Auai i Galuega o le Malumalu ma Talafaasolopito o Aiga

I lana lauga i le konafesi aoao “Aa ma Lala,” sa uunaia ai e Elder Quentin L. Cook ia aiga e faapotopoto e aoao e uiga i olaga o tagata o o latou aiga. O nei faatasiga e mafai ona aofia ai le faasoaina atu o talafaasolopito o aiga, tala, ata, po o meatotino faapelepele a matua po o matua matutua. O tagata o le aiga e fiafia i tekinolosi, e aofia ai le autalavou, e mafai ona sii mai faamatalaga ma ata i a latou Gafa o le Aiga. Mafaufau e faatulaga lenei ituaiga o faatasiga ma lou aiga. O a tomai o loo i ai i tagata taitoatasi e mafai ona fesoasoani ia te oe e aoao ai e uiga i lau talafaasolopito o aiga e fefaasoaai? Mafaufau loloto pe faapefea e le faia faatasi o talafaasolopito o aiga ona fesoasoani e faafesootai ai augatupulaga ma faamalosia ai au fesootaiga ma e pele ia te oe. Ona amata lea ona faia ni laasaga faigofie e fuafua ai sa outou lava faatasiga faaleaiga. E mafai foi ona e valaaulia tagata o lou aiga e fesoasoani ia te oe i le faagasologa.

Ua tumu tusitusiga paia i faataitaiga o talafaasolopito o aiga. Faitau le Eteru 1 mo se faataitaiga mai le Tusi a Mamona. E faapefea ona pei le aotelega a le perofeta o Moronae o tusitusiga a Eteru o le faia o talafaasolopito o aiga? O a upumoni ua tatou aoaoina mai lenei mataupu ona sa tusia ma faasaoina? (tagai Eteru 1:35–37, 40–43). Mafaufau loloto pe na faapefea ona faamanuiaina oe i “talafaasolopito o aiga” o loo tusi faamaumauina i tusitusiga paia. E mafai faapefea e augatupulaga e mulimuli mai ia te oe ona faamanuiaina mai au tala ma tala a ou tuaa?

Pe a e mafaufau i talafaasolopito o aiga, atonu e muamua ona alu ou manatu i suesuega ma faamaumauga o talafaasolopito. Ae o talafaasolopito o aiga e aofia ai foi le aoao e uiga i tagata o lou aiga o loo soifua ma le iloaina o fesootaiga ma ou tuaa. Iloilo faatasi le lauga a Elder Gerrit W. Gong “E Tofu i Tatou ma se Tala,” ona fai lea o se galuega faatino e aofia ai le aoao atili e uiga ia te oe lava, tagata o lou aiga, po o ou tuaa. E mafai ona e tusia pe valiina se laau e i ai a’a ma lala e aofia ai igoa o ou tuaa pe fai foi se tusi e pueina ai nisi o a latou tala. Ona talanoaina lea o le auala e fesootai ai oe ma lou aiga i le faia o talafaasolopito o aiga, e aofia ai i latou na muamua atu ia te oe.

Na aoao mai Elder Quentin L. Cook, “A tatou aoao i tofotofoga ma faigata na feagai ma o tatou tuaa, o le a faateleina lo tatou alofa ma le talisapaia o i latou.” E mafai ona e aoao e uiga i se tasi o ou tuaa ma tofotofoga na oo ia te ia ona faasoa atu lea o lena tala i le vaega. E mafai foi ona e faaali atu se ata pe aumai se mea faitino e faatusa i lou tuaa. Talanoaina pe na faapefea ona faia e nei tala se uunaiga ia te oe ma fesoasoani ia te oe e talisapaia ai le mea na e sau ai.

Luka 3:23–38; 1 Nifae 5:14–17; 19:2–5

Dennis B. Neuenschwander, “O Fesootaiga ma Mea Faamanatu e Faavavau,” Liahona, Iul. 1999, 83–85.

FamilySearch.org

Mafaufau pe faapefea e le mauaina o sauniga mo e ua maliliu ona fesoasoani ia te oe e te lagona ai le vavalalata atili o le fesootai atu i le lagi. Ona faitau lea o tala e lua i le lauga a Elder Gerrit W. Gong “Fiafia ma Faavavau” e uiga i tagata o le Ekalesia o e na i ai ni aafiaga faaleagaga e le masani ai e ala i le auai i galuega o malumalu ma talafaasolopito o aiga. Mafaufau loloto pe faapefea e lou auai i le galuega o malumalu ma talafaasolopito o aiga ona aumaia le filemu, faamoemoe, po o le faamalologa i lou olaga ma fesoasoani ia te oe e aoao atili ai e uiga i le Togiola a Iesu Keriso.

I lana lauga “Faapotopotogaina o le Aiga o le Atua,” na molimau mai ai Peresitene Henry B. Eyring e faapea, ua liliu atu loto o fanau a le Atua i o latou tamā (tagai Malaki 4:5–6; 3 Nifae 25:5–6; Iosefa Samita—Talafaasolopito 1:39). Na ia saunoa mai: “O le toatele o ou tuaa sa lei mauaina sauniga [laveai]. Ae i le sauniaina ai e le Atua, na e maua ai. Ma sa silafia e le Atua o le a e lagonaina le tosina atu i ou tuaa i le alofa ma o le a e mauaina le tekinolosi talafeagai e saili ai i latou. Sa Ia silafia foi o le a e ola i se taimi o le a maua ai avanoa i malumalu paia, e mafai ona faatinoina ai sauniga, ua sili atu i lo se isi lava taimi muamua i le talafaasolopito. Ma sa Ia silafia e mafai ona Ia faatuatuaina oe e faataunuu lenei galuega [e] fai ma sui o ou tuaa.”

E faapefea e le faatuatuaina e le Atua ona faateleina lou manao e fesoasoani i ou tuaa ia maua faamanuiaga o le malumalu mai ia te Ia? E faapefea e Lona vaai mamao ona faamalosia lau molimau e faapea, o loo i ai Sana fuafuaga mo Lona aiga e faavavau? Mafaufau loloto pe faapefea ona e fesoasoani atili ma le loto i ai i le galuega a le Atua, ona galue lea i soo se uunaiga e te maua.

I se falelauasiga i le aso 15 o Aokuso, 1840, na aoao mai ai Iosefa Samita e mafai ona papatisoina alii ma tamaitai mo e ua maliliu. Sa matuai fiafia lava lenei tala i le Au Paia ma sa “toetoe lava a papatisoina vave i latou mo e pele ua maliliu i vaitafe ma auvai e latalata i Navu.” Mafaufau e faitau faatasi “Letters on Baptism for the Dead” e aoao atili ai e uiga i le taimi na tuuina mai ai le aoaoga faavae o le papatisoga mo e ua maliliu. Ona talanoaina lea o le mafuaaga e manaomia ai e e ola ma e ua maliliu le tasi ma le isi. O le a le uiga o le faapea “o i tatou e aunoa ma i latou e lē mafai ona faaatoatoaina; pe mafai foi ona faaatoatoaina i latou e aunoa ma i tatou”? (Mataupu Faavae ma Feagaiga 128:18). E faapefea e le galuega o malumalu ma talafaasolopito o aiga ona saunia e o ola ma e ua maliliu mo le ola e faavavau? E mafai foi ona e matamata i le vitio “What Are Baptisms for the Dead?” ma talanoa e uiga i le auala e mafai ai e le auai i galuega o malumalu ma talafaasolopito o aiga ona aumaia le ituaiga olioli lava lea e tasi mo oe e pei ona sa i ai mo le Au Paia anamua.

Na aoao mai Elder Dale G. Renlund: “I le avea ai ma tagata o le Ekalesia, ua i ai ia i tatou se tiutetauave paia e saili o tatou tuaa ma tuufaatasi talafaasolopito o aiga. … E maofa ma ofoofogia e faapea, e ala atu i talafaasolopito o aiga ma galuega o le malumalu, e mafai ai ona tatou fesoasoani e togiola e ua maliliu.” Toe iloilo faatasi lenei lauga, ona maua lea o se vaega se sini e faatatau i le galuega o malumalu ma talafaasolopito o aiga. Mo se faataitaiga, e mafai e outou taitoatasi ona filifili e aumai se igoa o le aiga i le malumalu ma fai se sauniga mo lena tuaa. Pe mafai foi ona e auai i le faasinoupuina o igoa i luga o le FamilySearch e fesoasoani ai i isi e sue igoa o o latou tuaa. E faapefea e le iloaina o le togiolaina o e ua maliliu o se tiutetauave ua tofia mai le Atua ona faalolotoina ai lou manao e fai galuega o le malumalu ma talafaasolopito o aiga? Na faapefea ona e lagonaina le taialaina e le Agaga i au taumafaiga? Talanoa i o outou aafiaga i le tasi ma le isi, ma faasoa atu po o a faamanuiaga ua outou mauaina e ala i le faataunuuina o lenei tiutetauave taua.

Mataupu Faavae ma Feagaiga 110:13–16; 128:15–19; 137:7–10; 138:29–35, 53–54

Russell M. Nelson ma Wendy W. Nelson, “Open the Heavens through Temple and Family History Work,” Ensign, Oct. 2017, 34–39

David A. Bednar, “O Le a Liliu Atu Loto o Fanau,” Liahona, Nov. 2011, 24–27

Faaputuga “Malumalu ma Talafaasolopito o Aiga”, Potutusi o le Talalelei

“Malumalu,” ChurchofJesusChrist.org