Tamaitai i le Ekalesia

O tamaitai o afafine faapelepele o le Atua; o lo latou faasinomaga paia a o fesoasoani Ana fanau agaga ia i latou e agai i luma ma le faamoemoe ma le faatuatua ia Iesu Keriso. I le avea ai ma soo o Keriso, e taua tamaitai i le fuafuaga o le fiafia a le Atua. Latou te fausia le malo o le Atua o ni ava, tina, afafine, tuafafine, uso o tina po o tuafafine o tama, ma uo. E ala i le faasoa atu ma le aoaoina atu o le talalelei, auai i aufono a uarota ma siteki, faia o galuega faalemalumalu ma talafaasolopito o aiga, tausia o i latou e le tagolima, ma auauna atu i isi, e fesoasoani tamaitai e faataunuu le galuega a le Atua.

“O se taimi mamalu le avea ai ma se tamaitai, o se tamaitai o le feagaiga, i le O Le Ekalesia a Iesu Keriso o le Au Paia o Aso e Gata Ai,” na tautino mai ai le Peresitene Aoao o le Aualofa o Camille  N. Johnson. “O le malamalama i la tatou matafaioi, faamoemoega, ma le tiutetauave i le fuafuaga o le fiafia e faaatoatoaina, faamautinoa, ma maua ai le olioli.”

O tamaitai uma i le Ekalesia o sui o le Aualofa. Na faavaeina i le 1842, o le Aualofa o le ki lea i le misiona a le Ekalesia o le fesoasoani i le Atua e faataunuu Lana galuega o le faaolataga ma le faaeaga, ma o lona faatulagaina sa musuia mai le lagi. Ina ua faatulagaina aloaia le Aualofa, sa lipotia mai sa saunoa le perofeta o Iosefa Samita: “O le a ou faatulagaina tamaitai i lalo o le perisitua e tusa ma le mamanu o le perisitua. … E lei atoatoa lava ona faatulagaina le Ekalesia seia oo ina faapea ona faatulagaina tamaitai.”

I le taimi nei, o le Aualofa o se tasi lea o faalapotopotoga aupito toatele o tamaitai i le +-lalolagi, faatasi ai ma le faitau miliona o ona sui auai. I le Aualofa, e taitai ma auauna atu tamaitai i valaauga ma tofiga i tulaga i le lalolagi atoa ma i lotoifale. E ala i a latou taumafaiga tuufaatasi, e aumaia ai e tamaitai le toomaga o Iesu Keriso i tagata i le salafa o le lalolagi i le faaletino ma le faaleagaga.

E taitai foi ma auauna atu tamaitai i faalapotopotoga a Tamaitai Talavou ma le Peraimeri a le Ekalesia. Latou te fesoasoani i le tupulaga faia’e ia avea ma soo o Iesu Keriso.

A o saofaga tamaitai i le Ekalesia, e mafai ona latou maua le malosi a o latou osia ma tausia feagaiga ma le Atua ma tapuai atu ia te Ia i le malumalu. Faatasi ai ma Lana fesoasoani, e mafai ona latou fesoasoani e aumaia le ola e faavavau o fanau a le Atua ma saunia le lalolagi mo le Afio Mai Faalua o Iesu Keriso.