Ae, na pau le mea na mafai ona ou fai e na o le tagi, “Tama Faalelagi, faamolemole fesoasoani mai ia te a’u. Ua ou tigaina tele.” Mo le isi 20 i le 30 sekone na sosoo ai, sa ‘aui a’u i Lona alofa. E leai se mafuaaga na ta’u mai o lo’u ma’i, leai se faailoga o le taunuuga faai’u, ma e leai se mapusaga mai le tiga. Sa na o lo’u lagonaina o Lona alofa lē ponā, ma sa lava lena .

Ou te molimau atu e silafia e lo tatou Tama Faalelagi, o lē faitaulia le pa’ū o se manuiti, ou mafatiaga.¹¹

Lona tolu, ua ofoina mai e Iesu Keriso Lona mana gafatia e fesoasoani ai ia te oe ia e maua le malosiaga e onosaia lelei ai ou mafatiaga. O lea mana gafatia ua mafai ona maua e ala mai i Lana Togiola.¹² Ou te popole ona ua toatele na’ua tagata o le Ekalesia ua manatu afai e malolosi teisi atu, e mafai e i latou lava ia ona manumalo i soo se mafatiaga. O se ala faigata lenei e ola ai. O lou taimi lē tumau o le malosi, e le mafai lava ona faatusatusa i le sapalai lē i’u o le mana o le Faaola e faamalosia ai lou agaga.¹³

Ua a’oa’o mai e le Tusi a Mamona e faapea o le a “tauaveina [e Iesu Keriso] i ona luga” o tatou tiga, ma’i, ma vaivaiga ina ia mafai ai ona Ia fesoasoani mai ia i tatou.¹⁴ E mafai faapefea ona e utuvai mai le mana ua ofo mai e Iesu Keriso e fesoasoani ai ia te oe ma faamalosia oe i taimi o mafatiaga? O le ki o le noatia o oe lava ia i le Faaola e ala i le tausia o feagaiga na e osia ma Ia. Tatou te osia nei feagaiga a o tatou mauaina ia sauniga o le perisitua.¹⁵

Na ulu atu le nuu o Alema i le feagaiga o le papatisoga. Mulimuli ane na latou mafatia i le nofopologa ma sa faasa ona latou tapuai lautele pe tatalo leotetele foi. Ae sa latou tausisia a latou feagaiga i le mea sili sa latou mafaia e ala i le tagi lē leoa i o latou loto. O le taunuuga, na oo mai le mana faalelagi. “Sa faamalolosia i latou e le Atua ina ia faigofie ona latou tauave a latou avega.”¹⁶

I o tatou taimi ua valaau mai le Faaola, “Vaai mai ia te a’u i mafaufauga uma; aua le masalosalo, aua le fefe.”¹⁷ Pe a tatou tausia feagaiga o le faamanatuga ia manatua pea o Ia, ua Ia folafola mai o le a i ai pea Lona Agaga e faatasi ma i tatou. E aumaia e le Agaga ia i tatou le malosi e onosaia ai tofotofoga ma faia mea e le mafai ona tatou faia e i tatou lava. E mafai ona faamalolo i tatou e le Agaga, e ui ina sa a’oa’o mai Peresitene James E. Faust, “O se vaega o lenei faamalologa e ono tupu i se isi lalolagi.”¹⁸

Ua faamanuiaina foi i tatou i feagaiga ma sauniga o le malumalu, i le mea “ua faaalia ai le mana o le faale-atua.”¹⁹ Sa ou asiasi i se fafine ua maliu sana tama teine talavou i se faalavelave matautia ona sosoo ai lea ma le maliu o lana tane i le kanesa. Sa ou fesili pe mafai faapefea ona ia onosa’ia na maliu ma mafatiaga. Sa ia tali mai na maua mai le malosi mai faamautinoaga faaleagaga o se aiga e faavavau, na maua i taimi o tapuaiga masani i le malumalu. E pei ona folafola mai, o sauniga o le maota o le Alii, na faa’au’upegaina ai o ia i le mana o le Atua.²⁰

Lona fa, filifili e saili le olioli i aso taitasi. O i latou e mafatia e tele ina lagonaina faapea o le po e alu ai lava alu ai lava, ma o le a le oo mai lava le mālama. E lē afaina le tagi.²¹ Ae, afai e te maua ua e i ai i po pogisa o mafatiaga, o le filifilia o le faatuatua e mafai ai ona e alafa’i mai i taeao susulu o le olioli.²²

Mo se faataitaiga, sa ou asiasi i se tina talavou sa togafitia i le kanesa, sa manaia lona ‘ata’ata mai i lona nofoa e ui i le tiga ma ua leai ni lauulu. Sa ou feiloai i se ulugalii e le’i matutua tele, sa galulue fiafia o ni taitai o le autalavou e ui ina sa lē mafai ona la fanauina ni fanau. Sa ma saofafa’i ma se tamaitai pele—o se tinamatua talavou, tina, ma se āva—sa lē o toe mamao ona maliu lea, ae e ui i loimata o le aiga sa i ai taliega ma ni manatuaga fiafia.

O nei Au Paia mafatia o loo faataitai i mea na aoao mai e Peresitene Russell M. Nelson:

“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.

“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”²³

Ou te molimau atu²⁴ e manatua e lo tatou Tama Faalelagi Ana Au Paia mafatia, e alofa ia te outou, ma e silafia lelei outou. E silafia e lo tatou Faaola ou lagona. “E moni, ua na tauave o tatou tiga, na tauave foi o tatou faanoanoa.”²⁵ Ua ou iloa—i le avea ai o sē e mauaina i aso taitasi,²⁶—o le tausia o feagaiga e matala mai ai le mana o le taulaga togiola a Iesu Keriso e maua ai le malosi ma le olioli ia te outou o ē mafatia.

Mo i latou o ē mafatia, ou te tatalo, “Ia tuuina atu e le Atua ia te outou ia mamā a outou avega, e ala i le olioli o lona Alo.”²⁷ I le suafa o Iesu Keriso, amene.