Foafoaga

I lalo o le taitaiga a Tama Faalelagi, na foafoa ai e Iesu Keriso le lagi ma le lalolagi. Mai tusitusiga paia na faaalia mai e ala mai i le Perofeta o Iosefa Samita, ua tatou iloa ai, i le galuega o le Foafoaga, sa faatulagaina ai e le Alii elemene na uma ona i ai. Na te le’i foafoaina le lalolagi “mai i le leai o se mea,” e pei ona talitonu ai nisi o tagata.

Ua aoao mai foi tusitusiga paia e faapea, o Atamu “o le uluai tagata o tagata uma.” Na foafoaina e le Atua ia Atamu ma Eva i Lona lava faatusa ma i le faatusa o Lona Alo e Toatasi na Fanaua

O le Foafoaga o se vaega taua o le fuafuaga o le faaolataga a le Tama Faalelagi. Ua tuuina mai ai ia i tatou taitoatasi le avanoa e o mai ai i le lalolagi, lea tatou te maua ai se tino faaletino ma faaaoga lo tatou faitalia. I le Fono a Atua i le muai olaga, sa faia ai le folafolaga lenei: “O le a tatou o i lalō, ona o loo i ai se avanoa iina, ma o le a tatou ave mea nei, ma o le a tatou faia se lalolagi e nonofo ai i latou nei; ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”