Perisitua Arona

O tofi o le Perisitua Arona o le tiakono, aoao, ositaulaga, ma le epikopo.

Tiakono. I le Ekalesia a Iesu Keriso, e mafai ona faauuina alii talavou i le tofi o le tiakono e amata atu i le aso 1 o Ianuari o le tausaga e atoa i ai lo latou ta’i 12. Faatasi ai ma le faatagaga a le taitai perisitua pulefaamalumalu (e masani lava o le epikopo po o le peresitene o le paranesi), e tufa ai e tiakono le faamanatuga. Latou te fesoasoani i le epikopo po o le peresitene o le paranesi e vaavaaia tagata o le Ekalesia e ala i le tuuina atu o auaunaga ma fesoasoani i mataupu faaletino e pei o le aoina mai o taulaga anapogi (i nofoaga talafeagai).

Aoao. E mafai ona faauuina alii talavou i le tofi o le aoao e amata atu i le aso 1 o Ianuari o le tausaga e atoa i ai lo latou ta’i 14. E mafai e nei alii talavou ona faatino tiute uma o tiakono. E i ai foi o latou tiutetauave faaopoopo e pei o le sauniaina o le falaoa ma le vai o le faamanatuga ma auauna atu o ni uso o auaunaga.

Ositaulaga. E mafai ona faauuina alii talavou i le tofi o le ositaulaga e amata atu i le aso 1 o Ianuari o le tausaga e atoa i ai lo latou ta’i 16. E mafai ona latou faatinoina tiute uma o tiakono ma aoao. Faatasi ai ma le faatagaga a le taitai perisitua pulefaamalumalu, e mafai foi ona latou faamanuia le faamanatuga, papatiso, faia papatisoga mo e ua maliliu i le malumalu, ma faauu isi i tofi o le ositaulaga, aoao, ma le tiakono.

Epikopo. O se epikopoo se alii ua faauuina ma vaetofia o se faitaulaga sili pulefaamalumalu mo se uarota, po o se faapotopotoga. Ua ia te Ia le tiutetauave mo le vaaia o mataupu faaletino ma faaleagaga o le faapotopotoga. E tausia ma le alofa e epikopo tagata o le uarota ma fesoasoani ia i latou e mulimuli ia Iesu Keriso. Latou te maua faaaliga mo le uarota. Latou te tuuina atu foi fesoasoaniga faaleuelefea mai tupe e foai atu i le Ekalesia e fesoasoani ai ia i latou o loo tauivi i mea tautupe po o isi auala. E le gata i lea, latou te vaaia faamaumauga ma mea tautupe a le uarota ma le tausiga ma le faaaogaina o o latou falelotu i le lotoifale.

O se korama o le perisitua o se vaega faatulagaina o alii po o alii talavou o e umia le perisitua. O uso o le korama e “auauna atu i isi, faataunuu tiute o le perisitua, fausia le lotogatasi, ma aoao ma ola i aoaoga faavae.” Ua faatulagaina korama mo le Perisitua Mekisateko ma le Perisitua Arona. O korama e tolu i le Perisitua Arona o korama a tiakono, korama a aoao, ma korama a ositaulaga.

O korama o le Perisitua Arona e taitaia e se peresitene e vaetofiaina, pe tuuina atu i ai le pule o le perisitua, e pulefaamalumalu ai. Mo korama a tiakono ma aoao, o le peresitene o se alii talavou i le korama; o le epikopo o le peresitene o le korama a ositaulaga. E tuuina atu i le peresitene ia ki e tatau ai o le perisitua—po o le aia tatau—e faataunuu ai tiutetauave o lena valaauga. I nofoaga e mafai ai, o korama o le Perisitua Arona e aofia ai fesoasoani (mo korama a tiakono ma aoao) ma fesoasoani (mo korama a ositaulaga) ua valaauina e lagolago le peresitene ma faatuina se au peresitene. E mafai foi ona aofia ai se failautusi a le korama pe a mafai.

• Epikopo

• Perisitua Mekisateko

• Perisitua

• Tusitusiga Paia

• Savali mai taitai o le Ekalesia

• Vitio

• Punaoa mo tamaiti

• Viiga ma pese a tamaiti