Alofa Tunoa

O le alofa tunoa o le fesoasoani faalelagi po o le malosiaga e tuuina mai e ala i le Togiola a le Alii o Iesu Keriso. E ala mai i le alofa tunoa o le Atua, o tagata uma lava e ola mai o le a toetutu—o le a toe tuufaatasia o tatou agaga ma o tatou tino, ma e le toe tuueseeseina lava. E ala mai i Lona alofa tunoa, ua faia ai foi e le Alii ia mafai e i latou o e ola i Lana talalelei ona salamo ma faamagaloina.

O le alofa tunoa o se meaalofa mai i le Tama Faalelagi na tuuina mai e ala i Lona Alo, o Iesu Keriso. O le upu alofa tunoa, e pei ona faaaogaina i tusitusiga paia, o loo muai faatatau i le mana malosi ma le faamalologa faaleagaga na ofo mai e ala i le alofa mutimutivale ma le alofa o Iesu Keriso.

E oo tagata uma i le lalolagi i le oti faaletino. Ona o le Toetu o Iesu Keriso, o le a toetutu ai tagata uma ma o le a ola e faavavau.

Ona o filifiliga patino, e oo ai foi tagata uma i aafiaga o le agasala. O nei aafiaga ua ta’ua o le oti faaleagaga. E leai se tasi e mafai ona toe foi atu i le afioaga o le Atua e aunoa ma le alofa tunoa. E ala i le Togiola, e mafai ai ona faamagaloina i tatou uma i a tatou agasala; e mafai ona tatou mama i luma o le Atua. Ina ia maua le mana gafatia, e tatau ona tatou usiusitai i le talalelei a Iesu Keriso, lea e aofia ai le faatuatua ia te Ia, salamo i a tatou agasala, papatisoina, maua le meaalofa o le Agaga Paia, ma taumafai e mulimuli i aoaoga a Iesu Keriso mo aso uma o totoe o o tatou olaga.

E fesoasoani le alofa tunoa o le Atua ia i tatou i aso uma. Na te faamalolosia i tatou e faia galuega lelei e le mafai ona tatou faia na o i tatou. Sa folafola mai e le Alii afai tatou te faalotomaualaloina i tatou lava i Ona luma ma faatuatua ia te Ia, o le a fesoasoani Lona alofa tunoa ia i tatou e faatoilaloina o tatou lava vaivaiga faaletagata.