Aufono a le Ekalesia

O le faamoemoega o aufono a le Ekalesia o le sailia lea ma maua faaaliga faalelagi. O aufono i le Ekalesia e mulimuli i le mamanu o le aufono i le lagi. I aufono a le Ekalesia e mafai ona tatou maua musumusuga e faia ai faaiuga, auauna lelei atu i tagata taitoatasi ma aiga, ma fuafua ma faamaopoopo le galuega a le Atua o le faaolataga ma le faaeaga. Ua tuuina mai e aufono i le Ekalesia se faamamafa faapitoa e fesoasoani ai i tagata o le Ekalesia ia maua sauniga ma tausia feagaiga e o faatasi ai.

E valaauina tagata o le Ekalesia, pe filifilia e ala i faaaliga mai le Atua i taitai o le Ekalesia, e galulue i aufono. E ala i le tele o aufono i le Ekalesia, e fesoasoani ai alii ma tamaitai e taitai le galuega a le Alii i le lalolagi atoa. O loo tusia i le Tusitaulima Aoao e faapea “o talaaga eseese, tausaga, aafiaga, ma manatu o sui o le aufono e faatamaoaigaina ai le aufono.”

E fesoasoani aufono ia i tatou e saili ai le finagalo o le Alii i le lotogatasi ma le faatuatua. O loo maua i tulaga uma o le Ekalesia ma e aofia ai aufono aoao, eria siteki, uarota, korama, vasega, ma isi aufono faaleautaitai. E saili sui auai o le aufono ia lotogatasi ma le Tama Faalelagi ma Iesu Keriso i lo latou manao ma le faamoemoega. I le Ekalesia, o aufono e le puleaina e le tulafono o le toatele e pei ona taatele i le tele o isi faalapotopotoga. E le faia foi e le taitai o le aufono ni faaiuga na o ia lava. O faaiuga e faia e le taitai o le aufono e logoina e le talanoaga a le aufono ma faamaonia e le Agaga Paia.

E taiala e se taitai ia talanoaga a le aufono ma uunaia tagata taitoatasi e faasoa mai o latou malamalamaaga. E tatau i sui auai o le aufono ona lagona le saogalemu e faasoa atu o latou manatu i se agaga o le agalelei ma le alofa. E galulue taitai e fatu se siosiomaga lea e faalogoina ai tagata uma ma faatauaina ai manatu uma. O se mea lenei e seasea tupu i le lalolagi i aso nei.

A o faalogologo sui auai o le aufono, mafaufau ma le lotomaualalo i lagona o isi, ma saili ia iloa le finagalo o le Tama Faalelagi, e mafai ona i ai se agaga o musumusuga ma le lotogatasi. Mo nisi faamatalaga e uiga i aufono a le Ekalesia, tagai i le Tusitaulima Aoao, mataupu 4.