Agaga Paia

O le Agaga Paia o le sui lona tolu o le Aiga Atua. O Ia o se peresona o agaga, e leai se tino o aano ma ivi. E masani ona ta’ua o ia o le Agaga, o le Agaga Paia, o le Agaga o le Atua, o le Agaga o le Alii, po o le Fesoasoani.

Matafaioi a le Agaga Paia

O le Agaga Paia e galulue i le lotogatasi atoatoa ma le Tama Faalelagi ma Iesu Keriso, i le faataunuuina o matafaioi e tele e fesoasoani ai ia tatou ola amiotonu ma maua faamanuiaga o le talalelei.

O Ia “e molimau i le Tamā ma le Alo” ma faaali ma aoao mai “le moni o mea uma lava.” E mafai ona tatou maua se molimau mautinoa i le Tama Faalelagi ma Iesu Keriso e ala i le mana o le Agaga Paia. O lana fesootaiga i o tatou agaga e avatu ai se faamautinoaga e sili ona mautinoa nai lo soo se fesootaiga e mafai ona e maua e ala i ou sane faanatura.

A o tatou tauivi e tumau i luga o le ala e tau atu i le ola e faavavau, e mafai ona taialaina i tatou e le Agaga Paia i a tatou faaiuga ma puipui i tatou mai mea matautia faaletino ma faaleagaga.

E tauala mai ia te Ia, e mafai ai ona tatou maua meaalofa a le Agaga mo lo tatou manuia ma mo le manuia o i latou tatou te alolofa ma auauna i ai . O Ia o Lē Faamafanafana. E pei ona mafai ona faanā e le leo faaoleole o se matua alofa se tamaitiiti e tagi, e mafai foi e musumusuga a le Agaga ona faatoafilemu o tatou atuatuvalega, faafilemu o tatou popolega vinavina o lo tatou olaga, ma faamafanafana i tatou pe a tatou faavauvau. E mafai e le Agaga Paia ona faatumuina i tatou “i le faamoemoe ma le alofa atoatoa” ma “aoao [i tatou] i mea filemu o le malo.”

E ala mai i Lona mana, e faapaiaina ai i tatou pe a tatou salamo, maua sauniga o le papatisoga ma le faamauga, ma tumau faamaoni i a tatou feagaiga.

O Ia o le Agaga Paia o Folafolaga. I lenei matafaioi, ua Ia faamautu mai o sauniga o le perisitua ua tatou mauaina ma feagaiga ua tatou osia ua taliaina e le Atua. O lenei faamaoniga e faalagolago lea i lo tatou faamaoni faifai pea.

O Le Meaalofa o le Agaga Paia

E mafai e tagata uma e sailia faamaoni le upumoni ona lagona le uunaiga a le Agaga Paia, e taitai atu ai i latou ia Iesu Keriso ma Lana talalelei. Ae peitai, o le atoatoa o faamanuiaga e tuuina mai e ala i le Agaga Paia e avanoa mo nao i latou o e maua le meaalofa o le Agaga Paia ma tumau faamaoni.

A uma ona papatisoina se tagata i Le Ekalesia a Iesu o le Au Paia o Aso e Gata Ai, e tuu e se toatasi pe sili atu o e umia le Perisitua Mekisateko o latou lima i luga o le ulu o le tagata, ma faamauina o ia o se tagata auai o le Ekalesia. I le avea ai o se vaega o lenei sauniga, ua ta’ua o le faamauga, e tuuina atu ai i le tagata le meaalofa o le Agaga Paia.

O le meaalofa o le Agaga Paia e ese mai le uunaiga a le Agaga Paia. A o lei faia le papatisoga, e mafai ona lagona e se tagata le uunaiga a le Agaga Paia mai lea taimi i lea taimi ma e ala mai i lena uunaiga e mafai ai ona maua se molimau o le upumoni. A uma ona maua le meaalofa o le Agaga Paia, ua i ai i le tagata le aia tatau i mafuta lena sui o le AigaAtua pe afai na te tausia poloaiga.