Toe Faatuatuaina

I se taimi, a o o’u laitiiti sa ou mafaufau ai e sola ese mai le aiga. I ala faatamaitiiti, sa ou manatu e leai se isi sa alofa ia te a’u.

Sa faalogologo mai lo’u tina mataumea, ma faamautinoa mai ia te a’u. O la ou te saogalemu i le aiga.

Pe ua i ai ea se taimi na e lagona ai ua e solaese mai le aiga? E tele taimi, o le solaese mai le aiga o lona uiga ua leai se faatuatuaina pe ua motusia foi—le faatuatuaina o i tatou lava, ma le tasi ma le isi, ma le Atua. A oo ina lu’itauina le faatuatuaina, tatou te taumanatunatu pe faapefea ona toe faatuatuaina.

O la’u savali i le asō o le, pe o tatou o mai i le aiga pe o tatou o i le aiga, e afio mai le Atua e faafeiloai i tatou.¹ E mafai ona tatou maua ia te Ia le faatuatua ma le lototele, poto ma le iloatino, e toe faatuatuaina ai. E faapena foi, ua Ia poloa’i mai ia tuu i luga a tatou lamepa mo le tasi ma le isi, ia tele lo tatou faamagalo atu ae itiiti le faamasinosino o i tatou lava ma le tasi ma le isi, ia mafai ai ona avea Lana Ekalesia ma se nofoaga tatou te lagona ai lo tatou i ai i le aiga, pe o tatou o mai mo le taimi muamua, pe ua toe fo’i mai.

O le faatuatuaina o se faatinoga o le faatuatua. E tuu e le Atua ia i tatou le faatuatua. Ae, o le faatuatuaina o le tagata e mafai ona lē amana’iaina pe motusia foi pe a:

• I ai se uo, paaga faapisinisi, po o se tasi tatou te faatuatuaina ua le faamaoni, tiga, pe na ona faaaoga o i tatou.²

• Ua le faamaoni se soa faaipoipo.

• Atonu i se tulaga e lei mafaufauina, fetaiai ma le maliu o se tasi tatou te alolofa i ai, manu’a, po o se ma’i.

• Tatou te feagai ma se fesili e lei fuafuaina o le talalelei, atonu o se mea e faatatau i le talafaasolopito o le Ekalesia po o aiaiga faavae a le Ekalesia, ma ua fai mai se tasi ua nana e la tatou ekalesia pe e le’i ta’u maia foi le mea moni.

Atonu o isi tulaga e itiiti le patino ae e tutusa le popole i ai.

Atonu tatou te le vaai ia i tatou lava i le Ekalesia, e lē lagona se fetaui mo i tatou, lagona le faamasinoina e isi.

Pe, e ui ina tatou faia mea uma na faamoemoeina, ae e le’i maua lava le taunuuga moomia. E iu i o tatou lava aafiaga ma le Agaga Paia, atonu tatou te lei lagonaina lava ua tatou iloa o loo soifua le Atua pe e moni foi le talalelei.

E toatele i le taimi nei ua lagona se manaomia tele ia toefuatai atu le faatuatuaina i sootaga faaletagata soifua ma faapotopotoga faaona po nei.³

A tatou tomanatu i le faatuatuaina, tatou te iloa o le Atua o se Atua o le upumoni ma “e le pepelo ia.”⁴ Ua tatou iloa o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai.⁵ Ua tatou iloa o faaaliga ma musumusuga faifai pea, e fetaui lelei ma le upumoni i tulaga e lē masuia.

Ua tatou iloa o feagaiga ua malepelepe e momomo ai loto. “Sa ou faia ni mea faavalevalea,” o lana tala lea. “E mafai ea ona e faamagaloina au?” E mafai ona uulima le tane ma le ava, ma le faamoemoe e toe faatuatuaina. I se isi tulaga, ua tomanatu ai se tagata o i le falepuipui, “Pe ana ou tausia le Upu o le Poto, semanu ou te le i ai iinei.”

Ua tatou iloa le olioli i luga o le ala o feagaiga a le Alii ma valaauga e auauna atu i Lana Ekalesia, o se valaaulia lea ia lagonaina le faatuatuaga ma le alofa o le Atua mo i tatou ma le tasi ma le isi. O tagata o le Ekalesia, e aofia ai talavou nofofua matutua, o loo auauna atu e le aunoa i le salafa o le Ekalesia ma i o tatou nuu.

E ala i musumusuga, ua valaau ai e se au epikopo se ulugalii talavou e auauna atu i le vasega pepe a le uarota. I le taimi muamua, e nofo le tane i le tulimanu, e faaesea ma taumamao ese. Na faifai malie, ona ia amata ataata atu i tamaiti. Mulimuli ane, sa faaalia e le ulugalii le lotofaafetai. I le taimi muamua, sa la fai mai, sa manao le fafine i tamaiti, ae sa lei manao ai le tamaloa. O le taimi nei, o le auauna atu na suia ai ma tuufaatasia ai i latou. Na aumaia ai foi le olioli o tamaiti i la la’ua faaipoipoga ma le aiga.

I se isi aai, sa faateia ma lofituina se tina talavou e i ai se fanau laiti ma lona toalua, ae sa taliaina ina ua tofia o ia e avea ma peresitene o le Aualofa. E lei leva, ae motusia le eletise ona o le afā timu’aisa, ma sa gaogao ai fata o faleoloa ae malulu fale e pei o ni pusa ’aisa. Talu ai sa i ai le latou paoa ma le mafanafana, o lea sa tatala atu ai ma le agalelei e lenei aiga talavou lo latou fale i le tele o aiga ma tagata taitoatasi seia maea le afā.

E avea le faatuatuaina ma mea moni, pe a tatou faia mea faigata i le faatuatua. O le auauna atu ma le ositaulaga e faateleina ai le malosi ma faamomosi ai loto. O le faatuatuaina o le Atua ma le tasi ma le isi, e aumaia ai faamanuiaga o le lagi.

I le toe malosi mai ai i le kanesa, sa lavea se uso faamaoni i se taavale. Nai lo le manatu faanoanoa mo ia lava, sa ia fesili ma le lototatalo, “O le a se mea e mafai ona ou aoaoina mai i lenei mea?” I lona iunite mo ma’i tigaina, na ia lagona le uunaia o ia e matau se tausi soifua sa popole mo lona toalua ma le fanau. Ua maua e se tagata ma’i tigaina ni tali a o ia faatuatuaina le Atua ma aapa atu i isi.

A o faatalitali i fafo o le ofisa o lana peresitene o le siteki se uso o feagai ma popolega i ponokalafi, o loo tatalo se peresitene o le siteki ia iloa pe faapefea ona fesoasoani. Na oo mai se uunaiga manino: “Tatala le faitotoa ae aumai le uso i totonu.” Faatasi ai ma le faatuatua ma le faalagolago o le a fesoasoani le Atua, na tatala e le taitai perisitua le faitotoa ma opo mai le uso. Sa tofu lagona e i la’ua le alofa liliu ma le faatuatuaina o le Atua ma le tasi ma le isi. Ina ua faamalosia, ua mafai e le uso ona amata ona salamo ma suia

E ui ina patino o tatou tulaga faaletagata lava ia, e mafai ona fesoasoani mataupu faavae o le talalelei ma le Agaga Paia ia tatou iloa ai pe, ae pe faapefea foi, ma pe o le a foi le taimi e toe faatuatuaina ai isi. Pe a oo ina motusia le faatuatuaina pe faafitia, e tulai moni mai le le fiafia ma le faivavale o manatu; e faapena foi le manaomia o le iloatino e iloa ai pe a ua tatau ai le faatuatua ma le lototoa e toe faatuatuaina ai i sootaga faaletagata soifua.

Ae, faatasi ai ma le faaaloalo i le Atua ma faaaliga patino, ua faamautinoa mai ai e Peresitene Russell M. Nelson, “Tou te le tau mafaufau pe o ai e mafai ona faatuatuaina ma le saogalemu.”⁶ E mafai ona tatou faatuatuaina le Atua i taimi uma. E sili atu le silafia ma le alofa o le Alii ia i tatou nai lo tatou iloaina po o le alolofa ia i tatou lava. O lona alofa e lē i’u ma le silafia atoatoa o le tuana’i, taimi nei, ma le lumanai e faamautu ai ma faaauau Ana feagaiga ma folafolaga.

Ia faatuatuaina le mea ua ta’ua e le mau “i le aluga o taimi.”⁷ Faatasi ai ma faamanuiaga a le Atua, le aluga o taimi, ma le faatuatua ma le usitai faifaipea, e mafai ai ona tatou maua le tali ma le filemu.

Na faamafanafana mai le Alii:

“E afe ane le tagi i le afiafi, a o le alaga fiafia i le taeao.”⁸

“Lafo lau avega i le Alii ma faamoemoe ia te Ia.”⁹

“E leai se faanoanoaga i le lalolagi e lē mafai e le lagi ona faamaloloina.”¹⁰

Faalagolago i le Atua¹¹ ma Ana vavega. E mafai ona suia i tatou ma a tatou fegalegaleaiga. E ala i le Togiola a Keriso le Alii, e mafai ai ona tatou lafoai lo tatou tagata natura manatu faapito, ae avea ma atalii/afafine o le Atua, e agamalu, lotomaualalo,¹² e tumu i le faatuatua ma faatuatuaina talafeagai. Pe a tatou salamo, pe a tatou ta’uta’u ma lafoa’i a tatou agasala, ua fetalai mai le Alii Na Te le toe manatuaina lava.¹³ E le faapea Na Te faagalo; ae, i se ala ofoofogia, e peiseai Na Te filifili e le toe manatuaina, e faapena foi i tatou.

Ia faatuatuaina musumusuga a le Atua e iloatino ai ma le poto. E mafai ona tatou faamagalo atu i isi i le taimi sa’o ma ala e faapei ona fetalai le Alii e tatau ona tatou faia,¹⁴ a o “atamai e pei o le gata, ae filemu e pei o le lupe.”¹⁵

O nisi taimi pe a oo ina sili ona momomo ma salamo o tatou loto, ua sili foi ona tatou avanoa mo le faamafanafanaga ma le taitaiga a le Agaga Paia.¹⁶ O le ta’usalaga ma le faamagalo atu e taufai amata uma i le iloaina ua sese. E tele taimi e taulai atu ai le ta’usalaga i le tuanai. O le faamagalo atu e foliga tulimatai atu i le lumanai. “Aua e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.”¹⁷

Na fesili le Aposetolo o Paulo, “O ai se na te faateaeseina mai i tatou i le alofa o Keriso? Na ia tali, “E le o le oti, po o le ola, … po o le maualuga, po o le loloto, … e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.”¹⁸ Ae, o loo i ai se tasi e mafai ona faate’aeseina i tatou mai le Atua ma Iesu Keriso—ma o lena tagata o i tatou, i tatou lava. E pei ona fai mai Isaia, “O a outou agasala ua ’alo ai ona fofoga ia te outou.”¹⁹

O le alofa faalelagi ma le tulafono faalelagi, ua tatou nafa ai ma a tatou filifiliga ma o latou taunuuga. Ae o le Togiola a lo tatou Faaola e lē i’u ma e faavavau.²⁰ Pe a oo ina tatou saunia e foi mai i le aiga, tusa lava pe “o tatou mamao ese,”²¹ ua sauni le Atua ma le mutimuti alofa tele e talileleia i tatou, ma ofoina mai ma le fiafia tele mea silisili ua ia te Ia.²²

Na saunoa Peresitene J. Reuben Clark, “Ou te talitonu e finagalo lo tatou Tama Faalelagi e laveai tagata uma o ana fanau, … ma i lana faamasinotonu ma le alofa mutimutivale o le a ia aumaia ai ia i tatou le taui tupito mo a tatou faatinoga, aumaia ia i tatou mea uma e mafai ona ia aumai, ma i le isi itu, ou te talitonu o le a ia faatulaga i o tatou luga le faasalaga aupito maualalo e mafai ona ia tuu mai.”²³

I luga o le satauro, e oo lava i le aioiga mutimutivale a le Faaola i Lona Tama sa le o se mea faifua “Lo’u Tama e, ia e faamagalo atu ia te i latou, ae na faapea “Lo’u Tama e, ia e faamagalo atu ia te i latou; aua ua latou le iloa le mea ua latou faia.”²⁴ O lo tatou faitalia ma le saolotoga e i ai uiga aua tatou te tali atu i luma o le Atua ma i tatou lava mo o tatou faasinomaga, ma mea ua tatou iloa ma faia. E faafetai, ona e mafai ona tatou faatuatuaina le faamasinotonu atoatoa a le Atua ma le alofa mutimutivale atoatoa e faamasino atoatoa ai o tatou faamoemoega ma faatinoga.

Tatou te faaiu e pei ona sa tatou amata mai ai—faatasi ma le mutimuti alofa o le Atua a o tatou toe foi mai taitoatasi i le aiga ia te Ia ma i le tasi ma le isi.

Pe tou te manatua le faataoto a Iesu Keriso e uiga i se tagata sa i ai ni atalii se toalua?²⁵ Na tuua e le tasi le atalii le aiga ma faamaimau lona tofi. Ina ua oo ina iloa ia lava, sa saili e lea atalii e toe foi mai i le fale. O le isi atalii, i le lagona ai na ia tausia poloaiga “faauta, o tausaga ua tele,”²⁶ e lei manao e talileleia lona uso i le fale.

Uso e ma tuafafine, sei outou manatu lava faamolemole faapea o loo poloai mai Iesu ia tatala atu o tatou loto, lo tatou malamalama, mutimuti alofa, ma le lotomaualalo, ma vaai ai ia i tatou lava i matafaioi uma ia e lua.

E faapei o le atalii po o le afafine muamua, atonu tatou te feofeoa’i solo ona mulimuli ane lea saili e toe foi i le fale. E finagalo le Atua e talileleia i tatou.

Pei foi o le isi atalii po o le afafine, e aioi mālie mai le Atua ia i tatou e olioli faatasi a o tatou taitasi ma toe foi mai ia te Ia. Na te valaaulia i tatou e tatala a tatou faapotopotoga, korama, vasega, ma gaoioiga, e lē taumatea, e saogalemu—i le fale mo le tasi ma le isi. Ma le agalelei, malamalama, ma le faaaloalo moni, tatou te taufai sailia ma le lotomaualalo le Alii ma tatalo ma talileleia faamanuiaga o Lana talalelei toefuataiina mo tagata uma.

O malaga fai o o tatou olaga e patino, ae e mafai ona tatou toe foi i le Atua lo tatou Tama ma Lona Alo Pele e ala i le faatuatuaina o le Atua, o le tasi ma le isi, ma i tatou lava.²⁷ Ua fetalai mai Iesu, “Aua e te mata’u, tau lava ina e talitonu.”²⁸ E pei ona faia e le Perofeta o Iosefa, ia tatou faalagolago pea i le tausiga a lo tatou Tama Faalelagi.²⁹ Uso pele, tuafafine pele, uo pele, faamolemole toe tagai ane i le faatuatua ma le faatuatuaina—o se vavega ua Ia folafola mai ia te outou i le asō. I le suafa paia ma le mamalu o Iesu Keriso, amene.