“Vaetamaina,” Autu ma Fesili (2023)
Vaaiga Aoao
Vaetamaina
Ua aoaoina i tatou e tusitusiga paia, e alofa le Atua i fanau laiti. Na aoaoina e le Faaola Ona soo e faapea, “e faapea lo outou Tama o i le lagi, e le finagalo ia ina ia fano se tasi o i latou nei e faatauvaa.” E alofa le Tama Faalelagi i Ana fanau uma lava ma faaalia le alofa mutimutivale ia i latou taitoatasi e tusa lava po o a o latou tulaga. E “mauoa o Ia i le alofa mutimutivale” ma o le a Ia lagolagoina i latou i o latou tofotofoga, faafitauli, ma puapuaga. E tofu oo tamaiti taitoatasi i se tulaga uigaese pe a tuuina atu mo le vaetamaina. I le filifili ai e vaetama, ia manatua e alofa le Tama Faalelagi ia te oe ma lau tama, ma o le a Ia le tuulafoaia oe. E alofa o Ia i le tamaitiiti lenei ma e finagalo e fesoasoani ia te oe a o e faia fuafuaga mo le lumanai o le tamaitiiti lenei.
E mafai ona fatuina ni aiga alofa e faavavau e ala i le vaetamaina. Pe o mai fanau i se aiga e ala i le vaetamaina po o le fananau mai, o se faamanuiaga tutusa lava i latou. O fanau ua faamauina i le malumalu i o latou matua fai e mafai ona maua faamanuiaga uma o le avea ai ma se vaega o lo latou aiga e faavavau.
Afai e te lua finagalo ma lou toalua e vaetama se tamaitiiti, ia mautinoa ua oulua silafia uma lava tulaga e manaomia faaletulafono o atunuu ma sooupu faalemalo o loo aofia ai. Atonu e te manao e feutagai ma se sooupu mo vaetamaina po o se loia mo vaetamaina. Afai e te alala i le Iunaite Setete, e mafai e lou epikopo ona faasino atu oe i le Auaunaga mo Aiga o se punaoa mo feutanaiga.
Ua faamanatu mai e Peresitene Henry B. Eyring i matua uma o lo latou, “tofiga aupito sili ona mamana o loo i totonu o le aiga. E taua ia tofiga aua e i ai i le aiga le avanoa i le amataga o le olaga o se tamaitiiti e faamausali ai lana tu i le ala e toe foi atu ai.”
Ua ma mananao e vaetama, o fea la ma te amata atu ai?
E tele ituaiga faaosofiaga eseese e ala ai ona finagalo tagata e vaetama se tamaitiiti, ma o lena faaosofiaga e mafai ona faia se matafaioi sili ona taua i malosiaga i le aafiaga o le vaetamaina. Ae peitai, o se fautuaga e tasi e tumau lona sa’o e uiga i le faaosofiaga: o le vaetamaina e tatau ona faamanuia ai e le aunoa le olaga o le tamaitiiti. O lenei fautuaga e aofia ai le usitai a’ia’i i tulaga manaomia faaletulafono o le vaetamaina i lou atunuu ma le faigamalo faalelotoifale. O le vaetamaina i le va o atunuu e sili atu ona faatonutonuina nai lo o vaetamaina e faia i totonu o le atunuu lava ia. E fautuaina malosi le galulue e ala atu i tautua mo vaetamaina ua laisene, ma faatagaina (sooupu mo vaetamaina, loia mo vaetamaina, ma isi mea faapena). Faamolemole tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.8.1.
O le vaetamaina o se tamaitiiti o le a avea o se tasi o faaiuga aupito taua e te faia i lou olaga, ma atonu foi o le faaiuga aupito tele lea e tasi i le olaga o le tamaitiiti. Ia suesue i ai i o outou mafaufau, ona saili lea o se faamaoniga a le Agaga e ala i le anapogi ma le tatalo. Ma o outou loto atoa, filifili faatasi ma le Alii.
Ina ia saunia outou lava, saili atu i tali i le tele o fesili e siomia ai le vaetamaina, e pei o:
-
O le a faapefea ona aafia lo maua sootaga faalefaaipoipoga ona o le vaetamaina?
-
O le a le mea e manaomia ona tatou aoao e avea ai ma ni mātua vaetama faamanuiaina?
-
O a taui ma luitau e o mai faatasi ma le vaetamaina o se tamaitiiti?
O fea e mafai ona tatou aoao atili ai e uiga i le vaetamaina?
Faafesootai se tagata tomai faapitoa i vaetamaina (sooupu mo vaetamaina, loia mo vaetamaina, tagata ua laisene mo vaetamaina) e vaai ai po o a mea e manaomia e avea ai ma se mātua vaetama. Afai o i ai le Auaunaga mo Aiga i la outou eria, e mafai ona e faafesootaia i latou mo se tautua e faasino atu. I le Iunaite Setete, o loo i ai foi punaoa a le malo o loo maua.
O le vaetamaina e maualuga lava le faatonutonuina ma e eseese foi mea e manaomia. E tatau ona e malamalama i mea e manaomia mo lou eria ma ia tausisi i ai.
A ua e saunia loa faaleatamai ma faalelagona, ma ausia ia mea uma e manaomia e tatau ai e agavaa ai e vaetama se tamaitiiti, ona mafai loa lea ona e amatalia le faagasologa o le sailia o se tamaitiiti e vaetama.
E faapefea ona tatou sailia se tamaitiiti e vaetama?
O le sailia o se tamaitiiti e vaetama e mafai ona luitauina. O le tele lava o lou fitoitonu e uiga i le matua, itupa, ma le maloloina faalelagona ma faaletino o le tamaitiiti, o le tele foi lea o le luitauina o le a i ai le faagasologa. Ia fatufatua’i a o e sailia se tamaitiiti o sē e fetaui lelei ma lou aiga. Ia manatua e valaau atu i le Alii e fesoasoani ia te oulua i le lua sailiga o le tamaitiiti e finagalo o Ia lua te tausia ma faamauina ia te oulua. O punavai o faamatalaga atonu e aofia ai:
-
Tagata tomai faapitoa mo vaetamaina
-
Isi matua vaetama
-
O le initoneti
-
O le tou faletusi mo tagata lautele
O a mea tatou te faia pe a tatou maua se tamaitiiti e vaetama?
O le a e toe manaomia foi se fesoasoani a se tagata tomai faapitoa i le vaetamaina (sooupu mo vaetamaina, loia mo vaetamaina, tagata ua laisene mo vaetamaina) ia mautinoa ai ua e ausia tulaga manaomia e alagatatau i le faamae’aina o lau vaetamaina. O le a ia faamalamalama atu pepa o galuega ma laasaga faaletulafono e manaomia e faamae’a ai le vaetamaina.
A e ausiaina loa ia tulaga manaomia uma faaletulafono ma ua faamae’aina le vaetamaina e ala i le faamasinoga, ona mafai loa lea ona outou galulue ma le epikopo e fai fuafuaga mo le faamauina o le tamaitiiti ia te oulua.
“Ia faamanuia pea e lo tatou Tama Faalelagi nei agaga matagofie, nei uo faapitoa a le Matai.”