Library
Iesu Keriso

“Iesu Keriso,” Autu ma Fesili (2023)

esu Keriso

Taiala mo le Suesueina o le Talalelei

Iesu Keriso

O le Faaola ma le Togiola lea o le lalolagi

E toatele tagata i lenei lalolagi ua faalogo ia Iesu Keriso ae latou te le o iloa mea ua Ia faia mo i latou. O le savali o le talalelei toefuataiina e fesoasoani tatou te malamalama ai o Iesu Keriso sa sili atu nai lo na o se tagata lauiloa. O Ia o le Alo e Toatasi na Fanaua e le Atua, o le na faia mea uma ina ia mafai ai e tagata uma ona maua le faaolataga ma le ola e faavavau. A e aoao e uiga i Lana matafaioi o lou Faaola ma le Togiola, e te iloa ai e mafai ona Ia aveesea au avega ma suia lou olaga e faavavau. A e filifili e talitonu ia Iesu Keriso ma talitonu i Lona mana e le iu, e mafai ona e maua le taitaiga ma le fesoasoani i luitau uma i lenei olaga.

O Ai Iesu Keriso?

O Iesu Keriso o le Alo Ulumatua ma le Toatasi na Fanaua o le Tama Faalelagi. I le muai olaga, sa filifilia ai Iesu Keriso e avea ma Faaola o fanau a le Atua (tagai i le Aperaamo 3:27). Na auina mai o Ia e le Tama Faalelagi i lenei lalolagi e puapuagatia ma maliu mo a tatou agasala (tagai i le Ioane 3:16–17). Faatasi ai ma le mana faalelagi, na faatoilalo ai e Iesu Keriso le oti ma na toetu mai. O loo soifua nei o Ia. Ua Ia folafola mai o le a i ai se aso e toe foi mai ai i le lalolagi (tagai i le Mataupu Faavae ma Feagaiga 133:10–11, 25).

Vaaiga aoao i autu: Iesu Keriso

Taiala e faatatau i le suesueina o le talalelei: Aiga Atua, Muai Olaga, Foafoaga, Soifua Mai o Iesu Keriso, Galuega Faaletino a Iesu Keriso, Togiola a Iesu Keriso, Toetu, Afio Mai Faalua o Iesu Keriso, Faaolataga

Vaega 1

O Iesu Keriso O Le Faaola ma le Togiola o le Lalolagi

O Keriso o loo faamaloloina se alii pipili

E leai se mea e sili atu ona taua mo i tatou e aoao i ai nai lo Iesu Keriso—o ai o Ia, o mea ua Ia faia mo i tatou, ma mea e finagalo o Ia ia tatou iloa ma faia. O tusitusiga paia ma aoaoga a perofeta ma aposetolo o ona po nei e fesoasoani tatou te iloa ai Lana matafaioi taua o lo tatou Faaola ma le Togiola.

Ua tatou aoao i tusitusiga paia e faapea, i le muai olaga, sa filifilia ai Iesu Keriso e avea ma Faaola mo fanau uma a le Tama Faalelagi (tagai i le 1 Peteru 1:19–20; Aperaamo 3:27). Mai lava i le amataga, sa avea Iesu Keriso ma tagata autu i le faataunuuga o le fuafuaga a le Atua mo le faaolataga ma le faaeaga o Lana fanau. I lalo o le taitaiga a le Tama, na foafoaina ai e Iesu Keriso le lagi ma le lalolagi (tagai i le Mose 1:32–33). I taimi o le Feagaiga Tuai, sa ta’ua ai Iesu Keriso o le Ieova silisili. Sa Ia taialaina ma taitaia perofeta ma tagata talitonu anamua. O Lona alofa ma le alofa mutimutivale na faamalosia ai i latou i taimi o o latou tofotofoga.

I le silia ma le 2,000 tausaga ua mavae, na afio mai ai Iesu Keriso i le lalolagi e ala i se fanau mai faavavega. Sa soifua o Ia ma auauna atu i tagata i le nuu o Isaraelu. Sa Ia faia vavega tetele, e pei o le faamaloloina o e mamai ma le faatuina mai o e ua maliliu (tagai i le Mataio 11:4–5). Sa Ia faatuina Lana Ekalesia ma aoao mai le aoaoga faavae o le salamo, faamagaloga o agasala, ma le ola e faavavau i e uma o le a mulimuli ia te Ia. Sa soifua Iesu Keriso i se soifuaga atoatoa, sa savali e le aunoa i le usiusitai i Lona Tama (tagai i le 2 Nifae 31:7).

O Keriso o loo tatalo i Ketesemane

Ona na afio mai Iesu Keriso i le lalolagi e laveai fanau a le Tama, sa Ia tauaveina ai ma le finagalo malie i Ona lava luga le faasalaga mo a latou agasala. I seneturi na muamua atu, na valoia ai e Isaia: “E moni , ua na tauavae o tatou tiga, ma na tauave o tatou faanoanoa. … “A ua manu’a o Ia ona o a tatou solitulafono, ua momomo o Ia ona o a tatou amio leaga” (Isaia 53:4–5). Sa oo Iesu i le tiga tele, ma mafua ai ona tafetoto o Ia mai puafu uma (tagai i le Luka 22:44; Mataupu Faavae ma Feagaiga 19:15–20). Na pu’ea o ia ma faasalaina i moliaga sesē ma faasalaina i le oti. Sa tu’itu’iina ma le faalealofa o Ia i se satauro, lea na Ia puapuagatia ai ma tuuina atu Lona soifua mo i tatou (tagai i le Mataio 27:50). Ae peitai o Lona maliu sa le o le mutaaga lea. Na toetu ae Iesu Keriso mai le tuugamau ma auauna atu i Ona soo o se tagata toetu (tagai i le Luka 24:36–40; 3 Nifae 11:8–15).

O aso nei, o loo tulimatai atu tagata o le Ekalesia a Iesu Keriso i Lona toe foi mai folafolaina i le lalolagi. E leai se tasi e iloa le taimi o le a tupu ai lenei mea (tagai i le Mataupu Faavae ma Feagaiga 49:7), ae o loo talanoa mai tusitusiga paia e uiga i faailoga ma mea o le a tutupu a o lumanai Lona Afio Mai Faalua. O le a suia le lalolagi pe a toe foi mai le Alii, ma o le a Ia faaali mai mea uma ia i latou o e amiotonu (tagai i le Mataupu Faavae ma Feagaiga 101:23–34).

Keriso o loo faafeiloai i tagata

Mea e mafaufau i ai

  • Na filifilia Iesu Keriso e le Tama Faalelagi e faataunuu Lana fuafuaga mo lo tatou faaolataga ma le faaeaga. Faitau le Mataupu Faavae ma Feagaiga 38:1–3 ma mafaufau i le malamalama ma le mana na i ai ia Iesu Keriso a o lei fanau mai o Ia i le lalolagi. E mafai faapefea e le iloaina o le tele e le gata o le malamalama ma le mana o le Alii ona faateleina ai lou faatuatua ma le talitonu ia te Ia i aso nei?

  • E tele suafa ma faalaniga ua ta’ua ai Iesu Keriso. Faitau mau nei ina ia malamalama lelei ai pe aisea ua ta’ua ai Iesu Keriso o le Faaola (Galuega 4:10–12; Helamana 14:15–16) ma le Togiola (Tito 2:13–14; 2 Nifae 2:6–7, 26). Aisea e taua ai le iloa mo oe lava o Iesu Keriso o lou Faaola ma le Togiola?

Gaoioiga mo le aoao faatasi ma isi

  • Faatasi ai ma tagata o lau vaega, matamata le vitio “O Vaega mai le ‘O Le Keriso Soifua: O Le Molimau a Aposetolo’” (2:45), faalogologo mo auala o loo faamanatu atu ai e le vitio ia te oe e faateleina lou faatuatua ia Iesu Keriso. E mafai foi ona e valaaulia tagata o le vaega e toe iloilo faamatalaga otooto o loo maua i le pito i luga o le faamatalaga “Iesu Keriso” i le Taiala i Tusitusiga Paia (Potutusi o le Talalelei). E mafai faapefea e lenei faamatalaga ona fesoasoani ia te oe e mafaufau ai ia Iesu Keriso o lou Faaola ma le Togiola?

Aoao atili

Vaega 2

O mai ia Iesu Keriso

Iesu Keriso i le ofu talaloa paepae

Ua saunia e le Tama Faalelagi faamanuiaga e tele mo i latou o e talia Lona Alo, o Iesu Keriso (tagai i le Mataupu Faavae ma Feagaiga 84:37–38). Na fetalai mai Iesu Keriso: “Afai tou te o mai ia te au, e maua e outou le ola faavavau. Faauta, ua faaloaloa atu ia te outou lou lima alofa mutimutivale, ma o soo se tasi e sau … o le a ou taliaina” (3 Nifae 9:13–14). Tatou te faaalia lo tatou manao e talia le valaaulia a le Alii e o mai ia te Ia pe a tatou tuu lo tatou faatuatua ia te Ia, salamo i a tatou agasala, papatisoina, tausi poloaiga a le Atua, ma maua sauniga paia o le malumalu.

Pe a tatou liliu atu ma le lotomaualalo ia Iesu Keriso i le faatuatua ma le salamo, e mafai ona tatou maua se faamagaloga o a tatou agasala (tagai i le Mosaea 4:2–3). O le Togiola a Iesu Keriso ua mafai ai foi ona tatou “maua le mana faale-Atua—le mana ua lava e taulima ai avega, faafitauli, ma faaosoosoga o o tatou aso.” O le alofa, alofa mutimutivale, ma le faamagaloga tatou te maua mai ia Iesu Keriso e mafai ona aumaia ai suiga tumau i o tatou olaga ma tuuina mai ia i tatou le malosi e agai ai i luma i le faia o le finagalo o le Atua (tagai i le Mosaea 5:2; Helamana 15:7–8).

Mea e mafaufau i ai

  • Sa tauaveina e Iesu Keriso i Ona lava luga o tatou tiga ma ma’i ina ia iloa ai e Ia le auala e lagolago ai ma fesoasoani ia i tatou i o tatou lava vaivaiga. Faitau le Alema 7:11–13 ma mafaufau pe faapefea ona malamalama atoatoa Iesu Keriso i ou tiga ma luitau ma silafia le auala e faamanuia ai ma faamafanafana ai oe, e tusa lava pe leai se isi tagata e malamalama i ai. O le a se taimi na fesoasoani ai le Faaola ia te oe i taimi o tofotofoga po o faaosoosoga? E mafai faapefea ona e faalagolago ia te Ia pe a e manaomia se toomaga?

Gaoioiga mo le aoao faatasi ma isi

  • Ua i ai ia Iesu Keriso le mana paia e le gata e faamagalo ai, siitia ai, ma faamalosia ai i tatou. O le iloaina o lena mea e mafai ona fesoasoani tatou te feagai ai ma luitau ma le faamoemoe sili atu. Na aoao mai Peresitene Russell M. Nelson:

    “Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso. Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia!”

    Talanoa i le saunoaga a Peresitene Nelson. Valaaulia tagata o le vaega e faailoa mai nisi o fesili po o luitau o loo tatou feagai i aso nei. Talanoa i auala e mafai ona tatou maua ai ni vaifofo e ala mai i lo tatou Faaola, o Iesu Keriso.

Aoao atili