Manaoga Faapitoa

Na faamalamalama mai e le Perofeta o Iosefa Samita e faapea “o mafaufau ma agaga uma na auina mai e le Atua i le lalolagi e mafai ona faateleina.” O fanau uma a le Atua ua i ai i luga o le fogaeleele ina ia tuuina mai i ai le avanoa e aoao ma ola ai i le talalelei a Iesu Keriso.

O tagata o le Ekalesia e i ai tulaga e ese ai po o manaoga faapitoa e aafia ai a latou gaoioiga po o fegalegaleaiga, e i ai foi avanoa anoa e auauna, aoao, tautua, ma taitai ai. E manaomia saofaga a tagata uma i le malo o le Alii. Ma o soo se tasi ua manao e osia feagaiga paia e mafai ona faia o lea, pe afai e agavaa o ia ma faaalia se tulaga talafeagai o lona tauaveina o le tiutetauave ma le tali atu mo ia lava.

E silafia ma alofa lo tatou Tama oi le Lagi i Ana fanau uma, ma o loo Ia silafia luitau o loo tatou feagai. O se manaoga faapitoa e le o se faasalaga—i le tagata po o matua. Na aoao mai Peresitene Russell M. Nelson: “E le manaomia se tino lelei atoatoa ina ia maua ai se faasinomaga paia o se tagata. O le mea moni, o nisi o agaga e sili ona lelei o loo i totonu o ni tino faatauagavale pe le atoatoa. O le tele o le malosi faaleagaga e masani ona atiina ae e tagata e i ai luitau faaletino, o le mea moni lava, ona e matuai luitauina i latou.”

E tatau ona tatou taulimaina tagata e i ai soo se ituaga o manaoga faapitoa ma le faaaloalo ma vaavaai mo auala e tautuaina ai i latou ma o latou aiga i le alofa faaKeriso—ma ia lagolago i latou a o latou auauna atu i isi.