Oti, Faaletino

O le oti faaletino o le tuueseeseina lea o le agaga mai le tino faaletino. O le Pā’u o Atamu na aumaia ai le oti faaletino i le lalolagi. Ona o le Togiola ma le Toetu o Iesu Keriso, o le a toetutu ai tagata uma ma laveaiina mai le oti faaletino.

O le oti o se vaega taua o le ata/fuafuaga o le faaolataga a le Tama Faalelagi. Ina ia mafai ona avea faapei o lo tatou Tama Faavavau, e tatau ona tatou oo i le oti ma mulimuli ane maua ni tino toetutu, atoatoa.

Pe a oti le tino faaletino, e faaauau pea ona ola le agaga. I le lalolagi o agaga, o agaga o e amiotonu “e talia i se nofoaga o le fiafia, lea ua ta’ua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa.” O le nofoaga e taua o le falepuipui o agaga ua faaavanoa mo i “latou o e [na] oti ia latou agasala, e aunoa ma se malamalama e uiga i le upumoni, poo le solitulafono, ona ua latou teena perofeta.” O agaga i le falepuipui o loo aoaoina “i le faatuatua i le Atua, le salamo mai agasala, le sui papatisoga mo le faamagaloina o agasala, le meaalofa o le Agaga Paia e ala i le faaee o lima, ma isi mataupu autu uma o le talalelei [e] tatau ia te i latou ona iloa.” Afai latou te taliaina mataupu faavae o le talalelei, salamo i a latou agasala, ma talia sauniga na faia mo i latou i malumalu, o le a taliaina i latou i le parataiso.

Ona o le Togiola ma le Toetu o Iesu Keriso, o le oti faaletino ua na o se mea e le tumau: “Aua faapei ona oti uma ia Atamu, e faapea foi ona faaolaina uma ia Keriso.” O le a toetutu tagata uma, o lona uiga o agaga o tagata uma o le a toefaatasia ma lona tino—“toefuataia mea uma i o latou tino e tatau ai ma atoatoa” ma e le toe oo i ai le oti.