Faitalia ma le Tali Atu Mo Oe Lava Ia

O le faitalia o le mafai lea ma se avanoa ua tuuina mai e le Atua ia i tatou e filifili ma faatino ai mo i tatou lava. O le faitalia e alagatatau i le fuafuaga o le faaolataga. A aunoa ma le faitalia, o le a le mafai ona tatou aoao pe alualu i luma pe mulimuli i le Faaola. O le faitalia, ua tatou “saoloto ai e filifili le saolotoga ma le ola faavavau , talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo.”

I le muai olaga, sa i ai la tatou faitalia e filifili le sao. O se tasi o faamoemoega o lo tatou olaga i le lalolagi o le vaai lea po o a filifiliga tatou te faia. Afai na faamalosia i tatou e filifili le mea sa’o, o le a le mafai ona faaali atu po o a mea o le a tatou filifilia mo i tatou lava. E le gata i lea, e sili atu lo tatou fiafia e fai ni mea, pe a faia a tatou lava filifiliga.

O le faitalia o se tasi lea o mataupu autu sa tulai mai i le muai olaga i le Fono na Faia i le Lagi. O se tasi lea o mafuaaga autu o le taua i le va o e na mulimuli ia Keriso ma e na mulimuli ia Satani.

Ua fetalai mai le Alii o tagata uma e nafa ma o latou lava mafuaaga, uiga faaalia, manaoga, ma faatinoga. E ui ina tatou saoloto e filifili le mea tatou te faia, ae tatou te le saoloto e filifili le taunuuga o mea tatou te faia. O taunuuga, pe lelei pe leaga, e mulimuli mai o ni taunuuga le ma’alofia ia o soo se filifiliga tatou te faia.