Tausiga o i Latou e Manaomia le Fesoasoani

Afai e te manao e fesoasoani ia i latou o loo manaomia le fesoasoani ae e te le o mautinoa pe faapefea, e mafai ona fesoasoani le savali a Elder David A. Bednar “I le Ala o Lo Latou Tiute”. Na aoao mai Elder Bednar: “Uso e ma tuafafine faautauta … vaavaai ma nonofo i autafa o tagata o loo tuua na o i latou i sauniga a le Ekalesia ma isi nofoaga eseese. Latou te tauivi pea e ‘faamafanafana i latou o loo manaomia le faamafanafanaga,’ [Mosaea 18:9], e aunoa ma le faamoemoe mo ni faamamaluga po o ni viiga. E mafai ona e toe iloiloina lana savali ma vaavaai mo ni auala laiti ma faigofie e auauna atu ai i se tasi e manaomia le fesoasoani. Tusi i lalo ou manatu, ma faatino uunaiga e te maua.

Na fautua mai le Perofeta o Iosefa Samita, “O se tagata e faatumulia i le alofa o le Atua, e le faamalieina i le faamanuiaina na o lona lava aiga, a e ia faasalalau atu i le lalolagi atoa, e naunautai e faamanuia tagata uma lava.” Aisea e te manatu ai o le a manao se tagata ua faatumulia i le alofa o le Atua e faamanuia tagata uma? O a ni auala e mafai ona e faasoa atu ai le alofa o le Atua i isi? E mafai faapefea e au faatinoga o le alofa ma le agalelei ona fesoasoani e suia ai foi oe?

Faitau faatasi le Luka 10:25–37 . E mafai foi ona e matamata i le vitio “Faataoto o le Samaria Agalelei” (4:55). Afai o loo e aoao faatasi ma tamaiti, atonu latou te fiafia e faatino le faataoto. Ona mafai lea ona e talanoa e uiga i le auala na usitai ai le Samaria i le poloaiga ia alofa i lona tuaoi. E mafai foi ona e talanoaina gaoioiga a le ositaulaga ma le sa Levī. O a nisi o mafuaaga tatou te le auauna atu ai i nisi taimi ia i latou e manaomia le fesoasoani? E mafai faapefea ona tatou faatoilalo na papupuni? E mafai ona outou faasoa atu i le tasi ma le isi nisi o aafiaga ina ua outou auauna atu i se tasi sa manaomia le fesoasoani—po o le taimi na auauna atu ai se tasi ia te outou—ma o a ni ou lagona. E mafai e outou taitoatasi ona faatulaga se sini e auauna atu ai i se tasi i aso uma mo se vaiaso ona lipoti mai lea o ou aafiaga.

Faitau le Mosaea 2:17, ma talanoa e uiga i le auala o loo e auauna atu ai i le Atua pe a e auauna atu i isi. Ona mafai lea ona e matamata i le vitio “Day of Service” (5:08). Na faapefea ona faamanuiaina tagata o loo i le vitio a o latou auauna atu? Na faapefea ona faamanuiaina le nuu? Mafaufau pe faapefea ona outou auai o se vaega i se aso o auaunaga. E mafai ona e suesueina le JustServe.org mo ni manatu.

Teuteronome 15:11; Isaia 1:17; Mataio 20:26–27; 22:36–40; Iakopo 2:17–19

Russell M. Nelson, “O Poloaiga Sili Lona Lua,” Liahona, Nov. 2019, 96–100

Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, mataupu 21–22, Potutusi o le Talalelei

I le konafesi aoao ia Aperila 2010, na aoao mai ai Peresitene Dieter F. Uchtdorf, “A o tatou faataitai i le faataitaiga atoatoa a [Iesu Keriso], e mafai ona avea o tatou lima ma Ona aao; o o tatou mata, o Ona mata; o o tatou loto, o Lona loto.” O le a le uiga mo ou lima, mata, ma le loto o lima, mata, ma le loto o le Faaola? E faapefea e lenei auala o le mafaufau ona aafia ai le auala e te auauna atu ai i isi? Faitau le 1 Ioane 3:17–19, ma mafaufau loloto i mea o loo aoao mai ai e uiga i le tausia o i latou o loo manaomia le fesoasoani. E faapefea ona musuia oe e nei fuaiupu e mulimuli i le faataitaiga a Iesu Keriso a o e auauna atu ia i latou o loo siomia oe? E mafai ona e mafaufau i se tasi e manaomia se fesoasoani po o se faamalosiauga ma faia se gaoioiga e le mailoa o le auaunaga mo lena tagata. Pe e mafai foi ona e auauna atu i se tasi e ala i le faalogo i ona popolega po o le avea ma se uo moni. Ona mafai lea ona e tusi faamaumau ou manatu e uiga i le aafiaga.

E mafai ona e faitau pe usuina upu o se viiga e uiga i le fesoasoani atu ia i latou o loo manaomia le fesoasoani, e pei ole “Fa’aola e ia ’Ou Alofa” po o le “Ona ua Tele.” A o e mafaufau i upu o le pese, mafaufau pe faapefea ona e mulimuli i le Faaola pe a e auauna atu i isi. O a faamanuiaga ua e mauaina e mafai ona e faasoa atu e siitia ai i latou o loo siomia oe i le ala na Ia faia ai?

Na aoao mai Elder Gerrit W. Gong: “Tatou te avea atili faapei o Iesu Keriso pe a tatou faia “i … se aupito itiiti o i latou nei” e pei ona tatou faia ia te Ia [tagai Mataio 25:35–40], pe a tatou alolofa i o tatou tuaoi e pei o i tatou lava [tagai Mareko 12:31], pe a tatou ‘fealofani e pei ona ou alofa atu ia te outou,’ [Ioane 13:34], ma pe a ‘o ai lava e fia sili ia te outou, ia avea o ia ma auauna’ [Mataio 20:26].”

“I le avea ai ma soo o Iesu Keriso, tatou te saili ia auauna atu i isi e faapei ona Ia faia aua o loo faatalitali olaga ina ia suia.”

E mafai ona e talanoa e uiga i nisi o auala na auauna atu ai Iesu Keriso i isi (tagai Mataio 14:13–21; Mareko 2:1–12; Luka 17:11–19; Ioane 9:1–7; 11:1–44). E mafai foi ona e vaavaai mo ata o nisi o nei tala i le Tusi Ata o le Talalelei po o le faaputuga “Vitio ma Ata” i le Potutusi o le Talalelei. Faasoa atu i le tasi ma le isi mea e faagaeetia ai oe e uiga i le auala na tausia ai e le Faaola i latou o loo manaomia le fesoasoani. Ona mafai lea ona e filifili se mea se tasi e uiga i le auala o le auauna atu a le Faaola e te manao e mulimuli ai. Mafaufau pe faapefea e au amioga ona faamanuiaina moni ai i latou o e “o loo faatalitali mai o latou olaga e suia.”

Salamo 35:10; Luka 6:27–38; Galuega 20:35; Mataupu Faavae ma Feagaiga 42:30–31; 52:40

W. Christopher Waddell, “E Pei Lava Ona Ia Faia,” Liahona, Me 2019, 19–21

Camille N. Johnson, “O Iesu Keriso o le Mapusaga,” Liahona, Me 2023, 81–83

Jean B. Bingham, “Auauna Atu e pei ona Faia e le Faaola,” Liahona, Me 2018, 104–7

Mafaufau i valaauga po o tiutetauave na e maua i le Ekalesia a o e faitauina le Ioane 15:16. Ona faitau lea o le manatu lenei mai ia Peresitene Henry B. Eyring: “Ua silafia outou e le Alii. Na te silafia po o ai e finagalo o Ia e auauna atu i tofiga uma i totonu o Lana Ekalesia. Na Ia filifilia oe.” Mafaufau i le “fua” ua e vaaia mai le auauna atu i ou valaauga po o tofiga. Aisea atonu na filifilia ai oe e le Alii mo lou valaauga i le taimi nei? O le a se mea e mafai ona e faia i lou valaauga ina ia mafai ona i ai se aafiaga tumau o lau auaunaga i isi ma “e tatau ona tumau ai lau fua”?

E mafai ona e tusia ou vae mo ni nai taimi e fai ai ni tulagavae faigofie ona tusi lea i totonu o tulagavae taitasi i se auala se tasi e mafai ona tatou latalata atili atu ai ia Keriso a o tatou auauna atu i o tatou valaauga ma tofiga o le Ekalesia. Ona mafai lea ona tou faitau faatasi le manatu lenei mai ia Peresitene Dieter F. Uchtdorf: “Afai tatou te taulimaina o tatou valaauga o ni avanoa e auauna ai i le Atua ma auauna atu ai i isi i le faatuatua ma le lotomaualalo, o faatinoga uma la o auaunaga o le a avea ma se laasaga i luga o le ala o le avea ma soo.” Ona mafai lea ona outou faasoa atu i le tasi ma le isi mea na outou tusia. Mafaufau loloto i mea e mafai ona e faia e auauna atu ai ma le faatuatua sili atu ma le lotomaualalo i ou valaauga. Tusi ni uunaiga e oo mai, ona faatino lea.

Iosua 1:1–9; Mataio 25:23; 1 Korinito 12:13–18; Mataupu Faavae ma Feagaiga 84:88; Mataupu Faavae o le Faatuatua 1:5

Dieter F. Uchtdorf, “Faamaualuga Le Mea E Te Tu Ai,” Liahona, Nov. 2008, 53–56

Carl B. Cook, “Auauna Atu,” Liahona, Nov. 2016, 110–12