Lotomaualalo

O le lotomaualalo o le iloa ma le agaga faafetai lou faalagolago atu i le Alii—o le malamalama lea o loo i ai ia i tatou le manaomia faifai pea o Lana fesoasoani. O le lotomaualalo o se faailoaga lea faapea o a tatou taleni ma tomai o meaalofa ia mai le Atua. E le o se faailoga o le vaivai, palaai, po o le fefe; o se faailoga o lo tatou iloa o le mea e taoto ai lo tatou malosiaga atoa. E mafai ona tatou lotomaualalo ma leai se fefe. E mafai ona tatou lotomaualalo ma lototoa foi.

O Iesu Keriso o lo tatou faataitaiga sili o le lotomaualalo. I Lana galuega talai i le lalolagi, na Ia faailoa e le aunoa o Lona malosi na maua ona o Lona faalagolago i Lona Tama. Na Ia fetalai: “Ou te le mafai ona faia o se mea e tasi na o au. … Ou te le sailia lo’u lava loto, ao le finagalo o le Tama, o le na auina mai au.”

O le a faamalolosia i tatou e le Alii ao tatou lotomaualalo i tatou lava i Ona luma. Na aoao mai Iakopo: “E tetee atu le Atua i e faamaualuluga, a e foai mai le alofa tunoa i e faamaulalo. … Ina faamaualalo ia outou i le silafaga a le Alii, ona faamaualugaina lea o outou e ia.”