Tausimea ma le Lagolagoina o le Siosiomaga

O lenei lalolagi matagofie o le foafoaga a le Atua. Ina ia faaalia le migao moni i le Foafoa, e tatau ona tatou talisapaia Ana foafoaga. O le lalolagi, o mea ola uma, ma le lautele o le atulaulau e molimau uma ma le manino ia te Ia. I le avea ai ma ni e faaaogaina lenei foafoaga paia, “e tatau ona tatou tausia le lalolagi, ia avea ma tausimea atamamai, ma faasaosaoina mo tupulaga i le lumanai.”

O le lalolagi ma foafoaga uma a le Atua o loo i ai o se vaega o Lana fuafuaga mo le togiolaina o Ana fanau ma e tatau ona faaaogaina “ma le fuafua tatau, ae le o le faatautala,” e lagolago ai le aiga o tagata. O la tatou tausiga o le lalolagi o “se vaega taua o lo tatou avea ai ma soo” ma o se tiutetauave paia. Tatou te tali atu i le Atua mo la tatou tausiga o le lalolagi ma i latou e le tagolima.

Mo nisi faamatalaga, tagai i le “Tausiga o le Lalolagi.”

E Popole le Atua e uiga i le Lalolagi

O tala o le Foafoaga ua faaalia ai e popole le Atua i mea uma ua Ia faia—o Ana fanau, o le lalolagi, ma mea ola uma o i ai. O le lalolagi ma le ola atoa o loo i ai na muai foafoaina faaleagaga, ma o le tele o ituaiga ola eseese na foafoaina e le Atua ua tuu mai ai i le lalolagi lona matagofie ma le eseesega.

O le lalolagi ma ona foafoaga e faavavau. O le a iu ina faapaiaina le lalolagi ma maua le mamalu faaselesitila. O le a avea ma aiga o e amiotonu, o e o le a olioli i le afioaga o le Atua.

O Le Matafaioi a le Lalolagi i le Ata o le Faaolataga

O le lalolagi o le nofoaga lea e maua ai e fanau a le Atua le olaga faitino, faaaoga le faitalia, aoao mai o latou aafiaga, faaleleia, ma alualu i luma. O le mea e sili ona taua, o le lalolagi o le nofoaga lea na maua ai e le Faaola se tino faitino ma faamaeaina ai le meaalofa lemafaatusalia o Lana Togiola e ala i le puapuagatia mo a tatou agasala, maliu i luga o le satauro, ma aumaia le Toetu.

E aoao foi i tatou e le lalolagi. Mo se faataitaiga, e mafai ona tatou aoao i tulafono, mataupu faavae, ma mamanu e faagaoioia ai. Tatou te aoao le faaaloalo ma le lotomaualalo pe a tatou matauina le natura ma ona malosiaga mamana. O le lalolagi ua mafai ai ona vaai i galuega a le Atua o loo molimau mai e uiga ia te Ia.

O i Tatou o Tausimea o le Lalolagi ma Ona Punaoa

Ua faia i tatou e le Atua e tali atu mo le tausiga ma le faasaosaoina o le lalolagi ma le faaaogaina ma le poto o ona punaoa. I le avea ai ma tausimea, e tatau ona tatou filiga i le faaaogaina ma le atamai o punaoa o le lalolagi, e faaaoga ai na o mea tatou te manaomia ma malamalama i aafiaga o a tatou faatinoga i le siosiomaga ma isi.

Tatou te tauivi e faia o tatou aiga, tuaoi, ma aai ia matagofie, ma iloa o le faia o lena mea e manaomia ai le iloiloina ma le faaeteete e faavae i tulaga i le lotoifale. Tatou te faasaosaoina punaoa ma puipuia mo tupulaga i le lumanai ia faamanuiaga faaleagaga ma faaletino o le natura.

E Mafai e le Lalolagi ma Ona Punaoa ona Tuuina Mai Mea mo Tagata Uma

Ua i ai i le lalolagi le tele o punaoa faalenatura o le a tuuina mai mea mo le aiga o tagata pe afai e faaaogaina e pei ona faatonuina ai e le Alii—e tausia ai e matitiva ma i latou e le tagolima ma ia le faaaogaina ia sili atu nai lo mea e manaomia, ia aloese mai le maimauina, ma aua nei ave faamalosia punaoa mai se isi tagata. O le atoatoaga o le lalolagi e tatau ona faaaogaina i le poto ma le fuafua tatau.

O Le Afio Mai Faalua o Iesu Keriso ma le Tausiga o le Lalolagi

E ui o le a faaatoatoaina le lalolagi pe a mavae le Afio Mai Faalua o le Alii, ae e manaomia pea ona tatou tausia lelei i le taimi nei. Ua tuuina mai e le Atua i le lalolagi ma mea lelei e oo mai ai o ni faamanuiaga ia i tatou. Latou te tuuina mai mea mo o tatou manaoga faaletino ae e aumaia ai foi ia i tatou le olioli. Ina ia manatu māmā pe faaaoga sese Ana foafoaga e faatiga ai i le Atua.

Auala e Faatino ai e le Ekalesia le Tausimea Atamai ma le Faasaosaoina

Ina ia aoao e uiga i faamaite faifai pea a le Ekalesia mo le lagolagoina o le siosiomaga i lona faagaoioia, taumafaiga agaalofa, ma iunivesite, tagai i le tusiga a le Church Newsroom “Caring for the Earth—News.”

E Faapefea Ona E Tausia le Lalolagi

Mo ni manatu i le auala e tausia patino ai le lalolagi ma i lou nuu, tagai i le “E Mafai Faapefea Ona Tatou Tausia Lelei le Lalolagi?”