Malamalama o Keriso

O le Malamalama o Keriso, o le malosiaga faalelagi, mana, po o le uunaiga e mai le Atua e ala ia Keriso ma e tuuina mai le ola ma le malamalama i mea uma. O le Malamalama o Keriso e faatosina ai tagata ia faia mea lelei ma saunia i latou ia maua le Agaga Paia. O se tasi o faailoaga mai o le Malamalama o Keriso, o le mea ua tatou ta’ua o le lotofuatiaifo.

O le Malamalama o Keriso “ua susulu atu mai luma o le Atua e faatumulia ai le loaloa o le vateatea.” O “le malamalama lea o loo i mea uma, e faaola i mea uma, o le tulafono lea e pulea mea uma.” O lenei mana o se tosinaga mo le lelei i olaga o tagata uma. I tusitusiga paia, o le Malamalama o Keriso e ta’ua i nisi taimi o le Agaga o le Alii, o le Agaga o le Atua, o le Agaga o Keriso, po o le Malamalama o le Ola.

E le tatau ona fenumiaia le Malamalama o Keriso ma le Agaga Paia. E le o se peresona, e pei ona i ai le Agaga Paia. O lana tosinaga e taitaiina atu ai tagata ina ia latou maua le talalelei moni, papatisoina, ma maua le meaalofa o le Agaga Paia.

O le lotofuatiaifo o se faailoaga o le Malamalama o Keriso, ua mafai ai e i tatou ona faamasino le lelei mai le leaga. Ua aoao mai le perofeta o Mamona: “Ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua. … Ma o lenei, ou uso e, ina ua vaai ua outou iloa le malamalama tou te faamasino ai, o le malamalama lea o Keriso, vaai ia outou le faamasino sese; aua o le faamasinoga lava lea tou te faamasino atu ai o le a faamasinoina ai foi outou.”