Library
Valaaulia Tagata Uma e Talia le Talalelei

“Valaauliaina o Tagata Uma e Talia le Talalelei,” Autu ma Fesili (2023)

alii talavou o loo savalivali ma talanoa

Taiala mo le Suesueina o le Talalelei

Valaaulia Tagata Uma e Talia le Talalelei

O le auala tatou te valaaulia ai ma le alofa fanau a le Atua ina ia maua Ana faamanuiaga

Vaai faalemafaufau o loo e savali i se ala ma se uo. E pogisa le auala, ae e i ai sau moliuila e faamalamalama ai le ala. E mafai ona e faaaogaina le moliuila ina ia faigofie ai ona e iloa mea o i luma atu. Ae ona e te manao ia faigofie le malaga a lau uo, o lea e te faasoa atu ai foi lou malamalama ia i latou.

Tatou te valaaulia tagata uma ina ia maua le talalelei a Iesu Keriso mo le mafuaaga lava lea e tasi: o le talalelei e faamalamalamaina ai la tatou malaga i le olaga. E taliina ai fesili o le agaga ma aumaia ai ia i tatou le vaaiga, filemu, ma le olioli. O lea tatou te faasoa atu ai i fanau a le Atua aua tatou te alolofa ia i latou ma mananao ia manuia tagata uma mai Lona malamalama (tagai 3 Nifae 18:24).

O Le A le Uiga o le Valaaulia o Tagata Uma ia Talia le Talalelei a Iesu Keriso?

I le avea ai ma Au Paia o Aso e Gata Ai, tatou te taumafai e valaaulia tagata uma ia maua le talalelei a Iesu Keriso aua o se “talalelei o le filemu, ma o le tala fiafia lea o mea lelei” (Roma 10:15). Tatou te valaaulia isi e talia le talalelei “i upu ma faataitaiga.” E mafai ona foliga mai lenei mea o le faasoaina atu o le talalelei i le olaga i aso uma, auauna atu o ni faifeautalai, ma “fesoasoani i tagata fou ma tagata ua toe foi mai o le Ekalesia ia agai i luma i le ala o le feagaiga.” Pe a tatou fesoasoani i isi e “talia le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.” tatou te lagonaina le olioli moni.

Vaaiga aoao i le autu: Galuega Faafaifeautalai

Taiala e faatatau i le suesueina o le talalelei: Ekalesia a Iesu Keriso, Liua, Feagaiga Faavavau, Faapotopotoina o Isaraelu

Vaega 1

Tatou te Fesoasoani i le Atua e Faataunuu Lana Galuega pe a Tatou Valaaulia Tagata Uma e Talia le Talalelei a Iesu Keriso

tamaitai o loo talanoa faatasi i le lotu

E finagalo le Atua ia faalogo uma Ana fanau i le talalelei a Iesu Keriso ina ia mafai e tagata uma ona maua ona faamanuiaga. O se tasi o auala e aumaia ai e le Alii Lana talalelei i isi o le valaau lea o i tatou e “tala’i atu lana afioga i totonu o ona tagata” (3 Nifae 5:13). Tatou te lagona le olioli a o tatou faasoa atu Lana afioga, ma tuuina atu i isi le avanoa e o mai ai ia Iesu Keriso ma lagona Lana faamafanafanaga, faamoemoe, ma le filemu.

Mea e mafaufau i ai

  • E matuā taua agaga taitoatasi i le Atua. Ua finagalo o Ia ia toe foi uma atu i tatou ia te Ia. Faitau le Mataupu Faavae ma Feagaiga 18:10–16, ma mafaufau i le taua o fanau a le Atua. Aisea e finagalo ai le Alii e te faasoa atu le talalelei i isi? Mafaufau i se tasi na faasoa atu le talalelei ia te oe pe na fesoasoani ia te oe e te sau ia Keriso. E faapefea ona ese lou olaga pe ana le faasoaina atu e lena tagata le malamalama o le Faaola ia te oe? Tusi ou uunaiga ona tusi lea i lalo pe faapefea ona e faasoa atu Lana afioga i isi.

  • Tatou te manuia i le faasoaina atu o le talalelei pe a tatou valaaulia isi e aoao e uiga i ai pe na o le o mai lava ma vaai po o le a le mea e faatatau i ai. Atonu latou te taliaina la tatou valaaulia—pe atonu foi latou te le taliaina. Faitau le vaega ua taua “Faasoa Atu Lau Tala” i le savali a Elder Dieter F. Uchtdorf “O Lau Malaga Tele.” Mafaufau po o ai e te ono valaaulia e aoao e uiga i le talalelei po o ai foi e te ono toe valaaulia. E mafai faapefea ona e faaalia lou alofa ma le faaaloalo mo lena tagata a o e valaaulia i latou? E faapefea ona fesoasoani lenei mea ia i latou ia lagonaina le alofa o le Faaola?

Gaoioiga mo le aoao faatasi ma isi

  • Pe a tatou faasoa atu le talalelei a Iesu Keriso, e taua le fesootai atu i isi i se auala latou te mananao ai pe manaomia. Faitau faatasi nisi o manatu mo le auala e faia ai lenei mea i le “Saili Tagata i le Mea o Loo Latou I Ai” i le mataupu e 9 o le Tala’i La’u Talalelei: O Se Taiala i le Faasoaina Atu o le Talalelei a Iesu Keriso. Talanoa e uiga i fesili ma manatu o loo i le vaega lenei ma mafaufau i isi. Ona faatino lea o se talanoaga e te valaaulia ai se tasi e aoao e uiga i le talalelei. A mae’a, ia faaaoga nei mataupu faavae i lou lava olaga a o e valaaulia isi e o mai ia Keriso.

  • Faitau faatasi le Mataupu Faavae ma Feagaiga 4 , ma talanoa po o ai ua valaauina e faasoa atu le talalelei a Iesu Keriso (tagai i le fuaiupu 3). Ona talanoaina lea o uiga faaKeriso o loo lisiina i fuaiupu 5–6 ma le auala e mafai ona fesoasoani ai ia i tatou e faasoa atu Lana afioga. E mafai ona outou taaalo faatasi i se taaloga e fesoasoani ia te outou e manatua ai nei uiga. Amata i le togiina o se polo i se tasi o lau vaega. A maua e lena tagata le polo, fai atu ia i latou e ta’u mai se tasi o uiga na e talanoaina. Faaauau pea le taaloga seia uma ona ta’ua uiga uma. E mafai ona outou taaalo i ni taamilosaga se tele ma vaai pe mafai ona e saoasaoa atu i taimi taitasi. Filifili se uiga se tasi e galue ai, ma matau i le aluga o taimi pe faapefea ona fesoasoani ia te oe e valaaulia ai isi e maua le talalelei a Iesu Keriso.

Aoao atili

Vaega 2

E Mafai Ona Tatou Fesoasoani i Isi ia Maua le Talalelei a Iesu Keriso a o Tatou Alolofa, Faasoa Atu, ma Valaaulia

tamaitai o loo talanoa ma se isi tamaitai i fafo o le fale

I le avea ai ma tagata o le Ekalesia, tatou te mananao ia maua e tagata uma le talalelei a Iesu Keriso “aua tatou te alolofa i le Atua ma Ana fanau” ma tatou te mananao ia lagona e isi le olioli lava lea e tasi tatou te lagonaina. E faigofie lava le aumaia o le talalelei i isi—e manaomia lava ona tatou alolofa, faasoa atu, ma valaaulia. O nisi taimi tatou te faia ai lenei mea e ala i le auaunaga faafaifeautalai i le Ekalesia. O le tele lava o taimi, tatou te alolofa, faasoa atu, ma valaaulia e ala i le ola ai i mataupu faavae o le talalelei ma talanoa e uiga i lo tatou faatuatua i auala masani ma faalenatura. A o tatou faasoa atu le talalelei i tagata i soo se mea, tatou te fesoasoani e saunia fanau a le Atua mo le ola e faavavau.

Mea e mafaufau i ai

  • O nisi taimi atonu tatou te mananao ai e faasoa atu le talalelei a Iesu Keriso ae tatou te le o mautinoa po o fea e amata ai. Toe iloilo le savali a Elder Gary E. Stevenson “Alofa, Faasoa Atu, Valaaulia” mo musumusuga e uiga i le auala e faasoa atu ai le talalelei i auala masani ma faalenatura. Ona faitau lea o le Mataio 7:7 ma le 3 Nifae 18:20 ma mafaufau loloto pe faapefea ona e ole atu mo le fesoasoani a le Alii i le faasoaina atu o Lana talalelei i isi, e aofia ai au uo, tuaoi, ma e pele ia te oe. Tatalo mo Lana taitaiga, ona vaavaai lea mo avanoa faafaifeautalai. Tusi le auala e te vaai ai i le aao o le Alii a o e valaaulia ma le alofa isi e aoao e uiga i Lana talalelei.

  • I Le Ekalesia a Iesu Keriso o le Au Paia o Aso e Gata Ai, tatou te maua ai le avanoa e auauna atu ai o ni faifeautalai. Faitau le “Talaiina o le Talalelei o le Filemu” saunia e Peresitene Russell M. Nelson ma le “O Le A Matua Tele Lou Olioli” saunia e Elder Ronald A. Rasband. Aisea e manaomia ai e le Alii faifeautalai o vaitausaga uma e aumai Lana talalelei i isi? E faapefea ona Ia faamanuiaina i latou mo a latou taumafaiga? Mafaufau pe na faapefea ona e vaai i faifeautalai o mulimuli i mataupu faavae o le alofa, faasoa atu, ma le valaaulia e fesoasoani ai i isi ia o mai ia Keriso. O le a se mea e mafai ona e faia e mulimuli ai i a latou faataitaiga? E mafai foi ona e mafaufau loloto pe mafai ona e auauna atu i se misiona ma amata ona sauniuni mo le avanoa.

Gaoioiga mo le aoao faatasi ma isi

Aoao atili