Ala o faasalalauga

O le Ekalesia a Iesu Keriso o le Au Paia o Aso e Gata Ai e faaaogaina i taimi uma ala o faasalalauga eseese e faasoa atu ai le talalelei ma tulei ai i luma le galuega a le Alii. E aofia ai ala o faasalalauga e pei o leitio, televise, tifaga, le initoneti, ma aga fesootai o faasalalauga. I le 1974 na valoia ai e Peresitene Spencer W. Kimball faapea o le a fesoasoani tekinolosi e faasalalau ai le talalelei. “O loo naunau le Alii e tuu mai i o tatou lima ni meafaigaluega faaonapo nei tatou te le i vaai muamua lava i ai,” na ia saunoa ai. “Ua saunia nei e lo tatou Tama i le lagi mo i tatou ni olo malolosi---olo o leitio ma televise ma ni avanoa i talaatu o le malamalama---e fesoasoani e faataunuu ai afioga a le Alii e faapea ‘ e ao ona alu atu le leo mai lenei nofoaga i le lalolagi atoa’ [Mataupu Faavae ma Feagaiga 58:64].”

O le alualu i luma i tekinolosi ua aumaia ia i tatou avanoa e faasoa atu ai le talalelei ma oo atu ai i anotusi-fesootai o le talalelei i ala na lei mafai ona manatu i ai tupulaga na muamua atu. Mo se faataitaiga, ua faaaoga e le Ekalesia le initoneti ma ala o faasalalauga faalagafesootai e faalautele ai le galuega a le Alii i le salafa o le lalolagi. Ua saunia e le saite a le Ekalesia, o le ChurchofJesusChrist.org, mau, aoaoga o taitai, talafou, vitio, ma isi ala o faasalalauga mo i latou uma e fiafia i ai. E i ai faitotoa a taitai o le Ekalesia i ala o faasalalauga faaleagafesootai latou te faasoa atu ai savali faaleagaga ma fesootai ai ma tagata o le Ekalesia ma isi lotu.

Ua uunaia foi e taitai o le Ekalesia i tatou e faaaoga ala o faasalalauga faaleagafesootai e faasoa atu ai le talalelei i isi. Na saunoa mai Elder David A. Bednar, “O ala o faasalalauga o ni meafaigaluega faavaomalo e mafai ona aoga patino ma lelei i tagata e toatele taitoatasi ma aiga. Ou te talitonu foi ua oo mai le taimi mo i tatou o soo o Keriso e faaaoga ai ma le talafeagai ma le mataalia nei meafaigaluega musuia e … faataunuu le galuega a le Alii.”

Ao tatou faasoa atu le upumoni o le talalelei i ala o faasalalauga faaleagafesootai, e mafai ona tatou faamaoni ma saili e siitia isi. E mafai ona tatou tatalo ina ia “maua i latou o e o mai ma vaai, o mai ma fesoasoani, ma o mai ma nonofo” ona faasoa atu lea o lo tatou faatuatua “i auala talafeagai ma masani.” Na saunoa mai Elder Bednar, “Faasoa atu le talalelei ma le alofa moni ma le popole mo isi. Ia lototetele ma lotototoa, ae le o le faamaualuga, i le lagolagoina ma le puipuia o o tatou talitonuga, ma aloese mai finauga. I le avea ai ma soo, o lo tatou faamoemoega o le faaaoga lea o alaata o faasalalauga faaleagafesootai e avea o ni auala e faasusulu atu ai le malamalama ma le upumoni o le talalelei toefuataiina a Iesu Keriso i se lalolagi o loo faateteleina le pogisa ma le fenumia’i.”

E ui lava i faamanuiaga ma avanoa ua ofo mai e ala o faasalalauga ia i tatou, o loo i ai tulaga lamatia. E masani ona faaaoga ala o faasalalauga mo faamoemoega leaga, ma tatou te manaomia le aloese mai le matamata i ponokalafi, fatuina o ni finauga, faatusatusaina o i tatou lava i isi, ma maimau ai le taimi. Ina ia aloese mai na faamoemoega, e mafai ona tatou atiina ae ni tulafono mo le faaaogaina e o tatou aiga o tekonolosi ma ala o faasalalauga ma uunaia tagata uma o le aiga e mulimuli i ai. Na faamatala mai e Elder Gary E. Stevenson, “Faatasi ai ma le tele naua o faaaogaaga talafeagai ma musuia o tekinolosi, sei o tatou faaaogaina e aoao atu ai, musuia, ma siitia i tatou lava atoa ai ma le uunaia o isi ina ia avea ma o latou tagata sili ona lelei—nai lo le faaali atu o o tatou tagata faafoliga. Ia tatou aoao atu ma faataitai le faaaogaaga amiotonu o tekinolosi i le tupulaga faiae ma lapataia i tulaga lamatia e faatatau i ai ma le faaaogaina le lelei.”

E mafai e matua ona aoao i latou lava ma a latou fanau e uiga i le lamatia ma faamanuiaga o le faaaogaina o ala o faasalalauga faaleagafesootai , taaloga, ma polokalama feaveai. E mafai foi e matua ona iloilo soo le faaaogaaga e a latou fanau o ala o faasalalauga ma tekinolosi ma o ese i latou lava ma a latou fanau mai ala o faasalalauga pe afai ua sili atu ona lamatia ai nai lo le lelei.

“Talu ai ona o le ofoofogia o lona lautele, o ala o faasalalauga i aso nei o loo aumaia ai ni manatu se tele ma le maamaai,” na aoao mai ai Peresitene M. Russell Ballard. “O le itu faafeagai mai ona aafiaga faatafuna ma le faatosina, o loo tuuina mai ai foi i ala o faasalalauga ia mea e lelei ma aoga. O loo tuuina mai i televise ia alaata o talafaasolopito, o alaata o suesuega, o alaata o aoaoga. E mafai lava e se tasi ona mauaina ia tifaga ma ata malie o le TV ma tala ia e faafiafiaina ai ma faagaeetia ai ma o loo sa’o lelei ai le faaalia o taunuuga o le sao ma le sese. O le Initoneti e mafai ona avea ma se meafaigaluega aoga tele o faamatalaga ma fesootaiga, ma o loo tele foi se aofaiga o musika lelei i le lalolagi. O le luitau aupito sili o le filifili lea ma le poto pe o a mea tatou te faalogologo i ai ma pe o a foi mea tatou te matamata ai.