Faamoemoe

O se talitonuga lea e faapea o folafolaga e faavavau o le a faataunuuina e ala mai ia Iesu Keriso

E masani ona aumaia e le olaga ni tulaga e lei faamoemoeina, ma faigata lea e mafai ona taitai atu ai i tatou e lagona le lotovaivai, lofituina, ma le faatoilaloina. I taimi faapena, e le tuua ai i tatou e le Tama Faalelagi e vaivai ma tuuatoatasi. Na te ofoina mai le tele o punaoa faaleagaga—e aofia ai le meaalofa o le faamoemoe—lea e fesoasoani tatou te maua ai le malosi, lototele, ma se faamoemoe mo se lumanai fiafia (tagai i le Moronae 9:25).

Mo i latou o loo ola i le talalelei a Iesu Keriso, o le faamoemoe e aumaia ai le faamautinoaga o loo silafia i tatou e le Atua ma o le a faataunuuina Ana faamanuiaga folafolaina e tusa ai ma Lona finagalo ma [Lana] taimi. O le meaalofa a le Atua o le faamoemoe e fesoasoani tatou te vaai ai i aafiaga o le olaga faaletino mai se vaaiga e faavavau, aemaise lava i taimi e tofotofoina ai lo tatou faatuatua (tagai i le Ieremia 17:7). O Iesu Keriso o se Atua o le faamoemoe, ma ua Ia faatagaina i tatou e maua le tele o le faamoemoe (tagai i le Roma 15:13). E oo mai le faamoemoe mai le i ai o le faatuatua i le alofa o lo tatou Faaola ma Lona mana e laveai ma faasao ai i latou o e o mai ia te Ia.

O Le A Le Faamoemoe?

O le faamoemoe o se meaalofa faalelagi e oo mai pe a faatino e se tagata le faatuatua ia Iesu Keriso (tagai i le Moronae 7:40–41). E aumaia ai se lagona o le talitonu e faapea, o le a faataunuina folafolaga e faavavau e ala mai ia te Ia. O Ia o le punavai o le faamoemoe ma le malosi mo fanau uma a le Atua (tagai i le Ioelu 3:16). O le faamoemoe e tuuina mai ai ia i tatou le lototele e agai ai i luma i taimi o faigata o le olaga faaletino. O le tatalia ma le olioli o le Toetu ma faamanuiaga folafolaina o le faaolataga ma le faaeaga. O le faamoemoe e taitai atu ai se tagata e taulai atu i manaoga o isi ma auauna atu ia i latou ma le alofa mama.

Vaaiga aoao i le autu: Faamoemoe

Taiala e faatatau i le suesueina o le talalelei: Faatuatua ia Iesu Keriso, Togiola a Iesu Keriso, Alofa Mama, Meaalofa o le Agaga, Toetu

Vaega 1

E Tuuina Mai e Iesu Keriso le Faamoemoe a o E Saili e Mulimuli ia te Ia

aiga o loo tuu fugalaau i luga o le tuugamau

O le tele o faigata tatou te feagai i lenei olaga o se taunuuga o le Pau o Atamu ma Eva (tagai i le Mataupu Faavae ma Feagaiga 29:40). O ma’i, mafatiaga, agasala, ma le oti o se vaega o le aafiaga faaletino. Ana leai le Togiola ma le Toetu e ala mai ia Iesu Keriso, semanu tatou te le maua lava le faamalologa, faamagaloga, olioli, po o le ola e faavavau (tagai i le 2 Nifae 9:7–9). O le a tatou faanoanoa ma leai se faamoemoe e faavavau (tagai i le Mosaea 16:3–4).

Ae na afio mai Iesu Keriso i le lalolagi ma mafatia mo tulaga pagatia uma i o tatou olaga (tagai i le Alema 7:11). Sa Ia faatoilaloina le faasalaga o le agasala mo i latou uma o e faaali le faatuatua ia te Ia ma salamo i a latou agasala (tagai i le Mose 5:9). Sa Ia motusia noataga o le oti ma toetu mai, ua tatalaina ai le ala mo i tatou e toe ola ai (tagai i le 2 Nifae 2:6–8). Ua Ia folafola mai le faamoemoe o le ola e faavavau i tagata uma o e o le a mulimuli ia te Ia (tagai i le Eteru 12:32).

Mea e mafaufau i ai

O le talitonu i le Atua e aumaia ai le faamoemoe ma le talitonu maua’i i le moni o le Toetu ma le ola e faavavau. Faitau le Eteru 12:4. E mafai faapefea e le faamoemoe lea e oo mai e ala i lou faatuatua ia Iesu Keriso ona avea ma taula i lou agaga i lou olaga i aso taitasi?
I le Tusi a Mamona, na oo ai tagata o Aneti-Nifae-Liae i se suiga mamana ina ua latou faalogo i le savali o le talalelei ma sa liuaina ai. Faitau le Alema 27:28. Na faapefea e le meaalofa o le faamoemoe ma lo latou malamalamaaga ia Iesu Keriso ona uunaia ai o latou vaaiga e uiga i le olaga lenei ma le isi? E ono mafai faapefea ona faatatau lenei mataupu faavae i lou olaga?

Gaoioiga mo le aoao faatasi ma isi

O le maliu o se tagata o le aiga po o se uo e aumaia ai le faanoanoa. Talu ai ona sa mafatia Iesu Keriso i tiga ma puapuaga o tagata uma, e mafai ai ona tatou tatalo i le Tama Faalelagi i Lona suafa ma saili Lana fesoasoani faamafanafana. Ua folafola mai le faamanuiaga o le faamoemoe ia i latou o e o le a talitonu i le fuafuaga a le Atua mo lo tatou toetutu ma le ola e faavavau. Ina ia malamalama lelei i le taua o le faamoemoe i se taimi o le maliu [o se pele], valaaulia tagata o le vaega e filifili ma faitau se tasi o mau nei: 1 Peteru 1:3–5; Iakopo 4:11; Alema 13:27–29; Eteru 12:32. Atonu foi tou te matamata i le “Mauaina o le Faamoemoe e ala i le Toetu o Keriso” (4:41). E faapefea ona aumaia e le meaalofa o le faamoemoe le mafanafana ia i latou ua maliliu uo ma e pele ia i latou? E faapefea ona e faamatalaina le faamoemoe e faapea, o Iesu Keriso ua mafai ai e oe ma e pele ia te oe ona toetutu ma ola e faavavau?

Aoao atili

Faataoto 10:28; Auega 3:25–26; 1 Korinito 15:19; Moronae 9:25–26
“The Power of Hope” (vitio), Potutusi o le Talalelei
Jeffrey R. Holland ma Patricia T. Holland, “O Se Lumanai e Faatumulia i le Faamoemoe” faigalotu i le lalolagi atoa mo le autalavou matutua, 8 Ian., 2023), Potutusi o le Talalelei.

Vaega 2

O Lou Faatuatua ia Iesu Keriso O Le a Aumaia ai ia te Oe le Faamoemoe

E masani ona talanoa tusitusiga paia e uiga i le faamoemoe faatasi ai ma uiga auaumama o le faatuatua ma le alofa mama (tagai i le Moronae 7:40–44). O a tatou taumafaiga e faateleina lo tatou faatuatua ia Iesu Keriso ma faatino le alofa mama i isi, e fesootai tonu lava ma lo tatou gafatia e maua ai le faamoemoe (tagai i le Moronae 10:20–21). I le saunoa ai e uiga i le taua o le faatuatua, faamoemoe, ma le alofa mama, na faamalamalama mai ai e Peresitene Russell M. Nelson: “O nei uiga auaumama e tolu ua lalagaina e pei o ni manoa i se uaea ma atonu e le o taimi uma e iloa gofie ai. E avea faatasi i latou ma o tatou fusi i le malo selesitila.”

O le faamoemoe o se tasi lea o faamanuiaga e mafai ona tatou maua e ala mai i le Agaga Paia pe a tatou salamo ma papatisoina (tagai i le Moronae 8:25–26). Ua folafola mai ia i tatou a tatou maua le “faatuatua lē maluelue” ia Iesu Keriso, o le a fesoasoani le Tama Faalelagi ia i tatou ia maua se “malamalama atoatoa o le faamoemoe” (2 Nifae 31:19–20). E mafai foi ona tatou maua le faamoemoe sili atu pe a tatou suesue i tusitusiga paia (tagai i le Roma 15:4; Iakopo 4:6).

Mea e mafaufau i ai

I le saunoa atu i le autalavou matutua, sa aoao atu ai Sister Patricia Holland, “O lefaatuatua o le talitonuga lea e i ai se Atua, o le faamoemoe o le faatuatuaina lea o le a Ia fesoasoani mai ia i tatou, ma o le alofa mama o Lona alofa lea ma le gafatia e galue ai e ala atu ia i tatou e faamanuia ai isi.” E faapefea e le aoao e uiga i le faatuatua ma le alofa mama ona fesoasoani tatou te malamalama lelei ai i le faamoemoe?

Gaoioiga mo le aoao faatasi ma isi

Faatasi ai ma tagata o le vaega, faitau le saunoaga lenei a Peresitene Dieter F. Uchtdorf:

“E faaaoga e le fili le faanoanoa e fusia ai loto ma mafaufau i le pogisa e mole ai. O le faanoanoa e aveesea ai mai ia i tatou mea uma e malolosi ma olioli ai ae tuua ai toe vaega gaogao o le mea sa tatau ona i ai le olaga. …

“O le faamoemoe, i le isi itu, e pei lava o le sulu o le la oso ae i luga ma luga ae o le tafailagi o o tatou tulaga o i ai nei. E tuia ai le pogisa i se tafa o ata susulu. E faamalosiau ma musuia ai i tatou e tuu atu lo tatou faalagolago i le tausiga alofa a se Tama Faalelagi e faavavau, o le ua saunia se ala mo i latou o e saili mo le upumoni e faavavau i se lalolagi e faamoemoe i isi mea, fenumiai, ma le fefe.”

O a nisi o auala e mafai ai e le mauaina o le uiga auaumama o le faamoemoe ona fesoasoani ia i tatou e vaai atu ai i le pogisa o lenei lalolagi?

Aoao atili

Alema 7:22–24; Eteru 12:28; Mataupu Faavae o le Faatuatua 1:13
Russell M. Nelson, “A More Excellent Hope,” Ensign, Fep. 1997, 60–64
Dieter F. Uchtdorf, “O Le Mana e Lē I’u o le Faamoemoe,” Liahona, Nov. 2008, 21–24

O Isi Punaoa e uiga i le Faamoemoe