Papatisoga

O le papatisoga e ala i le faatofuina i le vai e se tasi ua i ai le pule, o le uluai sauniga lea o le faaolataga ma le faaeaga i le talalelei a Iesu Keriso. E manaomia foi mo se tagata ina ia avea ai ma se tagata O Le Ekalesia a Iesu Keriso o le Au Paia o Aso e Gata Ai ma maua le faaolataga e faavavau. O i latou uma o e sailia le ola e faavavau e tatau ona mulimuli i le faataitaiga a le Faaola e ala i le papatisoina ma maua le meaalofa o le Agaga Paia.

Papatisoga i le Ala a le Alii

Na faaali mai e le Faaola le ala sa’o o le papatisoga i le Perofeta o Iosefa Samita, ua faamanino mai ai o le sauniga e tatau ona faataunuuina e se tasi ua i ai le pule o le perisitua ma e tatau ona faia i le faatofuina:

“O le tagata ua valaaulia e le Atua ma ua i ai le pule mai ia Iesu Keriso e papatiso ai, ia o ifo i lalo i le vai faatasi ma le tagata ua tuuina mai o ia lava e papatiso, ma valaau o ia i lona igoa, ma fai atu: Ona ua tofia aʼu e Iesu Keriso, ou te papatiso ia te oe i le suafa o le Tamā, ma le Alo, ma le Agaga Paia. Amene.

“Ona ia faatofu ai lea o ia i le vai, ma toe alu a’e ai mai le vai.”

O le faatofuina e faatusa lea i le maliu o se tagata mai le olaga e tumu i le agasala ma toe fanaufouina i se olaga faaleagaga, e tuuto i le galuega a le Atua ma Ana fanau. O se faatusa foi o le maliu ma le toetu.

O Le Feagaiga o le Papatisoga

O i latou e papatisoina e ulu atu i se feagaiga faatasi ma le Atua ina ia tauave i o tatou luga le suafa o Iesu Keriso, tausi Ana poloaiga, ma auauna atu ia te Ia seia oo i le iuga. E faafou e tagata o le Ekalesia lenei feagaiga i taimi taitasi latou te aai ma feinu ai i le faamanatuga.

O i latou o e tausia feagaiga na latou faia i le papatisoga e faamanuiaina e le Alii mo lo latou faamaoni. O nisi o faamanuiaga e aofia ai le mafutaga tumau a le Agaga Paia, o le faamagaloina o agasala, ma le avanoa e toefanauina ai faaaleagaga. Afai latou te faaauau pea ma le faamaoni, ua folafola mai ia i latou le ola e faavavau.

Tamaiti Laiti ma le Papatisoga

Mai faaaliga i aso e gata ai, ua tatou iloa ai o tamaiti laiti e faaolaina e ala i le alofa mutimutivale o Iesu Keriso. Na fetalai mai le Alii, “E le mafai ona agasala, i latou, ona ua lē tuuina atu ia Satani le mana e faaosooso ai i tamaiti laiti, sei oo ina amata ona tali mai i latou i oʼu luma.” E le tatau ona papatisoina i latou seia aulia le tausaga e tali atu ai mo i latou lava, lea ua faaalia mai e le Alii e valu tausaga le matutua. Ma o ia o le e fai mai e manaomia e fanau laiti le papatisoga ua ia “faafitia le alofa mutimutivale o Keriso, ma fai ma meanoa lana togiola ma le mana o lana togiola.”