"Ola Mama," Autu ma Fesili (2025)
Vaaiga Aoao
Ola Mama
E pei lava o poloaiga uma a le Atua, o le tulafono o le ola mama o se faamanuiaga mai le Atua e fesoasoani ia i tatou ia maua le filemu ma le olioli. O le ola ai i lenei tulafono e mafai foi ona fesoasoani ia i tatou e tumau ai i le saogalemu ma le manuia faalelagona ma faaletino. Ma e fesoasoani tatou te saunia ai e maua faamanuiaga silisili a le Atua, e aofia ai le ola e faavavau.
O le ola mama o lona uiga o le le faia o ni sootaga feusuai i fafo atu o se faaipoipoga faaletulafono i le va o se alii ma se tamaitai. O i latou o e mama e tauivi foi ia i ai ni mafaufauga, upu, ma amioga talafeagai faalefeusuaiga. O le ola ai i lenei tulafono e aofia ai le faamaoni atoatoa i lou toalua i totonu o le faaipoipoga, i le faaletino ma faalelagona.
O Se Meaalofa ma se Poloaiga mai le Atua
O le militino faaletino i le va o le tane ma le ava e mafai ona maua ai le olioli, matagofie, ma paia. O se meaalofa mai le Atua mo le foafoaina o fanau ma mo le faaalia o le alofa i totonu o le faaipoipoga. Pe a lava le alofa o tagata i le tasi ma le isi e tausia ai le tulafono o le legavia, e mafai ona faateleina lo latou alolofa, faatuatuaina, ma le tuuto, ma iu ai i le fiafia sili atu ma le lotogatasi.
O le ola mama o se poloaiga mai le Atua, ma o le usiusitai i lena tulafono e fesoasoani tatou te saunia ai e ulu atu i le maota o le Alii. I totonu o le malumalu, ua valaaulia ai i tatou ina ia tuuto atoatoa atu e ala i le osifeagaiga e ola i le tulafono o le ola mama.
I le lalolagi i aso nei, ua taitaia ai e Satani le toatele o tagata e talitonu o le militino faalefeusuaiga i fafo atu o le faaipoipoga e taliaina. Peitai, o le solia o le tulafono o le ola mama e matuia tele. O i latou o e le amanaiaina le tulafono o le ola mama ua faaaogaina sese le mana paia ua tuuina mai e le Atua e foafoa ai le ola.
Ua tuuina mai e lo tatou Tama Faalelagi ia i tatou le tulafono o le ola mama mo lo tatou puipuiga faaleagaga ma faaletino. O le usiusitai i lenei tulafono e taua i le filemu ma le fiafia faaletagata lava ia. O i latou o e tausia i latou lava ia mama mai feusuaiga o le a sili atu foi ona nofouta i le taitaiga, malosiaga, faamafanafanaga ma le puipuiga a le Agaga Paia.
Malosi e Tausi ai le Tulafono o le Legavia
Po o le a lava le malosi o o tatou faaosoosoga, o le a fesoasoani le Alii ia i tatou e tetee atu i ai pe afai tatou te filifili e tausia a tatou feagaiga ma Ia. Na aoao mai le Aposetolo o Paulo, “E faamaoni le Atua, o le na te le tuuina atu outou i le tofotofoga e sili i mea ua outou lavatia; ae o le a faia foi e le faaosoosoga se ala e sao ai, ina ia mafai ona outou onosaia.”
E faatuatuaina i tatou e le Alii e faia faaiuga o le a faamamalu ai le meaalofa o o tatou tino ma tino o isi, ma e faamanuiaina moni lava i tatou a o tatou faia filifiliga e faavae i lena faatuatuaga. O le a taiala ma faamalosia i tatou e le Agaga e fesoasoani ia i tatou e tausia lenei tulafono.
Agasala Faalefeusuaiga
Ua lapatai mai le Alii ma Ana perofeta e uiga i feusuaiga le mama. Na aoao mai le perofeta o Alema e uiga i le matuia o agasala faalefeusuaiga. O sootaga feusuai uma i fafo atu o le faaipoipoga i le va o se alii ma se tamaitai e solia ai le tulafono o le ola mama ma e lamatia ai faaletino ma faaleagaga mo i latou o e faia.
O se tasi o soliga o le tulafono o le ola mama o le mulilua, o se faiga o feusuaiga i le va o se tagata ua faaipoipoina ma se tasi e ese mai i lona toalua. O le mulilua o se tasi lea o agasala na lapatai faasaga i ai i Tulafono e Sefulu.
Na aoao mai foi le Aposetolo o Paulo e faapea “o le finagalo lea o le Atua” ia tatou “alo ese ai mai le faitaaga,” lea, i se tulaga faale-talalelei, o le aafia i amioga feusuai i fafo atu o le faaipoipoga i le va o se alii ma se tamaitai.
O le faaipoipoga i le itupa e tasi faapea foi soo se sootaga feusuai i le va o na itupa e tasi e tetee foi i poloaiga a le Atua.
Faamagaloga mo le ua Salamo
E ui ina matuia tele agasala o feusuaiga, ae o le meaalofa o le salamo e moni. Ona e alofa le Alii ia i tatou, o le a Ia faamagalo atoatoa i tatou pe a tatou filifili e salamo ma liliu atu ia te Ia. O le salamo e manaomia ai le onosai, faapalepale, ma se suiga o le loto, ae e aoga ai le taumafaiga.
Pe a solia e tagata o le Ekalesia ni agasala matuia, o lo latou salamo e aofia ai foi le ta’uta’u atu i o latou epikopo po o le peresitene o le siteki. Afai e te le o mautinoa pe tatau ona e feiloai ma lou epikopo po o le peresitene o le siteki, e mafai ona e tatalo mo se taitaiga. E mafai foi ona e talanoa atu i se matua po o se taitai faatuatuaina.
Pe a tatou ta’uta’u atu i lo tatou taitai o le Ekalesia, “ona mafai lea ona ia faaaoga ki o le talalelei o le salamo e fai mo [tatou] sui (tagai Mataupu Faavae ma Feagaiga 13:1; 84:26–27; 107:18, 20). E fesoasoani lenei mea ia i [tatou] e faamalolo ma toe foi atu ai i le ala o le talalelei e ala i le mana o le Togiola a le Faaola.” O le ta’uta’u atu i lou taitai e mafai ona fesoasoani ia te oe e faamamaina ai lau avega ina ia mafai ona e sailia le fesoasoani a le Alii e suia ma faamalolo ma iloa le auala e agai ai i luma.
O le faanoanoa o le agasala e mafai ona suia i le filemu matagofie ma le olioli o le faamagaloga. Ina ia aoao atili e uiga i le auala e salamo ai, tagai i le autu o le talalelei “Salamo.”
E sese le faia o agasala faalefeusuaiga i le manatu faapea o le a na ona tatou salamo mulimuli ane. O lenei uiga faaalia e faaalia ai le le migao mo le Alii ma feagaiga tatou te osia ma Ia. Tatou te faaalia lo tatou alolofa mo le Atua, i tatou lava, ma isi pe a tatou faia le mea sili tatou te mafaia e aua lava nei faia se agasala faalefeusuaiga i le taimi muamua.
O tagata e aafia fua i sauaga faalefeusuaiga e le nafa i latou ma le mea na tupu ia i latou. O i latou ua sauaina i feusuaiga e lei agasala pe solia le tulafono o le ola mama, ma e le manaomia ona latou salamo i lena sauaga faatautala.