Faaeega Paia

O le faaeega paia o se sauniga faale-ekalesia e faataunuuina i totonu o malumalu O Le Ekalesia a Iesu Keriso o le Au Paia o Aso e Gata Ai. E avanoa i tagata matutua o le Ekalsia o e ua saunia mo lenei aafiaga paia.

O le faaeega paia e tuuina mai ai aoaoga, feagaiga, ma faamanuiaga folafolaina ia e ofoina mai ai le mana, faamoemoega, ma le puipuiga i le olaga i aso taitasi. E aoao mai ai e uiga i le Foafoaga o le lalolagi, le Pau o Atamu ma Eva, ma le fuafuaga o le faaolataga e ala mai ia Iesu Keriso, ma la tatou malaga toe foi atu i le afioaga o le Atua. O le faaeega paia e fesoasoani ia i latou o e mauaina ia mulimuli i le Faaola a o latou taumafai mo “le fua o le ua matua e tatau ma le tumu o Keriso,” “faalagolago atoa i galuega a ia o lē ua malosi aoao e laveai.” O le faamamaluina o feagaiga o le faaeega paia e agavaa ai tagata o le Ekalesia e ulufale atu i le feagaiga o le faaipoipoga e faavavau, e taitai atu ai i le meaalofa taua o le ola e faavavau.

O le upu faaee e lua ona uiga e faatatau i ai: “ia faaee atu se meaalofa” ma le “ia faaofu ai.” I le 1831 na poloaiina ai e le Alii le Au Paia e faapotopoto i Ohaio, faatasi ai ma se folafolaga e faapea, “o iina o le a Ou tuu atu ai ia te outou laʼu tulafono; ma o iina o le a faaeeina ai outou i le mana mai luga.” O ni vaega o le faaeega paia, sa faatautaia i totonu o le Malumalu o Katelani. Na amata i le 1842, ona faatautaia le faaeega paia atoa i tagata o le Ekalesia i Navu, Ilinoi. I aso nei, ua valaaulia ai tagata uma o le Ekalesia ia saunia e maua le faaeega paia.

E ala i le faaeega paia, ua faalolotoina ai e tagata o le Ekalesia a latou sootaga faalefeagaiga ma le Atua a o latou folafola atu e mulimuli i Ana tulaga faatonuina o le amio mama, amio sa’o, ma auaunaga i isi. I lenei sauniga paia, e osi ai e tagata o le Ekalesia ni feagaiga “ia tausia le tulafono o le usiusitai, le tulafono o le taulaga, le tulafono o le talalelei, le tulafono o le ola mama, ma le tulafono o le faapaiaga.” O le faamamaluina faamaoni o nei folafolaga e fesoasoani ai i tagata o le Ekalesia ia avea o ni Au Paia e ala i le Togiola a Keriso. O le faaeega paia o se tasi lea o auala e tuu mai ai e le Atua Lona mana i luga o Ona tagata o le feagaiga.

Na saunoa mai Peresitene Iosefa Filitia Samita e uiga i le taua o le faaeega paia i o tatou olaga i aso taitasi:

“Afai tatou te malaga atu i le malumalu e sii o tatou lima ma osi feagaiga o le a tatou auauna i le Alii ma tausia ana poloaiga ma tausia i tatou ia mama mai lenei lalolagi. Afai tatou te malamalama i le mea ua tatou faia, ona avea lea o le faaeega paia o se puipuiga ia i tatou i o tatou olaga atoa—o se puipuiga e le maua ese alii [po o se tamaitai] e le alu i le mamalu.

“Na ou faalogo i lo’u tamā o fai mai faapea, i le itula o tofotofoga, i le itula o faaosoosoga, na te mafaufau ai i folafolaga, o feagaiga sa ia faia i le Maota o le Alii, ma sa o se puipuiga mo ia. … O lenei puipuiga o le aoga lena o nei sauniga, i se vaega. Ua latou faasaoina i tatou i le taimi nei ma e faaeaina ai i tatou i se taimi o mulimuli mai, pe afai tatou te faamamaluina. Ou te iloa o lenei puipuiga ua tuuina mai aua ua ou iloaina foi, e pei foi o le faitau afe o isi o e ua manatuaina o latou tiute.”

E faaopoopo atu i nei faamanuiaga o le puipuiga i aso taitasi, na faamatalaina e Polika Iaga le faaeega paia e faatatau i lona taua pe a uma ona tatou faamaeaina la tatou malaga i le olaga faitino:

“O lou faaeega paia o le, mauaina lea o na sauniga uma i totonu o le maota o le Alii, lea e tatau ai mo outou, pe a mavae atu ma lenei olaga, e mafai ai ona outou savavali atu i le afioaga o le Tama, pasia agelu o tutu o ni leoleo, ma mafai ona tuu atu ia i latou ia upu tatala, o igoa ma faailoga, e faatatau i le perisitua paia, ma maua ai lou faaeaga e faavavau.”

I lana uluai malelega faalauaitele i le avea ai ma Peresitene o le Ekalesia, na aoao mai ai Peresitene Russell M. Nelson e uiga i le mana o le faaeega paia e faatatau i la tatou malaga i le olaga nei ma i sauniuniga mo le ola e faavavau:

“I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga e te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”

Autu Fesootai

• Feagaiga

• Sauniga

Anotusi Fesootai

• Tusitusiga Paia

• Savali mai taitai o le Ekalesia

• Taiala mo le Suesueina o le Talalelei

• Viiga ma pese a tamaiti

• Vitio