Fiafia

E finagalo le Tama Faalelagi ia tatou maua le fiafia moni, tumau. O lo tatou fiafia o le mamanu lea o faamanuiaga uma ua Ia tuuina mai ia i tatou—aoaoga o le talalelei, poloaiga, sauniga, o le perisitua, sootaga faaleaiga, perofeta, malumalu, o le matagofie o foafoaga, e oo lava i le avanoa e oo ai i puapuaga. O Lana fuafuaga mo lo tatou faaolataga e masani ona ta’ua “o le fuafuaga sili o le fiafia.” Na Ia auina mai Lona Alo Pele e faatino le Togiola ina ia mafai ai ona tatou fiafia i lenei olaga ma maua se atoaga o le olioli i le faavavau.

I le molimau atu ai i “faamoemoega e faavavau” a le Atua, na aoao mai ai le perofeta o Liae, “Ua i ai tagata, ina ia latou maua le olioli.” E toatele tagata ua latou taumafai e saili le fiafia ma le faamalieina i gaoioiga e le tusa ai ma poloaiga a le Atua. O le le amanaiaina o le fuafuaga a le Atua mo i latou, ua latou teena ai le punavai o le fiafia moni. Ua latou gauai atu i le tiapolo, “o lē ‘saili ina ia malaia tagata uma e pei o ia lava.” E le pine ae latou iloa le moni o le lapataiga a Alema i lona atalii o Korianetona: “E lei avea lava le amioleaga ma fiafia.”

O isi e saili tau lava o le fiafia i le olaga. Faatasi ai ma lenei mea o la latou sini autu, latou te faatagaina ai le fiafia le tumau e faalavelave ia i latou mai le fiafia tumau. Latou te gaoia i latou lava mai olioli tumau o le tuputupu a’e faaleagaga, auaunaga, ma le galue malosi.

A o tatou saili ia fiafia, ia manatua ua na o le pau lava le ala i le fiafia moni o le ola i le talalelei. O le a tatou maua le fiafia faavavau filemu a o tatou taumafai e tausi poloaiga, tatalo mo le malosi, salamo i a tatou agasala, auai i gaoioiga lelei, ma tuuina atu auaunaga aoga.