Ositaulaga

O le auala tatou te faaalia ai le mea e sili ona taua ia i tatou

Mafaufau i se taimi na e lafoaia ai se mea mo le manuia o se isi tagata. Atonu sa le o se mea faigofie lenei e fai, ae o le faia o lena osigataulaga, na e faaalia ai sa e naunau e faamuamua manaoga o lena tagata nai lo oe lava.

E faapena foi, pe a tatou ositaulagaina se mea mo le Atua, ua tatou faaalia lo tatou alolofa ia te Ia ma ua naunau e faamuamua o Ia i o tatou olaga. O le faailoaga aupito maualuga o a tatou osigataulaga e oo mai pe a tatou faia le finagalo o le Atua nai lo o tatou lava loto. O a tatou osigataulaga e mafai ona atagia ai lo tatou alofa ma le agaga faafetai mo Iesu Keriso, o lē—i le silisili o galuega uma o le alofa—na ositaulagaina Lona soifua ina ia mafai ona tatou toe foi atu e nonofo faatasi ma le Tama Faalelagi.

O Le A Le Ositaulaga?

O le ositaulaga o le faatinoga lea o le lafoaia o se mea se tasi mo le manuia o se isi mea. Ua faia e tagata o le Atua ni osigataulaga ia te Ia talu mai aso anamua. O le asō tatou te ositaulaga ai e ala i le tuuina atu o o tatou loto i le Atua ma salamo i a tatou agasala ma se loto momomo ma se agaga salamo. Tatou te ositaulagaina foi o tatou taimi ma taleni e lagolago ai le galuega a le Atua o le faaolataga ma le faaeaga (tagai i le Mataio 6:33). E ala i le ositaulaga, tatou te faaalia ai lo tatou naunau e faamuamua le Atua i o tatou olaga (tagai i le Mataio 19:29).

Vaaiga aoao i le autu: Ositaulaga

Taiala e faatatau i le suesueina o le talalelei: Usiusitai, Sefuluai, Faapaiaga, Auauna Atu i Valaauga o le Ekalesia

Vaega 1

Na Tuuina Mai e le Atua le Tulafono o le Ositaulaga o se Faamanatu o le Taulaga a Keriso

Sa ola fanau a le Atua i le tulafono o le ositaulaga anamua e ala i le ofoina atu o taulaga i manu e fai ma faamanatu o le a togiolaina i latou e le Tamai Mamoe a le Atua mai le Pa’ū (tagai i le Kolose 1:13–18; Mose 5:6–7). Ina ua uma ona ositaulagaina ma le naunautai e Iesu Keriso Lona soifua i luga o le satauro, sa le toe manaomia loa taulaga i manu (tagai i le Luka 23:46; 3 Nifae 9:19; 4 Nifae 1:12). O le taulaga a le Faaola o le faatinoga aupito sili lea ona maoae o le alofa ma na aumaia ai le togiolaina ma le faaolataga o tagata (tagai i le Isaia 53:7; 2 Nifae 2:7).

Ina ia aoao atili e uiga i le taulaga a le Faaola, tagai i le taiala suesue “O Le Togiola a Iesu Keriso”.

Mea e mafaufau i ai

Sa tofotofoina le faatuatua o Aperaamo ina ua poloaiina o ia e le Atua e ositaulaga lona atalii o Isaako. Mafaufau e faitau le Kenese 22; Eperu 11:17–19; ma le Iakopo 4:5, e uiga i le taulaga na poloaiina ai Aperaamo e le Atua e fai. A o e faia, mafaufau i le taulaga na faia e le Atua i le ofoina mai o Lona Alo e Toatasi na Fanaua, o Iesu Keriso, ma le taulaga na faia e le Faaola i le ofoina mai o Lona soifua. O le a se mea ua aoao ai oe e le Agaga e uiga i taulaga a le Tama ma le Faaola a o e faitau i nei fuaitau?

Gaoioiga mo le aoao faatasi ma isi

Ina ua faataunuuina e Iesu Keriso Lana Togiola, “sa suia e le sauniga o le faamanatuga le sauniga o le taulaga.” Mafaufau e usu viiga o le faamanatuga e pei o le “Upon the Cross of Calvary” po o le “Maeu le Poto ma le Alofa.” E mafai foi ona e faitauina mau e fesootai ma viiga taitasi ma talanoaina pe faapefea ona e saunia mo le faamanatuga i vaiaso taitasi. E mafai faapefea e le mafaufau i le faamanatuga o se avanoa e ositaulaga ai se mea i le Alii ona atili anoa ai lau tapuaiga?

Aoao atili

Levitiko 1:2–3, 10; Alema 34:8–14; Mataupu Faavae o le Faatuatua 1:3
Jeffrey R. Holland, “Faauta i le Tamai Mamoe a le Atua,” Liahona, Me 2019, 44–46
Tracy Y. Browning, “Vaaia Atili o Iesu Keriso i o tatou Olaga,” Liahona, Nov. 2022, 13–15

Vaega 2

Ua Talosagaina i Tatou e le Atua mo le Ositaulagaina o se Loto Momomo ma se Agaga Salamo

O aso nei, o loo tatou ola ai pea i le tulafono o le ositaulaga e ala i le ofoina atu i le Atua o se loto momomo ma se agaga salamo (tagai i le 3 Nifae 9:19–20; Mataupu Faavae ma Feagaiga 59:8). E faapefea ona tatou ofoina atu lenei ituaiga o taulaga? E ala i le talitonu ia Keriso, faamaualaloina o i tatou lava, salamo moni i a tatou agasala, ma o mai ia te Ia (tagai i le 3 Nifae 12:19; Moronae 6:1–3; Mataupu Faavae ma Feagaiga 20:37). O le faia o nei ituaiga o osigataulaga e faaalia ai lo tatou alofa mo le Atua ma tatou te naunau e faia mea ua Ia poloai mai ai. A o tatou tuuina atu o tatou agaga atoa i le Atua ma tumau e oo i le iuga, e mafai ona faaolaina i tatou ma maua le ola e faavavau (tagai i le Ominae 1:26).

Mea e mafaufau i ai

O se mea masani le mafaufau pe o matauina ma talia e le Alii ia osigataulaga e te faia e mulimuli ai ia te Ia. Mafaufau loloto i fetalaiga a le Alii ia Iosefa Samita i le Mataupu Faavae ma Feagaiga 132:49–50. O a faamanuiaga na folafola atu ia Iosefa ona o ana osigataulaga? Ua faapefea ona faamanuiaina oe ona o osigataulaga ua e faia mo le Atua? Atonu e te tusia i lalo se lisi o faamanuiaga ua e mauaina ona toe mafaufau lea i ai i le vaiaso atoa.
O se tasi o auala tatou te faaalia ai lo tatou alofa mo le Atua o le faia lea o osigataulaga e o mai ai ia te Ia. I lana lauga “O Tatou Loto Uma,” na faamalamalama mai ai e Elder Dieter F. Uchtdorf e faapea, o a tatou osigataulaga e mafai ona faigofie e pei o le lafoaia o o tatou manaoga patino ma mea e fiafia i ai ina ia mulimuli atoatoa atili ai i le Faaola. Mafaufau e faitau le lauga a Elder Uchtdorf ma mafaufau loloto pe faapefea ona e tuuina atu lou loto atoa ia Iesu Keriso. O le a se mea e mafai ona e ositaulagaina ina ia mulimuli lelei ai i le Faaola nai lo le taimi muamua?

Gaoioiga mo le aoao faatasi ma isi

I le vitio “A Broken Heart, Contrite Spirit, and Godly Sorrow” (3:58), na faamalamalama mai ai e Elder Neil L. Andersen, o le tuuina atu i le Alii o se loto momomo ma se agaga salamo o lona uiga “o le avea atili e pei o se tamaitiiti.” E mafai ona e matamata i le vitio lenei ona talanoaina lea o uiga o loo i ai i tamaiti e tatau ona tatou sailia i le ositaulagaina o o tatou loto i le Atua. E mafai foi ona e faasoa atu ni aafiaga na e maua i tamaiti e faataitaia ai mea e mafai ona tatou aoaoina mai o latou uiga.

Aoao atili

Salamo 51:16–17; Ioane 6:38; 2 Nifae 2:6–7; 4:32
Neill F. Marriott, “Gauai Atu o Tatou Loto i le Atua,” Liahona, Nov. 2015, 30–32

Vaega 3

E Ala i Osigataulaga i Aso Taitasi, e Mafai ai Ona Tatou Paia e Pei o Iesu Keriso

O le ositaulaga mo le Atua e mafai ona fesoasoani tatou te maua ai Lona mana, lea e mafai ai ona tatou paia. E ala i le ositaulaga mo le Alii, tatou te faaali atu ai lo tatou alofa mo Ia ma isi. Atonu tatou te manatu o le ositaulaga e mamafa pe faigata ona fai, ae o le tele lava o lona uiga o le “ola i aso taitasi o se soo moni o Keriso.” A o tatou ositaulaga i aso taitasi e tausia a tatou feagaiga ma mulimuli ia Iesu Keriso, o loo tatou fesoasoani e faame’i i luma le galuega a le Atua.

Mea e mafaufau i ai

O se tasi o auala e mafai ona tatou ositaulaga ai i aso uma o le tuuina atu lea o o tatou taimi i le Alii. O lenei mea e mafai ona aofia ai mea e pei o le faia o o tatou valaauga po o auaunaga i le tasi ma le isi. Na aoao mai Peresitene Dallin H. Oaks, “O o tatou olaga o auaunaga ma le ositaulaga o faaaliga aupito talafeagai ia o la tatou tautinoga e auauna atu i le Matai ma o tatou uso a tagata.” E faapefea ona e ositaulagaina e le aunoa lou taimi i le Alii? Mafaufau loloto pe na faapefea ona fesoasoani le faia o lena mea ia te oe e te latalata atili atu ai ia Keriso ma paia atili ai.
O nisi taimi o osigataulaga i aso taitasi tatou te faia o ni soo o Keriso e mafai ona pei e itiiti ma faaletaua ia i tatou. Ae e taua nei osigataulaga i le Alii. Faitau le Mataupu Faavae ma Feagaiga 64:33 e aoao ai pe faapefea ona Ia silasila i a tatou taumafaiga, e tusa lava po o le a le itiiti. E faapefea ona tuuina atu e lenei fuaiupu ia te oe le lototele e faaauau ai pea ona faia ni osigataulaga laiti, i aso taitasi mo le Alii?

Gaoioiga mo le aoao faatasi ma isi

I le vitio “O Se Osigataulaga o le Taimi” (2:53), na aoao mai ai Peresitene Russell M. Nelson, “E le mafai ona faaatoatoaina o tatou tuaa e aunoa ma i tatou, ma e le mafai ona faaatoatoaina i tatou e aunoa ma i latou.” O le faia e le aunoa o galuega o le malumalu ma talafaasolopito o aiga, tatou te paia atili ai, e pei o Iesu Keriso. Matamata faatasi le vitio “O Se Osigataulaga o le Taimi”, ona faasoa atu lea pe na faapefea ona faamanuiaina oe i le ositaulagaina o lou taimi e fai soo ai galuega o le malumalu ma talafaasolopito o aiga. O le a se mea ua e aoaoina mai aafiaga o isi ua musuia ai oe e faaauau pe amata ona ositaulagaina lou taimi i lenei auala?
E tele auala atonu o loo e ositaulagaina ai se mea mo le Alii ma mo isi e aunoa ma le iloaina. A e tausia au feagaiga, auauna atu i se uo po o se tagata o le aiga, totogi lau sefuluai, pe faasoa atu au taleni, ua e ositaulaga mo le Atua ma mo Ana fanau. Fai se lisi o auala patino e te ositaulaga ai i aso taitasi ina ia avea ai ma soo o Keriso. Ona mafai lea ona e talanoa e uiga i le auala e aafia ai lou avea ma soo i le mafaufau i nei mea o ni osigataulaga ma fesoasoani ia te oe e te latalata atili atu ai ia te Ia.

Aoao atili

1 Nofoaiga a Tupu 16:29; Luka 18:22; Roma 12:1; Mataupu Faavae ma Feagaiga 138:12–13
Jeffrey R. Holland, “Valaauina e Auauna Atu,” Liahona, Nov. 2002, 36–38