Tafaoga Faamasani

I aganuu e taliaina ai, o tafaoga faamasani e mafai ona fesoasoani i tagata e atiina ae ai faauooga ma iu ai ina maua se soa e faavavau. O le a faamanuiaina tagata o le Ekalesia a o latou faaaluina se taimi ma i latou e maualuluga o latou tulaga faatonuina ma e fesoasoani ia i latou e tausia a latou feagaiga ma le Atua.

O se auala lelei e faamasani ai ia i latou o le itupa faafeagai e ala lea i gaoioiga lelei faalevaega. O gaoioiga faalevaega ma tafaoga faamasani taitoatasi e tatau ona faatali seia matutua le autalavou—o le 16 tausaga pe matutua atu o se taiala lelei lea. Mo lo latou tuputupu ae faalelagona ma faaleagaga ma le saogalemu, e sili atu mo le autalavou ona faatali sootaga tumau seia oo ina matutua atu ma ua saunia e mafaufau loloto atili e uiga i le faaipoipoga.

O avanoa e tafafao faamasani ai o le a eseese e tusa ai ma tulaga faaletagata lava ia. Atonu e manatu nisi e tapulaa o latou avanoa. Ae, e mafai lava e tagata o le ekalesia ona agai i luma i le faaipoipoga e ala i le taumafai e avea ma ituaiga tagata latou te mananao e faaalu faatasi ai le taimi. A amata ona latou faia ni sootaga sili atu ona mautu, e tatau foi i tagata taitoatasi ona mafaufau ma le totoa i uiga ma amioga latou te mananao e maua i se toalua i le lumanai. Mo se faataitaiga, atonu latou te vaavaai mo se tasi e alofa i le Alii ma o lē e faamaoni, agalelei, onosai, galue malosi, le manatu faapito, ma lotomaualalo ma e talitutusa a [laua] molimau o le talalelei a Iesu Keriso.

Peitai, o i latou o loo sailia se paaga faaipoipo e manaomia ona manatua e leai se tasi e atoatoa. E tatau i ulugalii ona faamoemoe e aoao ma tuputupu ae faatasi ma le tasi ma le isi. Na aoao mai Elder David  A. Bednar: "E ala i le mamanu faalelagi, ua faamoemoe ai alii ma tamaitai ia agai faatasi atu i luma i le atoatoa ma se atoatoaga o le mamalu ... E faaatoa ma faaatoatoa e le tane le fafine ma e faaatoa ma faaatoatoa e le fafine le tane a o laua aoao mai ma fefaamalosiai faatasi ma faamanuia e le tasi le isi."

A o atiina ae ni sootaga loloto atu, e mafai ona manuia paaga uma e toalua mai le aoaoina pe o ogatusa a laua sini mo se taimi umi. Afai o ogatusa, atonu e aoga i ulugalii ona amata fatuina se fuafuaga mo lo laua lumanai ma faatino lena fuafuaga i le faatuatua. O le a faamanuiaina foi ulugalii a o latou saili ia maua ni aafiaga faaleagaga ma faaaofia ai le Alii i la latou sootaga. A o latou faia lenei mea, e mafai ona taialaina i latou e le Agaga i a latou faaiuga, lea e mafai ona fesoasoani ia i latou e alualu ai i luma i luga o le ala o feagaiga.

O tafaoga faamasani e mafai ona fatuina ai ni avanoa e faataitai ai ni mea fou, maua ai le fiafia, ma talisapaia atili ai isi tagata. E i ai taimi, e mafai foi ona avea o se faagasologa umi ma faigata. Ae e silafia e le Tama Faalelagi tagata taitoatasi ma silafia o latou tulaga uiga ese. O le a Ia lagolagoina i latou a o latou faalatalata atu ia te Ia.

E ala i nei aafiaga eseese, e mafai ona fesoasoani le manatua o le manuia i tafaoga faamasani e ausia a o aoao ma tuputupu ae tagata taitoatasi, faatino le faatuatua ma faalagolago i le Alii, ma avea atili e faapei o Iesu Keriso.