Faaipoipoga

Ua folafola mai e le Au Peresitene Sili ma le Korama a Aposetolo e Toasefululua e faapea “o le faaipoipoga i le va o se alii ma se tamaitai ua faauuina e le Atua ma o le aiga o le totonugalemu lea o le fuafuaga a le Foafoa mo le taunuuga e faavavau o Lana fanau.”Pe a faaipoipo se alii ma se tamaitai i le malumalu, e mafai ona faatasi lo la aiga e faavavau. O se sini masani lea a le Au Paia o Aso e Gata Ai.

O olioliga silisili o le olaga e maua i le aiga. O sootaga malolosi faaleaiga e manaomia ai taumafaiga, ae o taumafaiga faapena e aumaia ai le fiafia tele i lenei olaga ma e oo atu lava i le faavavau. I le fuafuaga o le fiafia a lo tatou Tama Faalelagi, e mafai e se alii ma se tamaitai ona faamauina i le tasi ma le isi mo le taimi nei ma le faavavau atoa. O i latou ua faamauina i le malumalu ua i ai le faamautinoaga o le latou mafutaga o le a faaauau e faavavau pe afai latou te faamaoni i a latou feagaiga. Latou te iloa e leai se mea, e oo lava i le oti, e mafai ona tuueseeseina tumau i latou.

O le feagaiga o le faaipoipoga e faavavau e alagatatau mo le faaeaga. Na faaali mai e le Alii e tauala mai ia Iosefa Samita: “I le mamalu selesitila o loo i ai ni lagi po o ni tikeri e tolu; ma ina ia maua le tikeri aupito maualuga, e ao i se tagata ona ulu atu i le faatulagaga lenei o le perisitua [o lona uiga o le feagaiga fou ma tumau-faavavau o le faaipoipoga]; ma afai e lē ulu atu i ai o ia, e lē mafai ona maua e ia. “E mafai ona ulu atu o ia i le isi malo, ae o le mutaaga lena o lona malo; e lē mafai ona maua e ia se faatelega.”

A mae’a ona maua sauniga o le faamauga ma osia feagaiga paia i totonu o le malumalu, e tatau i se ulugalii ona faaauau pea i le faamaoni ina ia mafai ai ona maua faamanuiaga o le faaipoipoga e faavavau ma le faaeaga. Na fetalai le Alii:

“Afai e faaipoipo se tane i se ava i la’u upu, o la’u tulafono lea, ma i le feagaiga fou ma le tumau-faavavau, ma ua faamauina ia te i laua e le Agaga Paia o le folafolaga, e ia o le ua faauuina, o le ua Ou tofia i ai lenei mana ma ki o lenei perisitua; … ma afai e ola i [laua] i la’u feagaiga, … o le a faia ia te i laua i mea uma i soo se mea e tuu atu e la’u auauna i luga o i laua, i le taimi nei, ma i le faavavau atoa; ma o le a taulia atoatoa pe a i ai i laua i fafo o le lalolagi.”

O i laua ua faaipoipoina e tatau ona mafaufau i lo laua faatasiga o le la mafutaga faalelalolagi aupito sili ona pele. O se toalua ua na o le pau lea o le tagata e ese mai i le Alii ua poloaiina i tatou ia alofa i ai ma o tatou loto atoa.

O le faaipoipoga i lona uiga moni lava, o se paaga tutusa, e leai se tagata e fiapule i le isi, ae ia fefaamalosiaua’i, fefaamafanafanaa’i, ma fesoasoani i le isi.

Ona o le faaipoipoga o se mafutaga taua tele i le olaga, o lea e manaomia ma alagatatau ai le taimi i lo o tautinoga e faaletāua. E mafai e ulugalii ona faamalolosia a latou faaipoipoga a o latou faaalu le taimi e talanoa faatasi ai ma ia faalogo le tasi i le isi, ia magafagafa ma faaaloalo, ma ia faaali atu e le aunoa lagona faapelepele ma le alofa.

E tatau i paaga faaipoipo ona tuuto faamaoni i le tasi ma le isi ma faamaoni i a latou feagaiga o le faaipoipoga i mafaufauga, upu, ma mea e fai. Ua fetalai mai le Alii: “Ia e alofa i lau avā ma lou loto atoa, ma ia e pipii atu ia te ia ae le o se isi.” Ua aoao mai le fuaitau, “ae le o se isi” e leai se tagata, gaoioiga, po o meatotino e tatau ona faamuamua nai lo le mafutaga faalefaaipoipoga.

E tatau i ulugalii ua faaipoipoina ona aloalosa mai soo se mea e mafai ona oo atu i le le faamaoni i soo se itu lava. O ponokarafi, faiamio, ma faatafaiga o le a faatamaia ai le tagata ma ōia ai faavae o le faaipoipoga (Aoao i auala e puipui ma faamalolo ai e le talalelei ia aiga mai aafiaga o ponokalafi.)

E tatau i ulugalii ona galulue faatasi e pulea a latou tupe ma galulue faatasi i le faatulagaina ma mulimuli i se paketi. O le pulea ma le atamai o tupe ma le saoloto mai aitalafu e saofagā i le filemu i le aiga.

Ma le vaega mulimuli, e tatau i ulugalii ona faaogatotonu o latou olaga i le talalelei a Iesu Keriso. A o fesoasoani ulugalii i le tasi ma le isi ia tausia feagaiga na latou osia, auai atu faatasi i le lotu ma le malumalu, suesue faatasi i tusitusiga paia, ma tootutuli faatasi i le tatalo, o le a faapea ona taiala i latou e le Atua. O le a matagofie a latou faigapaaga i le aluga o tausaga; o le a faamalosia lo latou alofa. O le a faateleina lo latou talisapaia o le tasi ma le isi.