Faamaoni

I le tuuina mai o Tulafono e Sefulu, na folafola mai le Alii: “Aua e te gaoi. Aua e te molimau pepelo.” Fai mai le mataupu faavae o le faatuatua e sefulutolu, “Matou te talitonu ia faamaoni.” O le faamaoni o lona uiga ia moni, amiosa’o, ma ia leai se taufaasese i taimi uma.

A tatou faamaoni i mea uma, ona tatou maua lea o le filemu o le mafaufau ma faatumauina le faaaloalogia o oe lava. Tatou te atina a’e le malosiaga o uiga, lea e mafai ai ona tatou auauna atu i le Atua ma i isi. E taua tele i tatou i fofoga o le Atua ma i latou o siomia i tatou.

I le isi itu, afai tatou te le faamaoni ia tatou upu ma faatinoga, ua tatou faatiga ia i tatou lava ma e masani ona faatiga ai foi isi. Afai tatou te pepelo, gaoi, le faamaoni, pe faatamala i le tuuina atu o le aofaiga atoa o galuega mo lo tatou totogi, ua leai so tatou faaaloalogia o i tatou lava. Ua tatou le maua le taitaiga a le Agaga Paia. E oo ina tatou iloa ua tatou faatama’iaina sootaga ma tagata o aiga ma uo ma ua le toe talitonuina i tatou e tagata.

O le faamaoni e masani ona manaomia ai le lototele ma le ositaulaga, ae maise lava pe a taumafai isi e faaoso i tatou e tauamiotonu amioga le faamaoni. Afai tatou te maua i tatou lava i na tulaga, e mafai ona tatou manatua o le filemu tumau e oo mai i le faamaoni e sili atu le taua nai lo le fiafia le tumau o le mulimuli i isi.