Taaloga Faitupe

E tetee le Ekalesia a Iesu Keriso o le Au Paia o Aso e Gata Ai i taaloga faitupe, e aofia ai lulu e lagolagoina e malo. Ua uunaia e taitai o le Ekalesia tagata o le Ekalesia ina ia auai faatasi ma isi i le tetee atu i le faatagaina faaletulafono ma le lagolagoina e le malo o soo se ituaiga o taaloga faitupe.

O taaloga faitupe e uuna’ia e se faanaunauga e maua se mea mai le leai o se mea. O lenei manao e faataumaoia faaleagaga. E taitai ese ai tagata auai mai aoaoga a le Faaola o le alofa ma le auauna atu ae agai atu i le manatu faapito o le fili. E faavaivaia ai uiga mama o le galue ma le faasoasoaina ma le manao e tuuina atu taumafaiga faamaoni i mea uma tatou te faia.

O i latou e auai i taaloga faitupe e le o toe mamao ona iloa lea o le taufaasese i le manatu e faapea, e itiiti pe leai foi se mea latou te foai atu ma maua mai se mea taua o se taui. Ua latou iloa ai ua latou lafoaia ni tupe tetele, lo latou lava mamalu, ma le faaaloalo o tagata o le aiga ma uo. O le faaseseina ma le fai ma vaisu, e masani ona latou taaalo i taaloga faitupe i tupe e tatau ona latou faaaogaina mo isi faamoemoega, e pei o le taulimaina o manaoga autu o o latou aiga. O nisi taimi e matuā faapologaina ai tagata taaalo faitupe ma matuā naunau ai lava e totogi aitalafu i taaloga faitupe, ma latou gaoi ai, ma lafoa’ia ai o latou lava igoa lelei.