Aigaatua

Fai mai le mataupu faavae o le faatuatua muamua a le Ekalesia, “Matou te talitonu i le Atua, le Tamā Faavavau, ma Lona Alo, o Iesu Keriso, ma le Agaga Paia.” O nei tagata e toatolu ua faia ai le Aigaatua. Latou te pulefaamalumalu i le lalolagi lenei ma isi foafoaga uma a lo tatou Tama o i le Lagi.

E manatu le Au Paia o Aso e Gata Ai i sui o le Aigaatua i se agaga lea e ogatasi ai i nisi o itu ma manatu o isi o le lalolagi Kerisiano, peitai e i ai ni eseesega tele. E tatalo le Au Paia o Aso e Gata Ai i le Atua le Tama i le suafa o Iesu Keriso. Latou te faailoa le Tama o le faamoemoega tupito lea o la latou tapuaiga, o le Alo o le Alii ma le Togiola, ma le Agaga Paia o le avefeau ma lē e faaalia mai [le finagalo] o le Tama ma le Alo. Ae o le mea e ese ai le Au Paia o Aso e Gata Ai mai isi tapuaiga faaKerisiano o lo latou talitonuga o le Atua ma Iesu Keriso o ni tagata faamamaluina ma faaletino, ma o sui taitoatasi o le Aigaatua o ni tagata mavaevae.

O le aoaoga faavae moni o le Aigaatua na leiloa i le liliuese lea na sosoo ma le auaunaga i le olaga nei a le Faaola ma le maliliu o Ona Au Aposetolo. Na amata ona toefuatai mai lenei aoaoga faavae ina ua maua e Iosefa Samita e 14 tausaga lana Uluai Faaaliga. Mai le tala a le Perofeta e uiga i le Uluai Faaaliga ma mai isi ana aoaoga, ua tatou iloa ai o sui o le Aigaatua o ni tagata mavaevae e toatolu. E i ai i le Tama ma le Alo ni tino o aano ma ivi, a o le Agaga Paia o se peresona o agaga.

E ui lava o sui o le Aigaatua o ni tagata mavaevae, ma e mavaevae foi a latou matafaioi, ae e tasi i latou i le faamoemoe ma le aoaoga faavae. E atoatoa a’ia’i lo latou lotogatasi i le faataunuuina o le fuafuaga o le faaolataga paia a le Tama Faalelagi.