Taofiofia o le Fanauina Mai o Fanau

O fanau o se tasi o faamanuiaga silisili i le olaga, ma o lo latou fananau mai i ni aiga alofa ma faafaileleina, e totonugalemu i faamoemoega o le Atua mo tagata soifua. A malosi faaletino le tane ma le ava, ua ia i laua le avanoa ma le tiutetauave e aumai ai fanau i le lalolagi ma faafaileleina i latou. O le faaiuga pe toafia le fanau e i ai ma le taimi e tuu atu ai ia i latou o se mataupu patino mo se tane ma se ava.

E i ai se fuafuaga a le Atua mo le fiafia mo i latou uma o e ola i le lalolagi, ma o le fanau mai o fanau i totonu o aiga agaalofa e totonugalemu i Lana fuafuaga. O le poloaiga muamua na Ia tuuina atu ia Atamu ma Eva o le “ia fanafanau, ma uluuluola, ma ia tumu ai le lalolagi.” Ua tautino mai e tusitusiga paia, “O fanau o le tofi lea mai le Alii.” O i latou o e ua mafaia faaletino ua maua le faamanuiaga, olioli, ma le matafaioi e fanauina fanau ma tausia se aiga. E le tatau ona tolopoina lenei faamanuiaga mo mafuaaga manatu faapito.

O sootaga feusuai i totonu o le faaipoipoga e le gata e mo le faamoemoe o le foafoaina o fanau ae o se auala foi e faailoa atu ai le alofa ma faamalosia ai sootaga faalelagona ma faaleagaga i le va o le tane ma le ava.

Ua fautuaina le tane ma le ava ina ia tatalo ma fefautuaai faatasi a o la fuafuaina o la aiga. O faafitauli e mafaufau i ai e aofia ai le soifua maloloina faaletino ma faalemafaufau o le tina ma le tama ma lo laua gafatia e saunia ai mea autu e manaomia o le olaga mo a laua fanau.

O faaiuga e uiga i le puleaina o fanau mai ma taunuuga o na faaiuga e faalagolago atoa lava i ulugalii faaipoipo taitasi. Peitai, o le filifili ai e faapa’ū pepe e avea ai ma se metotia o le puleaina o fanau, e feteenai ma poloaiga a le Atua.