Library
Afio Mai Faalua o Iesu Keriso

“Afio Mai Faalua o Iesu Keriso,” Autu ma Fesili (2023)

o Iesu Keriso toetu

Taiala mo le Suesueina o le Talalelei

Afio Mai Faalua o Iesu Keriso

O le a toe afio mai Iesu Keriso i le mana ma le mamalu tele

Pe mafai ona e mafaufau i se taimi na e tulimatai atu ai ma le naunautai tele i le asiasi mai o se tagata o lou aiga po o se uo sa nofo mamao? O a ni mea sa e faia e sauniuni ai mo lena asiasiga? Mafaufau i le taimi ma le taumafaiga na e tuuina i le saunia ma le fiafia na e lagonaina a o e faatalitali ma le naunautai mo le taunuu mai o le tagata.

E toatele tagata e tulimatai atu foi i le Afio Mai Faalua o lo tatou Faaola ma le naunautai tele. O Lona toe foi mai o le a faailo mai ai le faaiuga o taua ma feteenaiga i le lalolagi ma o le a faailoga ai le amataga o le 1,000 tausaga o le filemu ma le amiotonu. Ona o loo tatou tulimatai atu i le toe foi mai o le Faaola, e mafai ona tatou maua le faamoemoe ma le olioli. Ua tatou iloa a afio mai o Ia, o le a faasa’o e Iesu Keriso mea sese uma ma “soloiesea loimata uma” (Faaaliga 21:4).

A o e suesue i mea e tutupu i le Afio Mai Faalua, atonu e te mafaufau i mea o loo e faia ma isi mea e mafai ona e faia e saunia ai mo lena mea ofoofogia o le a tupu.

O Le A Le Afio Mai Faalua?

O le Afio Mai Faalua o le taimi lea o le a toe foi mai ai Iesu Keriso e pule ma nofotupu i le lalolagi. Na aoao mai Iesu ma le toatele o perofeta, anamua ma aso nei, o le a afio mai Iesu i le lalolagi mo le taimi lona lua (tagai i le Isaia 66:14–15; Mataio 24:42–44, 50; Galuega 1:11). Pe a toe foi mai o Ia o se tagata toetu ma le mana ma le mamalu tele, o le a suia ai e faavavau le lalolagi. I lena taimi, o le a maua ai e le Faaola le lalolagi o Lona malo ma faatuina le filemu i le lalolagi atoa.

Vaaiga aoao o le autu: Afio Mai Faalua

Taiala e faatatau i le suesueina o le talalelei: Iesu Keriso, Toetu, Salamo

Vaega 1

O Le A Toe Foi Mai Iesu Keriso i le Lalolagi i le Mamalu ma le Mana

Keriso i le ofu talaloa lanumumu

Ina ua afio mai Iesu i le lalolagi mo le taimi muamua, o le toatele lava o tagata sa le iloaina ua tupu. Sa fanau mai o ia i se tamaitai faatauvaa, mamao ese mai lona aiga, ma sa taoto i se faatanoa vaovao. Pe a afio mai o Ia i le taimi lona lua, sa fetalai atu Iesu i Ona soo, “e afio mai le Atalii o le tagata i le mamalu o lona Tamā faatasi ma ana agelu” (Mataio 16:27).

Ua masani foi ona saunoa perofeta e uiga i le Afio Mai Faalua o Iesu Keriso. Na ta’ua e Peresitene Russell M. Nelson “o le tumutumuga o lenei tisipenisione mulimuli.” Ma sa saunoa mai Elder D. Todd Christofferson, “O Le Ekalesia a Iesu Keriso o le Au Paia o Aso e Gata Ai e tulaga ese le faamalosia ma ua poloaiina e faataunuu sauniuniga talafeagai mo le Afio Mai Faalua o le Alii; ioe, sa toefuataiina mo lena faamoemoega.”

Pe a toe foi mai Keriso, o le a iloa e tagata uma (tagai i le Mataupu Faavae ma Feagaiga 101:23). Na folafola mai e le perofeta o Isaia, “Ona faaalia mai ai lea o le pupula o Ieova, e vaaia lava e tagata uma faatasi” (Isaia 40:5). O lenei mea maoae o le a tupu o le a faailogaina ai le amataga o se vaitaimi mamalu e 1,000 tausaga, ua taua o le Meleniuma, lea o le a nofotupu ai Iesu lava ia i le lalolagi, o le a leai se mana o Satani (tagai Faaaliga 20:1–3; Mataupu Faavae ma Feagaiga 45:55), ma o le a ola tagata uma i le filemu ma le olioli.

Mea e mafaufau i ai

  • Pe a toe foi mai Iesu Keriso, o le a muta amioleaga uma i le lalolagi. Aiseā o le a matuā matautia ai lenā taimi mo nisi tagata? (E mafai ona e faitau ma mafaufau loloto i le Mataupu Faavae ma Feagaiga 29:17.) Aisea o le a le avea ai le Afio Mai Faalua o le Faaola o se taimi matautia mo e amiotonu? (E mafai ona e faitau ma mafaufau loloto i le 1 Nifae 22:17, 22.)

Gaoioiga mo le aoao faatasi ma isi

  • Pe a toe afio mai Iesu o le Alii o alii, e tele mea taua o le a tutupu. E mafai ona e suesueina taitoatasi se fuaitau se tasi pe sili atu o fuaitau nei ma faasoa mai mea ua e aoaoina e uiga i nei mea o le a tutupu i le lumanai: Mataio 25:31–46; Mataupu Faavae ma Feagaiga 29:9–11; 63:53–54; 76:50–54, 63; 88:96–98; 101:24–25; 133:19, 25; ma le Mataupu Faavae o le Faatuatua 1:10. O a ni mea o loo aoao mai e nei mea o le a tutupu ia i tatou e uiga ia Iesu Keriso?

  • Vaai i se ata o le pepe o Iesu, ma faatusatusa i se ata o Lona Afio Mai Faalua. Atonu e te faitau pe usu le pese “Sa Fanau Maulalo Iesu” e fesoasoani ai ia te oe e talanoa e uiga i nisi o eseesega i le va o ata e lua. O le a se mea o fesoasoani nei ata ma lenei pese ia i tatou ia malamalama ai e uiga ia Iesu Keriso?

  • Matamata i le “O Le Afio Mai Faalua o Iesu Keriso” (3:02), ma talanoa e uiga i mea o loo ta’ua i le vitio o le a faailoga ai le toe foi mai o le Faaola. O a upu o loo faaaogaina i le vitio e faamatala ai Iesu Keriso pe a toe afio mai o Ia? O a ni mea o aoao mai e nei upu ia i tatou e uiga ia te Ia? E mafai foi ona e usuina pe faitau faatasi upu o se pese po o se viiga e uiga i le Afio Mai Faalua, e pei o le “Faaola o Isaraelu” po o le “Pe a Ia Toe Afio Mai,” ma talanoa e uiga i mea o loo aoao mai ai e uiga i le Faaola ma Lona toe foi mai i le lalolagi.

Aoao atili

Vaega 2

E Tatau Ona Tatou Saunia mo le Toe Foi Mai o le Faaola

alii ma le teineitiiti o loo faitau i tusitusiga paia

Na fetalai Iesu, “O lea aso ma lea itu aso [o lo’u toe foi mai], e le iloa e se tasi, e le iloa lava e agelu i le lagi, ua na o lo’u Tama lava” (Mataio 24:36; tagai foi i le Mataupu Faavae ma Feagaiga 49:7). O le taimi o le Afio Mai Faalua o Keriso o le a avea ma se mea e faateia ai le toatele (tagai i le 2 Peteru 3:10; Mataupu Faavae ma Feagaiga 106:4). Ae o soo moni o Iesu Keriso o le a le tete’i ai. Na fetalai mai le Alii o Ona soo o le a “avea ma fanau a le malamalama, ma o le a le oo mai lena aso ia te outou e pei o se gaoi” (Mataupu Faavae ma Feagaiga 106:5).

Sa ta’u atu e le Faaola i le Au Paia anamua e uiga i lenei tisipenisione, “Ia outou saunia, ia outou saunia mo mea o le a oo mai, aua ua latalata mai le Alii” (Mataupu Faavae ma Feagaiga 1:12). Ua faafia foi ona talanoa mai perofeta e uiga i le manaomia ona saunia mo le toe foi mai o le Faaola. Sa fautua mai Peresitene Dallin H. Oaks, “E ui ina leai so tatou mana e fetuunai ai le mea moni o le Afio Mai Faalua, ma le mafai ona iloa le taimi tonu, e mafai ona tatou faatelevaveina a tatou lava sauniuniga ma taumafai e faatosinaina le sauniuniga a i latou o loo siomia ai i tatou.” Ua saunia e le Alii faailoga o le a faailoa mai ai ua vave ona afio mai o Ia, ma e mafai ona tatou saili ma suesue i nei faailoga (tagai, mo se faataitaiga, i le Iosefa Samita—Mataio 1).

Mea e mafaufau i ai

  • O se tasi o auala e mafai ona tatou saunia ai mo le toe foi mai o le Faaola o le taumafai lea ia i ai i nofoaga e mafai ona faatasi ai Lona Agaga ma i tatou. Na aoaoina e le Alii le uluai Au Paia, “O le mea lea, ia outou tutu ai i nofoaga paia, ma aua le masi’i ese seia oo mai le aso o le Alii; aua faauta, e vave lava ona oo mai” (Mataupu Faavae ma Feagaiga 87:8). Aisea e te manatu ai o le i ai i nofoaga paia o se auala lelei lea e saunia ai mo le toe foi mai o le Faaola? Na faamalamalama mai e Peresitene Oaks: “O a na ‘nofoaga paia’? E mautinoa lava e aofia ai le malumalu ma ona feagaiga e tausia ma le faamaoni. E mautinoa lava e aofia ai se aiga, o i ai fanau e faatauaina ma matua e faaaloalogia. E moni lava, o nofoaga paia e aofia ai o tatou valaauga ua tofia i le pule o le perisitua, e aofia ai misiona ma valaauga ua faataunuuina ma le faamaoni i paranesi, uarota, ma siteki.” Mafaufau pe faapefea ona faamanuiaina oe a o e faaaluina lou taimi e fai ai gaoioiga e totonugalemu ia Keriso i nofoaga paia. E faapefea ona saunia oe e nei gaoioiga mo le toe foi mai o le Alii?

  • Faitau le Iosefa Samita—Mataio 1:27–31, ma vaavaai mo valoaga o mea o le a tutupu e taimua i le Afio Mai Faalua. E mafai faapefea e le iloaina o nei mea o le a tutupu ona fesoasoani ia te oe e saunia ai mo na mea? E mafai faapefea ona e fesoasoani i aiga po o uo ia saunia mo le Afio Mai Faalua ma mea faigata o le a tutupu lea o le a oo atu i ai? E mafai faapefea ona e saunia lou loto mo le olaga pe a mavae le Afio Mai Faalua, lea o le a leai ai ni finauga, leai se mativa, ma leai se amioleaga? O a ni uiga e te lagona o le a taua le i ai ia te oe pe a toe foi mai le Faaola? E faapefea ona e atiina ae na uiga? Tusi i lalo ma faatino ia uunaiga e te maua.

  • Mafaufau i le igoa o le Ekalesia toefuataiina a le Alii. O le a le uiga ia te oe o le avea ma “Au Paia o Aso e Gata Ai”? E mafai faapefea ona e faaaogaina atili le igoa o le Ekalesia i au talanoaga i aso uma e faailoa atu ai i isi lou talitonuga i le Faaola ma lou faatuatua ma le faamoemoe i Lona toe foi mai?

Gaoioiga mo le aoao faatasi ma isi

  • Na faasoa mai e le Faaola le faataoto i taupou e toasefulu e aoao ai i tatou i le taua o le saunia i taimi uma mo Lona toe foi mai (tagai i le Mataio 25:1–13; Mataupu Faavae ma Feagaiga 45:56–57). I le saunoa ai e uiga i le suauu o loo faamatalaina i lenei faataoto, na aoao mai ai Elder David A. Bednar: “O lenei suauu taua e maua mai i le mataua e tasi i le taimi—‘o lea fuaitau i lea fuaitau [ma] lea mataupu i lea mataupu’ (2 Nifae 28:30), ma le onosai ma le finafinau. E leai ni auala ‘alo o i ai; leai ni tapenaga faatatope mulimuli e i ai.” Mafaufau e faatumu se koneteina i se mataua suauu se tasi i le taimi a o e talanoa e uiga i mea e mafai ona tatou faia o ni tagata taitoatasi, i o tatou aiga, ma i a tatou uarota e saunia ai mo le Afio Mai Faalua o Iesu Keriso.

  • I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua ia i tatou se matafaioi tulaga ese ma le paia ua tuuina mai e fesoasoani e faapotopoto “se nuu ua saunia e talia o Ia i Lona afio mai.” Toe faamanatu le tusiga a Peresitene Nelson “O le lumanai o le Ekalesia: Sauniaina o le Lalolagi mo le Afio Faalua Mai o le Faaola.” Ona talanoaina lea o le uiga o le saunia o le lalolagi e talia lo tatou Faaola. Aisea e te manatu ai ua tofia e le Faaola le Au Paia o Aso e Gata Ai e saunia le lalolagi mo Lona afio mai? E faapefea ona tatou faia lena mea?

  • Atonu e lagona e nisi tagata le atuatuvale po o le fefe pe a latou mafaufau i mea o le a tutupu a o lei oo i le Afio Mai Faalua o le Faaola. E mafai ona outou faitau faatasi le faamatalaga lenei: “O le ala sili ona lelei tatou te saunia ai mo Lona afio mai, o le talia lea o aoaoga o le talalelei ma avea ma se vaega oo tatou olaga. E tatau ona tatou ola i aso taitasi i le mea sili tatou te mafaia, e pei ona aoao mai Iesu ao soifua i le lalolagi. E mafai ona tatou vaavaai i le perofeta mo le taitaiga ma mulimuli i Ana fautuaga. E mafai ona tatou ola agavaa ia maua le Agaga Paia e taitai i tatou. Ona tatou tulimatai atu ai lea ma le fiafia i le afio mai o le Faaola e aunoa ma le fefe.” Ona talanoa lea e uiga i le auala e mafai ai e nei fautuaga taitasi ona fesoasoani ia i tatou ia ola lelei ai i le talalelei ina ia mafai ona tatou lagonaina le filemu ma le toafimalie pe a tatou mafaufau i mea e tutupu e siomia ai le toe foi mai o le Faaola.

Aoao atili

Faamatalaga

  1. Russell M. Nelson, “The Future of the Church: Preparing the World for the Savior’s Second Coming,” Ensign, Apr. 2020, 14.

  2. D. Todd Christofferson, “Saunia mo le Toe Afio Mai o le Alii,” Liahona, Me 2019, 82.

  3. “Sa Fanau Maulalo Iesu,” Viiga, nu. 110.

  4. “Faaola o Isaraelu,” Viiga, nu. 5.

  5. “Pe A Ia Toe Afio Mai,” Tusipese a Tamaiti, 46–47.

  6. Dallin H. Oaks, “Sauniuniga mo le Afio Mai Faalua,” Liahona, Me 2004, 8.

  7. Dallin H. Oaks, “Sauniuniga mo le Afio Mai Faalua,” 10.

  8. David A. Bednar, “Faaliliuina i le Alii,” Liahona, Nov. 2012, 109.

  9. D. Todd Christofferson, “Saunia mo le Toe Afio Mai o le Alii,” 82.

  10. Russell M. Nelson, “O Le Igoa Sa’o o le Ekalesia,” 12–17.

  11. Mataupu Faavae o le Talalelei (2011), 261.