Ola Mama

Tulafono a le Atua o le mama faalefeusuaiga

O le ola mama o le tulafono a le Atua ia tausia le paia o feusuaiga vavalalata. O le taumafai ia mama i o tatou mafaufauga, upu, ma amioga e aumaia ai le tele o faamanuiaga—faaleagaga, faalelagona, ma le faaletino. O a tatou taumafaiga ia tumau i le mama i feusuaiga, ma ia salamo ma saili le faamagaloga a le Alii pe afai sa tatou le mama, o le a aumaia ia i tatou le filemu ma le olioli i lenei olaga ma saunia ai i tatou e toe nonofo faatasi ma le Atua pe a tatou oti.

I le tele o vaega o le lalolagi, ua ta’u faatauvaaina ai le ola mama ma o le filifili e faia feusuaiga a o le’i pe i fafo atu o le faaipoipoga o se mea masani. Ae na tuuina mai e le Atua ia i tatou le tulafono o le ola mama mo le mafuaaga lava lea e tasi ua Ia tuuina mai ai ia i tatou poloaiga uma: E alofa o Ia ia i tatou, ma ua Ia silafia o le ola ai i poloaiga e fesoasoani e tausia ai i tatou ia saogalemu ma taitai atu ai i le fiafia moni ma tumau.

O le a le Ola Mama?

O le ola mama o le mama lea i feusuaiga i o tatou mafaufauga, upu, ma faatinoga. O le ola mama o lona uiga o le le faia o soo se sootaga feusuai a o lei faaipoipo. O lona uiga foi o le faamaoni atoatoa i le tane po o le avā i le taimi o le faaipoipoga—faaletino ma faalelagona. O le ola mama e aofia ai le aloese mai ponokalafi po o isi anotusi ua faamoemoe e faaosofia ai lagona faalefeusuaiga. O le ola mama o se poloaiga mai le Atua, ma o le usiusitai i lena tulafono e taua e fesoasoani ia i tatou e saunia ai e ulufale atu i le maota o le Alii. I totonu o le malumalu, ua valaauliaina i tatou ia tautino atoatoa atili e ala i feagaiga e ola i le tulafono o le ola mama.

Vaaiga aoao i le autu: Ola Mama

Taiala e faatatau i le suesueina o le talalelei: Faitalia, Olaga Faaletino, Ponokalafi, Salamo

Vaega 1

O Le Ola Mama o se Vaega Taua o le Fuafuaga a le Atua

O le tulafono o le ola mama o se vaega taua o le fuafuaga a le Atua mo lo tatou faaolataga ma le faaeaga. E ala i feusuaiga vavalalata e mafai ai ona avea i tatou ma foafoa faatasi ma le Atua ma aumai Ana fanau i le lalolagi. O le ola mama e faaalia ai le faaaloalo mo le mana o le Foafoaga a le Atua, lea ua Ia faatagaina i tatou e faaaoga. E faaalia ai foi le lotofaafetai mo tino ua tuuina mai e le Atua ia i tatou.

O sootaga faaleaiga e fausia pe a faaipoipo se alii ma se tamaitai ma pe a fananau mai a laua fanau e taua e faavavau i lo tatou Tama Faalelagi. O se tasi lenei o mafuaaga ua Ia poloaiina ai, e na o le va lava o se alii ma se tamaitai ua faaipoipoina e i ai sootaga faalefeusuaiga. E le gata i lea, o le faigapaaga i le va o se tane ma se avā e mafai ona fesoasoani e faalauiloa ai se siosiomaga lelei mo fanau e ola a’e ai ma e mafai ona fatuina ai se faavae malosi mo se aiga e faavavau.

Mea e mafaufau i ai

Mafaufau pe aisea e avea ai le ola mama ma se vaega taua o le ata o le faaolataga a le Atua. Sa aoao mai e Peresitene Dallin H. Oaks: “O le mana e foafoa ai le ola faaletino o le mana aupito sili lea ona faaeaina na tuuina mai e le Atua i ana fanau.” Ona mafaufau lea pe faapefea e le tausia o ou mafaufauga ia mama mai feusuaiga i tulaga eseese ona fesoasoani ia te oe e pulea ai lenei mana ma tumau ai i le malosi faaleagaga. E faapefea e le taumafai ia mama ona uunaia ou mafaufauga e uiga i isi tagata? E faapefea ona aafia ai faafiafiaga ma ala o faasalalauga e te filifili e faaaoga? E faapefea ona aafia ai ou sootaga faaleaiga? Atonu e te filifilia se viiga po o se pese lotu po o se mau e sili ona e fiafia i ai e mafai ona e usuina pe toe fai i lou mafaufau pe a faaosoosoina oe e ni mafaufauga po o ni lagona le lelei faalefeusuaiga. E mafai ona e faia se sini e tauloto ai lena pese po o le fuaitau ma faamanatu soo.
Mafaufau pe aisea e taua ai le tulafono o le ola mama ia te oe po o le mafuaaga foi e mafai ai. Tusi le fuaiupu “Ou te filifili e usitai i le tulafono o le ola mama ona …” Ona vaavaai lea mo auala e mafai ona e taliina ai lenei fuaiupu e ala i le faitauina o le vaega “E Paia Lou Tino” i le Mo Le Malosi o le Autalavou: O Se Taiala mo le Faia o Filifiliga. Ona mafai lea ona e mafaufau pe faapefea ona e tali atu i se tasi na fesili atu ia te oe pe aisea e taua ai le ola mama ia te oe.
O le ola mama e masani ona faasino i ai tusitusiga paia o le “amiomama.” Ua fetalai mai le Alii o le amiomama e tatau ona “teuteuina ai [o tatou] mafaufauga e le aunoa,” ona “malosi ai lea o lo tatou talitonuga” ma “o le a faatumulia le mataupu faavae o le perisitua i [o tatou agaga ma] le Agaga Paia o le a avea ma [tatou] soa tumau” (Mataupu Faavae ma Feagaiga 121:45–46). O le a le uiga o le upu teuteuina ii? Na faapefea ona e vaaia le ola mama ma le amiomama e tuuina atu ai i tagata le talitonuga ma le malosi i o latou olaga? Na faapefea e le ola ai i le tulafono o le ola mama ona faateleina lau molimau i le talalelei?

Gaoioiga mo le aoao faatasi ma isi

Toe iloilo faatasi le mataupu faavae o le faatuatua lona sefulutolu. Fai mai lenei fuaiupu matou te talitonu i le mama, ma e valaaulia ai i tatou e saili mo mea e mama ma matagofie. E mafai faapefea ona tatou iloa pe o i ai se mea e mama ma matagofie? A uma ona faasoa atu manatu, e mafai ona e talanoa e uiga i mea i lou olaga e fetaui ma lena faamatalaga ma le auala e fesoasoani ai ia te oe ia mama. Ona mafai lea ona outou faia faatasi se sini o le a fesoasoani ia te outou e auai ai i na o talanoaga, tulaga, ma ala o faasalalauga ma faafiafiaga e mama ma matagofie. Talanoa e uiga i auala e mafai ona outou fesoasoani ai i le tasi ma le isi e mulimuli i la outou sini. A uma, e mafai ona e talanoaina mea na e aoaoina mai le aafiaga.
Ua aoao mai leMo Le Malosi o le Autalavou: O se Taiala mo le Faia o Filifiliga : “Ona o lagona faalefeusuaiga e matua paia ma mamana tele, ua tuuina mai ai e le Atua ia te oe Lana tulafono o le ola mama e saunia ai oe e faaaoga nei lagona e pei ona Ia faamoemoeina. … E toatele tagata i le lalolagi e le amanaiaina pe tauemu foi i le tulafono a le Atua, ae ua valaaulia i tatou e le Alii ia avea ma Ona soo ma ola i se tulaga faatonuina e maualuga atu nai lo le lalolagi.” O a savali ua tuuina mai e le Alii ia i tatou e uiga i feusuaiga ma le ola mama? (E mafai ona e saili le “Ola Mama” i le Taiala i Tusitusiga Paia po o le vaaiga aoao o le “Ola Mama” i Autu ma Fesili mo ni manatu.) O a savali e masani ona tuuina mai e le lalolagi ia i tatou e uiga i nei autu? Talanoaina mea e mafai ona e faia pe a e fetaiai ma savali sese e uiga i le ola mama po o faaosoosoga ia le mama.

Aoao atili

1 Korinito 6:18–20; 1 Timoteo 4:12; 2 Peteru 1:2–8; 1 Nifae 10:21; Mataupu Faavae ma Feagaiga 4:4–6
“Ola le Tulafono o le Ola Mama,” i le mataupu 3 o le Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023), 83
“We Believe in Being Chaste” (vitio), Potutusi o le Talalelei

Vaega 2

O le Taumafai ia Ola Mamā e Mafai Ona Aumaia ai Faamanuiaga Ofoofogia

E tele auala e faamanuiaina ai i tatou a o tatou taumafai e ola i le tulafono o le ola mama, e aofia ai le aloese mai ponokalafi. Pe a tatou tausia le poloaiga a le Atua ia mama, ua tatou valaaulia le mafutaga a le Agaga Paia ma aumaia le mana faaleagaga faateleina ma le malosi i o tatou olaga. O le mama e fesoasoani ia i tatou ia paia ma malolosi faaleagaga, e pei o Iesu Keriso. O lenei sauniuniga faaleagaga e mafai ai ona tatou avea atili e faapei o lo tatou Tama Faalelagi ma agai i luma i le ala e toe foi atu ai ia te Ia. O le ola ai i se olaga mama e mafai ai foi ona avea i tatou ma faataitaiga i isi ma tutu agavaa i luma o le Alii.

Na aoao mai Elder David A. Bednar, “O le ola mama ma le amiomama i le taimi nei, ma sa i ai lava, ma o le a avea pea lava ma mea e ‘silisili ona pele ma taua i lo mea uma’ (Moronae 9:9).” O se vaega o le mea e matua taua ai le ola mama o le filemu ma le olioli lea e mafai ona aumaia ia i tatou o ni tagata taitoatasi ma i a tatou sootaga faaleaiga. O le ola ai i lenei tulafono e mafai ona fesoasoani ia i tatou ia maua le alofa sili atu, faatuatuaina, ma le lotogatasi i la tatou faaipoipoga. E mafai foi ona tatou aloese mai le tele o le lototiga i le lalolagi e ala i le mama a o lei faaipoipo ma faamaoni atoatoa i a tatou toalua i le taimi o le faaipoipoga. Ma e mafai ona tatou aloese mai le tele o isi taunuuga faaleagaga, faalelagona, ma faaletino o le solia o le tulafono o le ola mama a o tatou usitai i lenei poloaiga i o tatou olaga atoa.

O agasala faalefeusuaiga e aumaia ai se avega mamafa, ae o le faamagaloga mai le Alii e avanoa mo i latou uma o e o le a salamo faamaoni.

Mea e mafaufau i ai

Faitau le tala i le avā a Potifara ma Iosefa i le Kenese 39:7–23. O a ni mea ua e aoaoina e uiga ia Iosefa mai lenei tala? O le a se mea ua e aoaoina mai lana faataitaiga o le saunia faaleagaga ina ia mafai ona tumau lona ola mama e tusa lava pe feagai ma faaosoosoga? Na faapefea ona faamanuiaina o ia ona o lana filifiliga e usitai i le tulafono o le ola mama? (Tagai, mo se faataitaiga, Kenese 41:37–45; 45:1–28.) Mafaufau pe faapefea ona fesoasoani lana faataitaiga ia te oe e maua ai le lototele e tumau ai i le malosi pe a faaosoosoina oe e fai se mea e le mama.
E mafai ona e faitau i le tala i le alii talavou i le savali a Peresitene Jeffrey R. Holland “Ia Teuteuina e le Aunoa Ou Mafaufauga i le Mama.” O le a se mea na aoaoina e le alii talavou mai lana aafiaga? Na faapefea ona suia ai lona olaga? Mafaufau i mea e mafai ona e faia ina ia maua ai le lototele e tumau ai i le agavaa pe a faaosoosoina oe e fai se mea le mama pe le paia. E mafai faapefea ona faamanuiaina oe pe a e tumau i le agavaa? Tusi i lalo lagona uunai e te mauaina.
E manao Satani ia tatou talitonu a tatou solia le tulafono o le ola mama e ala i le faia o se agasala faalefeusuaiga po o le matamata i ponokalafi, ua tatou le toe agavaa mo le alofa o le Atua. Ae e matuā le moni lena mea. Faitau le Luka 15:11–32, pe matamata i le vitio Tusi Paia “The Prodigal Son” (5:36). E faapefea ona faaalia i lenei tala le alofa o le Atua mo i tatou, e tusa lava pe tatou te faia ni agasala matuia? Ona faitau lea o le Isaia 43:25, ma mafaufau i le faamoemoe o loo tuuina mai e lenei fuaiupu. Afai e i ai sau agasala tau amio e tatau ona e salamo ai, fai se taimi faatulagaina e talanoa ai i lou epikopo po o le peresitene o le paranesi ma amata le faagasologa o le salamo, pe tatalo mo le manao e faia lena mea. O le salamo ma le faalagolago i le Faaola ma Lona mana togiola o le a aumaia ai le faamalologa ma le faamoemoe ma o le a fesoasoani ia te oe e te latalata atili atu ai ia te Ia.

Gaoioiga mo le aoao faatasi ma isi

Sa faamanatu atu e Peresitene Russell M. Nelson i tagata o le Ekalesia e faapea, e oo mai faamanuiaga silisili pe a tatou filifili e “mafaufau faaselesitila,” e aofia ai le tumau i le ola mama. Na ia faapea mai: “O le mafaufau faaselesitila o le a … fesoasoani foi ia te oe ia usiusitai i le tulafono o le ola mamā po o le lēgaviā. E i ai nai mea o le a vave ona faafaigataina lou olaga nai lo le solia o lenei tulafono paia. Mo i latou e osia feagaiga ma le Atua, o le ola lē mamā o se tasi o auala sili ona vave e lusi ai lau molimau. … Ua folafola mai e le Alii, e leai se tagata ola lē mamā o le a mauaina le malo selesitila. O lea la, a e faia ni faai’uga e faatatau i le ola mamā, faamolemole mafaufau faaselesitila.” E mafai ona e talanoa e uiga i le auala e mafai ai e le mafaufau selesitila ona fesoasoani ia te oe e tumau ai i le mama tau amio ma auala e mafai ona faamanuiaina ai oe mo le faia o lena mea.
Matamata le vitio “I Choose to Be Pure” (4:19), ma talanoa e uiga i le mafuaaga ua filifili ai talavou eseese o loo i le vitio e tumau i le mama i feusuaiga ma o faamanuiaga latou te lagona o le a oo mai o se taunuuga. E mafai ona outou faasoa atu i le tasi ma le isi mea tou te faia e manatua ai e faia filifiliga e fesoasoani ia te outou e tausia ai le tulafono o le ola mama. Pe mafai foi ona e tusia i lalo lou lava faaiuga e tumau i le mama i feusuaiga i lou olaga atoa ma tuu le pepa i se mea o le a e vaai soo i ai.
I lana lauga “Ia Totoa i le Lototetele, ma Malolosi foi ma Toaaga,” na aoao mai ai Elder Gary E. Stevenson: “‘O mea e te filifili e mafaufau ma fai pe a na o oe ma e te talitonu e leai se tasi o matamata o se fuataga malosi lea o lou mama’ [Tala’i La’u Talalelei: O Se Taiala mo le Galuega Faafaifeautalai (2004), 118]. Ia lototetele! Ia faamalosi! ’Ia outou tutu i nofoaga paia, ma aua le masi’i ese’ [Mataupu Faavae ma Feagaiga 87:8].” Talanoa e uiga i le mafuaaga e taua ai le mama pe a na o oe. Ona mafai lea ona e faasoa atu manatu e uiga i “nofoaga paia” e mafai ona e i ai ma mea paia e mafai ona e faia o le a fesoasoani ia te oe e tumau ai i le ola mama, aemaise lava pe a na o oe. O a nisi o faamanuiaga e mafai ona e maua a o e sailia na nofoaga paia ma filifili e mama?

Aoao atili

Esoto 20:14; 1 Korinito 10:11–13; 1 Tesalonia 4:2–4; 1 Timoteo 4:12
David A. Bednar, “Matou te Talitonu i le Nofo Mama,” Liahona, Me 2013, 41–44
Mary N. Cook, “O Se Olaga Mama—O Lea Laasaga ma Lea Laasaga,” Liahona, Me 2009, 117–19
Lori Cluff Schade, “Marriage, Technology, and Emotional Infidelity,” Ensign, Ian. 2017, 50-55
“O le Ola Mama—O Se Maa Tulimanu e Fausia ai o Tatou Olaga,” Aoaoga a Peresitene o le Ekalesia: Gordon B. Hinckley (2016), 249–57

O Isi Punaoa e uiga i le Ola Mama