Fono i le Lagi

I le muai olaga, sa valaauina ai e le Tama Faalelagi se Fono Tele e tuuina atu ai Lana fuafuaga mo lo tatou alualu i luma e faavavau. Sa tatou iloa ai, afai tatou te mulimuli i Lana fuafuaga, o le a avea i tatou e pei o Ia. O le a tatou toetutu; o le a tatou maua le mana uma i le lagi ma le lalolagi; o le a avea i tatou ma ni matua faalelagi, ma maua ni fanau agaga e pei o Ia.

Sa tatou iloa ai, o le a Ia faia se lalolagi mo i tatou lea o le a tofotofoina ai i tatou. O le a pupuni o tatou mafaufau i se veli, ma o le a galo ai ia i tatou lo tatou aiga faalelagi. E tatau ona faia lena mea ina ia mafai ai ona tatou faatino lo tatou faitalia e filifili ai le lelei po o le leaga, e aunoa ma le faatosinaina o i tatou i lo tatou manatuaina o le taimi na tatou mau faatasi ai ma lo tatou Tama Faalelagi. O le a Ia fesoasoani mai ia i tatou ia tatou iloa le upu moni pe a tatou toe faalogo ai i le lalolagi.

Sa tatou iloa ai foi i le Fono Tele le faamoemoega mo lo tatou alualu i luma: ina ia maua le atoatoa o le olioli. E ui i lea, sa tatou iloaina ai foi, o nisi o le a faaseseina, filifilia isi ala, ma leiloa lo latou ala. Sa tatou iloa ai, o i tatou uma o le a i ai tofotofoga i o tatou olaga: o ma’i, lē fiafia, tiga, faanoanoa, ma le oti. Ae sa tatou malamalama o le a tuuina mai ia i tatou ia mea ina ia tatou maua ai le poto masani mo lo tatou lelei. Afai tatou te onosaia nei mea, o le a avea ia tofotofoga ma mea e faamamaina ai i tatou, a e le faatoilaloina ai i tatou.

Sa faailoa mai foi ia i tatou i lenei fono, ona o lo tatou vaivai, o le a tatou agasala uma ai, sei vagana ai tamaiti laiti. Sa tatou iloa ai, o le a saunia se Faaola mo i tatou ina ia mafai ona tatou manumalo ia tatou agasala, ma manumalo i le oti e ala i le toetu. Sa tatou iloa ai, afai tatou te faatuatua ia te Ia, usiusitai i Ana afioga ma mulimuli i Lana faataitaiga, o le a faaeaina i tatou ma avea e pei o lo tatou Tama Faalelagi. O le a tatou maua le atoatoa o le olioli.