Library
Alofa Mama

“Alofa Mama,” Autu ma Fesili (2023)

O Keriso ma tamaiti

Taiala mo le Suesueina o le Talalelei

Alofa Mama

O le mauaina o le alofa mama o Keriso

Tatou te lagona uma lava le ita tele po o le le fiafia i nisi taimi—atonu foi e masani lava. Atonu tatou te le manatu gatasi ma tuaoi po o tagata faigaluega. Pe i nisi taimi atonu tatou te le onosai ai i a tatou fanau po o taitoalua. Atonu tatou te i ai i tulaga o le faitio ma faamasinoina isi. Ioe, e leai se tasi e atoatoa, ma o se mea masani le lagonaina o lenei lagona i nisi o taimi. Ae pe na e mafaufau ea pe faapefea ona e alofa ma onosai atili ia i latou o loo siomia oe?

E faigofie lava le tali: e mafai ona faamaluluina lou loto e ala i le alofa mama, o se meaalofa mai le Atua. O le atiina ae o le alofa mama o le avea lea e faapei o Iesu Keriso, ma o se taumafaiga lena i le olaga atoa. Ae o le a fesoasoani lou Tama Faalelagi ma lou Faaola, o Iesu Keriso, ia te oe a o e saili ma le faamaoni ia avea atili e faapei o i La’ua.

O Le A Le Alofa Mama?

O le alofa mama o le “alofa le pona lea o Keriso (tagai i le Moronae 7:47). O le ituaiga alofa aupito maualuga ma sili ona malosi lea. O le alofa mama e faaosofia ai i tatou e auauna atu i le Atua ma isi ma o tatou loto atoa, malosi, mafaufau, ma le malosi atoa (tagai i le Mataupu Faavae ma Feagaiga 59:5).

Vaaiga aoao i le autu: Alofa Mama

Taiala e faatatau i le suesueina o le talalelei: Iesu Keriso, Faatuatua, Faamoemoe, Meaalofa o le Agaga, Auaunaga

Vaega 1

O Le Alofa Mama O Le Alofa Le Pona o le Tama Faalelagi ma Iesu Keriso mo Tagata Uma

Keriso o loo tuliesea temoni mai i se tagata

E atoatoa le alolofa o le Tama Faalelagi ma Iesu Keriso ia i tatou. Na aoao mai le perofeta o Mamona e faapea, o le “alofa mama o le alofa le pona lea o Keriso” (Moronae 7:47). I le taimi o Lona soifuaga, sa faaalia ai e Iesu Keriso le alofa ma le agaalofa i e fiaaai, e agasala, e puapuagatia, ma e mamai. Sa ia auauna atu i e matitiva ma e mauoa, i uo ma tagata ese. Sa Ia faamagaloina foi i latou na molia o Ia ma i latou na faasatauroina o Ia (tagai i le Luka 23:34). O Iesu Keriso o le faataitaiga atoatoa lea o le alofa atoatoa.

Mea e mafaufau i ai

  • O le alofa atoatoa o Iesu Keriso na uunaia ai Ana amioga taitasi. Mafaufau i faataitaiga nei: Mataio 26:39; Luka 7:22; 1 Nifae 19:9. E faapefea ona faaalia i nei fuaitau taitasi le alofa o Keriso mo i tatou? Atonu e te faatusatusaina nei faataitaiga o le alofa o le Faaola ma le faamatalaga a Paulo e uiga i le alofa mama i le 1 Korinito 13. Na faapefea ona faaalia e le Faaola lenei ituaiga alofa ia te oe?

  • Na aoao mai le Perofeta o Iosefa Samita, “O le alofa o se tasi lea o uiga autu o le Atua.” Mafaufau e tusi i lau apitalaaga upu ou te iloa e alofa le Atua ia te au aua … I le vaiaso atoa, tusi i lalo auala e te faamaeaina ai lenei fuaiupu. E mafai ona e faitau pe faalogologo i se pese e pei o le “O Le Atua o le Alofa” po o le “E Alofa Lo’u Tama Faalelagi ia te Au” mo ni manatu.

Gaoioiga mo le aoaoina faatasi

  • Mafaufau i le aoaoga lenei a Elder Jeffrey R. Holland: “O le poloaiga muamua ma le sili o le faavavau atoa o le alofa atu lea i le Atua ma o tatou loto atoa, manatu, mafaufau, ma le malosi atoa—o le poloaiga muamua lena ma le sili. Ae o le upumoni muamua ma le sili o le faavavau atoa o le, e alofa le Atua ia i tatou ma Lona loto atoa, manatu, mafaufau, ma le malosi atoa. Talanoa pe faapefea e le iloaina o le alofa tele o le Atua mo oe ona suia ai ou lagona, mafaufauga, ma amioga.

  • O le matamataina o le vitio “Charity: An Example of the Believers” (4:50) e mafai ona musuia ai se talanoaga e uiga i le auala e suia ai e le alofa faaKeriso olaga. Na faapefea ona faaalia e tamaitai talavou i lenei vitio le alofa faaKeriso i le teine fou o le au lape? Na faapefea ona aafia o ia i lenei alofa? Na faapefea ona aafia ai isi tamaitai talavou? Mafaufau i tagata o loo siomia oe o e atonu e manaomia ona lagona le alofa o le Faaola. Talanoa e uiga i auala e mafai ona e faasoa atu ai le alofa o Keriso i se tasi pe toalua o i latou.

Aoao atili

Vaega 2

O Le Alofa Mama O Le Uiga Mama Silisili Lea e Mafai Ona Maua e Soo o Iesu Keriso

tamaitai o loo auauna atu

O le alofa mama e le o se mea tatou te faia po o se mea tatou te foai atu. O se tulaga o o tatou loto ma se auala e ola ai. O le tagata tatou te avea ai ma mea tatou te lagonaina, ma e taitai atu ai i tatou e faia se gaoioiga alofa (tagai i le Moronae 7:45–47).

A aunoa ma le alofa mama, o tatou o se meanoa; o le i ai [o le alofa mama], ua ia i tatou mea uma (tagai i le Eteru 12:34; Moronae 7:44). E mavae atu isi mea uma, ae o le alofa mama e tumau e faavavau ma e le uma lava (tagai Moronae 7:46–47). E faapefea la ona tatou maua o lea meaalofa? Na saunoa le perofeta o Mamona, “Ia outou tatalo atu i le Tama ma le malosi atoa o le loto, ina ia faatumuina outou i lenei alofa, … ina ia avea i tatou e faapei o ia pe a afio mai [Iesu Keriso]” (Moronae 7:48).

Tatou te aoao e faataitai le alofa mama i a tatou mafutaga—i totonu o o tatou aiga, i totonu o a aulotu, i totonu o o tatou nuu, ma tagata uma tatou te feiloai i ai. A o tatou taumafai malosi e talia isi mo tagata ua i ai i latou ma vaai atu ia i latou e pei ona faia e lo tatou Tama Faalelagi ma Iesu Keriso, e mafai ona amata ona tatou alolofa i tagata e pei ona La’ua faia.

Mea e mafaufau i ai

  • Faitau le 1 Korinito 13:1–7, ma vaai faalemafaufau ia te oe lava i nei fuaiupu. Ona faitau lea o le fuaiupu 8, O le a le uiga ia te oe o le “e le uma lava le alofa”? Mafaufau pe o i ai ni uiga o loo lisiina i fuaiupu 4–7 e mafai ona e galue ai e fesoasoani ia te oe e avea ma se faataitaiga sili atu o le alofa mama.

  • E ui o le alofa mama o se meaalofa mai le Atua, e pei lava o soo se meaalofa, e tatau ona tatou mauaina. O le a se mea ua e aoaoina mai le Moronae 7:48; 8:26 e uiga i le auala e maua ai le meaalofa o le alofa mama?

  • Na aoao mai e Peresitene Russell M. Nelson nei upumoni taua e uiga i le alofa mama: “O le alofa mama o le vaifofo lea i finauga. O le alofa mama o le meaalofa faaleagaga lea e fesoasoani ia i tatou e lafoai ese ai le tagata natura, o lē e manatu faapito, taupunipuni, faamaualuga, ma lotoleaga. O le alofa mama o le uiga ‘autu lea o se soo moni o Iesu Keriso. O le alofa mama e faamatalaina ai sē e faatupu filemu.” A o e mafaufau loloto i upu a Peresitene Nelson, o le a se mea ua musuia oe e le Agaga e fai? Mafaufau e tuu le saunoaga a Peresitene Nelson i se mea o le a e vaai soo i ai o se faamanatu e faaali atu le alofa mama mo isi.

Gaoioiga mo le aoao faatasi ma isi

  • E faapefea ona e iloa se soo o Iesu Keriso? Sa aoao mai le Faaola lava Ia, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35). Mafaufau faatasi o se vaega i tagata e te faamemelo i ai o ni faataitaiga moni o le alofa mama. Na faapefea ona e vaai ia i latou o faaalia le alofa mama o Keriso? Mafaufau e auina atu se feau tusitusia pe tusi se tusi i se tasi o nei tagata ma faasoa atu mea e te fiafia i ai e uiga ia te ia.

  • Talanoa e uiga i nisi o filifiliga taua e te faia i aso uma. Ona faitau lea o le “Alofa i le Atua, alofa i Lou Tuaoi” i le Mo Le Malosi o le Autalavou: O Se Taiala mo le Faia o Filifiliga ([2022], 10–15) Talanoaina pe faapefea ona avea le meaalofa o le alofa mama ma se taiala a o e faia na filifiliga taitasi.

  • Mafaufau i le fautuaga lenei mai ia Peresitene Dieter F. Uchtdorf: “Po o a lava ni faafitauli o loo feagai [ma oe po o] lou aiga, po o le a lava le mea e tatau ona e faia e foia ai, o le amataga ma le faaiuga o le vaifofo o le alofa mama, le alofa le pona o Keriso.” Galulue faatasi e fai se lisi o nisi o faafitauli po o luitau o loo feagai ma tagata taitoatasi po o aiga i aso nei, e pei o finauga po o le lotoleaga. Ona mafai lea ona e faitauina le Moronae 7:45 ma talanoa e uiga i le auala e mafai ai e uiga o le alofa mama o loo faamatalaina i lenei fuaiupu ona fesoasoani e foia ai faafitauli o loo i lau lisi. Ona mafai lea ona e faia se fuafuaga faigofie e faaaoga ai le alofa mama e fesoasoani ai e foia se tasi o faafitauli. Ia faaaofia le Atua i lau fuafuaga, ma saili le fesoasoani mai isi pe a talafeagai ai.

Aoao atili

Faamatalaga

  1. Aoaoga a Peresitene o le Ekalesia: Iosefa Samita (2011), 426,

  2. Viiga, nu. 48.

  3. Tusipese a Tamaiti,16.

  4. Jeffrey R. Holland, “O a Taeao e Faia ai e le Alii o Vavega i o Outou Luma,” Liahona, Me 2016, 127.

  5. Sa aoao mai Peresitene Dallin H. Oaks e faapea “o le mafuaaga e le uma ai le alofa mama ma le mafuaaga e sili atu ai le alofa mama nai lo gaoioiga taua [lea na taua e le Aposetolo o Paulo] [i le 1 Korinito 13] ona o le alofa mama, ‘le alofa le pona o Keriso’ (Moro. 7:47), e le o se gaoioiga ae o se tulaga po o le aga o le avea ai. E mauaina le alofa mama e ala i se faasologa o faatinoga lea e taunuu atu ai i se liua. O le alofa mama o se mea e avea ai se tasi” (“The Challenge to Become,” Ensign, Nov. 2000, 34).

  6. Russell M. Nelson, “Ua Manaomia i Latou e Faatupuina le Filemu,” Liahona, Me 2023, 100.

  7. Dieter F. Uchtdorf, “I Le Viia ai o i Latou o E Laveai,” Liahona, Me 2016, 80.