Fono o le Tagata o le Ekalesia

E alofa lo tatou Tama Faalelagi ia i tatou taitoatasi ma e finagalo ia tatou toe foi atu e nonofo faatasi ma Ia. Ona tatou te agasala uma lava, ua Ia tuuina mai ia i tatou le meaalofa o le salamo, lea “o le ki lea i le fiafia ma le filemu o le mafaufau. … Pe a tatou filifili e salamo, tatou te filifili e … tuputupu ae faaleagaga ma maua le olioli.”

O le tele o le salamo e tupu i le va o se tagata, se Atua alofa, ma i latou na aafia i agasala a se tagata. Ae peitai, afai e faia e se tagata o le Ekalesia se agasala matuia, atonu e manaomia e le epikopo po o le peresitene o le siteki ona fesoasoani ia te ia i le salamo.

I le avea ai o se vaega o lona salamo mo se agasala matuia, e ono aveesea ai mai se tagata o le ekalesia nisi o avanoa o le auai i le Ekalesia mo se taimi. O faaiuga e uiga i tagata auai ma avanoa mo le avea ai ma tagata o le ekalesia, e faia i nisi taimi i se fono o le avea ai ma tagata o le ekalesia. O faamoemoega o fono o tagata auai o le Ekalesia o le fesoasoani lea e puipuia isi, fesoasoani i se tagata ia maua le mana togiola o Iesu Keriso e ala i le salamo, ma puipuia le amiosao o le Ekalesia.

I se fono o tagata auai, e fuafua e le epikopo po o le peresitene o le siteki e ala i fautuaga ma se agaga o le alofa ma musumusuga mai le Alii pe tumau pea le tulaga lelei o le tagata pe tatau foi ona tapui pe aveesea le auai o se tagata i le Ekalesia.

O le tapui po o le soloia o se tagata mai le avea ma tagata o le Ekalesia e le o faamoemoe e faasala ai. Ae, o nei faatinoga e fesoasoani ai i se tagata ia salamo ma ia lagona ai se suiga o le loto. E avatu ai foi i se tagata le taimi e sauniuni ai faaleagaga e toefaafou ma toe tausi ana feagaiga. A salamo se tagata, e mafai ona faamalosia o ia ma maua le lagolagosua e ala i le auai i sauniga ma gaoioiga a le Ekalesia. Pe a salamo faamaoni se tagata, e mafai ona toefuatai uma ia te ia avanoa o le avea ai ma tagata o le Ekalesia.

Mo nisi faamatalaga e uiga i fono o le avea ai ma tagata o le Ekalesia, tagai i leTusitaulima Aoao: Auauna Atu i le Ekalesia a Iesu Keriso o le Au Paia o Aso e Gata Ai, mataupu 32, ChurchofJesusChrist.org.