O Sauniga o le Faaeega Paia ma le Faamauga

I le taimi o le faaeega paia, tatou te osifeagaiga ai e ola i tulafono eseese e lima. Faitau e uiga i nei tulafono i le vaega 27.2 i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (Potutusi o le Talalelei). O faapefea ona e ola i nei tulafono? O le a se mea e mafai ona e faia e te ola atoatoa ai? E faapefea ona faaa’oa’o e Iesu Keriso le ola ai i nei tulafono? Mafaufau loloto pe faapefea e le ola ai i nei tulafono taitasi ona fesoasoani ia te oe e avea atili ai e faapei o Ia.

Ua faamanuiaina i tatou i le ola ai i se taimi o loo fausia ai malumalu i le salafa o le lalolagi. Na aoao mai Elder David A. Bednar: “Ua malamalama lava, o le faasilasilaga o malumalu fou taitasi o se puna o le olioli tele ma se mafuaaga e avatu ai le faafetai i le Alii. Peitai, o lo tatou taulaiga autu e tatau ona tuu i feagaiga ma sauniga ia e mafai ona suia ai o tatou loto ma faalolotoina ai lo tatou tuuto atu i le Faaola ma ia le tau na ona taulai atu i le nofoaga po o le matagofie o le maota.” E faapefea ona e talitonu e mafai e feagaiga ma sauniga o le faaeega paia ona suia lou loto? E faapefea ona ou faailoa atu lo’u tuuto i le Faaola? Mafaufau loloto pe faapefea e le taulai atu i feagaiga ma sauniga o le faaeega paia i lenei auala ona fesoasoani e saunia ai oe mo le faaeaga.

I lana lauga “Why the Covenant Path,” na faatusatusa ai e Elder D. Todd Christofferson le ola ai i le talalelei a Iesu Keriso i le aloese mai “mea sese e le faamalosia” i le tenisi. Faitau e uiga i lenei faatusatusaga i lana savali, ma talanoa po o a “mea sese e le’i faamalosia” tatou te aloese mai ai e ala i le tausia o feagaiga e lima tatou te osia i le taimi o le faaeega paia (tagai i le Tusitaulima Aoao, 27.2). E mafai foi ona e matamata i se vitio o se taaloga tenisi pe taalo tenisi foi e vaai pe faape’ī foliga o mea sese e le’i faamalosia. Ona talanoaina lea o isi faamanuiaga o le tausia o feagaiga ia na faasoa mai e Elder Christofferson i lana savali. E faapefea e nei faamanuiaga ona faamalosia lou manao e savali i le ala o le feagaiga ma maua le meaalofa o le faaeega paia pe tausia feagaiga ua uma ona e osia i le malumalu?

O se vaega o le faaeega paia e aofia ai le ofuina o ofu paia a o tatou osia feagaiga ma maua sauniga. Mafaufau e talanoaina nisi o faataitaiga o isi taimi tatou te ofuina ai ni ofu faapitoa ma pe aisea e taua ai lena ofu i le aafiaga. Ona mafai lea ona e matamata i le vitio “Sacred Temple Clothing” (4:12), lea e faamatala ai le mea e faatusa i ai ofu o le malumalu ma le mafuaaga e ofu ai e tagata ua maua faaeega paia ofu o le malumalu i lalo ifo o o latou lavalava i aso taitasi. Talanoa e uiga i le auala e fesoasoani ai lavalava paia ia i tatou e faailoa atu ai lagona o le tuuto i le Atua ma fesoasoani ia i tatou e faalatalata atili atu ai ia te Ia. E mafai foi ona e toe iloiloina le lauga a Sister J. Anette Dennis “Tuu Outou i le Alii o Iesu Keriso” e aoao atili ai e uiga i le ofusa o le malumalu. Pe mafai foi ona outou suesue faatasi i le itulau “Malumalu” i le ChurchofJesusChrist.org e sue ai nisi punaoa aoga e uiga i malumalu, e aofia ai punaoa e faaali atu ia te oe i totonu o le maota o le Alii. E mafai faapefea ona e faaaogaina nei punaoa e fesoasoani ai i isi atonu e i ai ni fesili e uiga i le malumalu ma lavalava o le malumalu?

Mataupu Faavae ma Feagaiga 97:8; Aperaamo 3:25

Dallin H. Oaks, “O Feagaiga ma Tiutetauave,” Liahona, Me 2020, 93–96

Taiala faaopoopo e faatatau i le suesueina o le talalelei Usiusitai, Taulaga, Mama, Faapaiaina

“About the Temple Endowment,” Potutusi o le Talalelei

O Autu o le Talafaasolopito o le Ekalesia, “Temple Endowment,” Potutusi o le Talalelei

“O Le a Tatou Faamaonia ai i Latou,” mataupu 37 i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tulaga o le Upumoni, 1815–1846 (2018), 453–55

Ina ua tuuina atu e Iesu Keriso i le Aposetolo o Peteru “ki o le malo o le lagi,” sa Ia tuuina atu ia te ia le mana o faamauga—le mana e tuuina atu ai faamanuiaga i le lalolagi o le a faaauau pea i le lagi (tagai Mataio 16:19). Faitau le Mataupu Faavae ma Feagaiga 110:13–16; 132:7, 45–46 e aoao ai e uiga i le auala na toefuatai mai ai nei ki i le Perofeta o Iosefa Samita i aso e gata ai. O nei ki ua umia nei e lo tatou perofeta o i ai nei, ma ua tuufaatasia ai aiga mo le faavavau. Ae o le mana o faamauga “atonu e foliga mai i nisi o se aoaoga faavae e matua lototoa lava” (Mataupu Faavae ma Feagaiga 128:9). Aiseā e foliga mai ai faapena? E faapefea ona aumaia ia te oe le faamoemoe e iloa ai o sootaga faaleaiga ua faamauina i le lalolagi ua faamauina foi i le lagi?

Na aoao mai Peresitene Russell M. Nelson: “O se feagaiga o le faaipoipoga e faia i le malumalu e fesootai tonu lava ma le feagaiga faa-Aperaamo. I totonu o le malumalu e folasia atu ai i se ulugalii faamanuiaga uma ua faapolopoloina mo fanau faamaoni a Aperaamo, Isaako, ma Iakopo.” Faitau e uiga i nisi o nei faamanuiaga i le Mataupu Faavae ma Feagaiga 76:50–60; 132:19. E mafai faapefea ona e “tonu ma faamaoni” (Mataupu Faavae ma Feagaiga 76:53) i au feagaiga ma le Atua ina ia mafai ai e oe ma e pele ia te oe ona maua Ana folafolaga silisili? Tusi i lalo soo se uunaiga e te maua, ona faatino lea.

O le sauniga o le faamauga e maua i se fata faitaulaga paia i le malumalu. O le a se mea e te manatu o loo fai le fata faitaulaga ma ona faatusa? O nei mau e mafai ona taialaina ai ou mafaufauga: Kenese 8:20; 26:23–25; 1 Nifae 2:7; Mose 5:5–9. O le a se mea ua fautuaina mai e le faatusa o le fata faitaulaga ia te oe e uiga i le sauniga o le faamauga ma sootaga faaleaiga?

O le tulaga masani, e faaaoga ai faamaufaailoga mo pepa faaletulafono, tipiloma, po o tusi taua e faaalia ai e moni i latou. Atonu e mafai ona e vaai i ata o nisi o nei ituaiga faamaufaailoga eseese pe fai foi sau lava faamaufaailoga. Ona toe iloilo lea o le lauga “O Le Mana o Faamauga” saunia e Elder D. Todd Christofferson. O a ni eseesega i le va o se faamaufaailoga faalelalolagi ma le mana faamau o le Atua? O a faamanuiaga o loo maua e ala i Lona mana o faamauga? Afai ua e mauaina le sauniga o le faamauga i le maota o le Alii mo oe lava ia po o se tuaa, mafaufau e faasoa atu lou aafiaga. Na faapefea ona e iloaina e silafia e le Alii lau sauniga o le faamauga o se “mea e tatau ai” pe aoga?

O nisi taimi, o tulaga faigata pe le lelei faaleaiga e faigata ai ona mananao e faatasi ma o tatou aiga mo le faavavau. Pe atonu foi e lei faamamaluina e se tagata o le aiga ana feagaiga o le faaipoipoga, o lea tatou te masalosalo ai pe o le a tumau pea lo tatou aiga e faavavau. E uiga i tulaga faapea, na aoao mai Elder David A. Bednar: “Ia te outou na lagona le lototiga ona o se tatalaga o se faaipoipoga i lou aiga pe sa e lagonaina le tiga i le solia o le faatuatuaina, faamolemole ia manatua e toe amata foi ia te oe! Atonu e tasi le sooga i le filifili o au augatupulaga ua motusia, ae o isi sooga amiotonu ma mea o totoe o le filifili e le faaitiitia le taua e faavavau. E mafai ona e faaopoopo i ai le malosi i lau filifili ma e masalo e oo lava i le fesoasoani e toefuatai mai sooga ua motusia. O lena galuega o le a faataunuuina taitasi.” Faitau faatasi upu a Elder Bednar ona fai lea o se filifili pepa. Ona mafai lea ona e tusia i luga o se tasi o sooga se mea o le a e faia e avea ai o se sooga malosi i lou aiga e ala i le mana faamau o le Faaola.

(Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93–96

Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 46-49

“About the Temple Endowment,” Potutusi o le Talalelei

O Autu o le Talafaasolopito o le Ekalesia, “Faamauga, Potutusi o le Talalelei