O Evagelia [Talalelei]

O Mataio o se tasi o Aposetolo e Toasefululua a le Faaola ma o se molimau vaaitino i le tele o mea na tutupu na ia faamatalaina. A o le’i valaauina o ia e avea ma soo, sa avea Mataio ma se tagata e faia le lafoga, po o se ao lafoga. Sa igoa foi o ia o Levi, le atalii o Alefeu.

Ua fautua mai nisi o tagata atamamai ma ulua’i punavai, na tusia e Mataio lana Evagelia i le va o le 50 ma le 60 T.A. Sa tuu e isi i le va o le 80 ma le 90 T.A., i se taimi ina ua uma ona faaumatia e tagata Roma Ierusalema.

Na tusi Mataio e “faatauanau tagata Iutaia o Iesu o le Mesia folafolaina.” E tele taimi na faasino ai Mataio i valoaga o le Feagaiga Tuai ma faaaogaina le fasifuaitau “ina ia faataunuuina.” Na ia faasino atu iā Iesu o le Alo o Tavita ina ia faamamafa atu i tagata faitau Iutaia o Iesu o lo latou Mesia ma o le Tupu moni lea. Sa ia sueina le gafa tautupu o le Faaola e ala atu ia Tavita, Iuta, ma Aperaamo, e faaalia ai le aia tatau a Iesu e pule ai ia Isaraelu.

Na faaaofia ai foi e Mataio mea ta’ua na tutupu ma aoaoga na aofia ai Nuuese. Atonu na ia faaaofia ai nei mea i lana Evagelia e uunaia ai le au faitau Iutaia ia talia le galuega faafaifeautalai o loo faia i Nuuese.

O isi autu ma vaaiga tulaga ese nei o le Evagelia a Mataio:

• Na afio mai Iesu Keriso e faatu Lona malo. Sa tele taimi na ta’ua ai e Mataio “o le malo o le lagi”, ma e na o ia le tusi Evagelia ua faaaofiaina aoaoga a Iesu o loo taua ai le “ekalesia.”

• E tele mea e tutusa ai auaunaga a Mose ma Iesu Keriso. E foliga mai na faatulagaina e Mataio lana Evagelia i se auala e fesoasoani ai i le au faitau Iutaia ia iloa na faataunuuina e Iesu Keriso le valoaga a Mose: “O le a faatuina e le Alii lou Atua ia te oe se Perofeta … e pei o a’u.”

• E lē tuulafoa’ia e le Atua Ona tagata. O le Evagelia a Mataio ua na o le pau lea o le Evagelia ua faasino atu ia Iesu o Emanuelu, o lona uiga “ua faatasi le Atua ma i tatou.” O gaoioiga, aoaoga, ma vavega a le Faaola o loo tusi faamaumauina i le Mataio ua faaalia ai e faatasi pea le Atua ma i tatou.

O Mareko e masani ona talitonuina o Ioane Mareko, le atalii o Maria. O lo latou fale i Ierusalema sa avea o se nofoaga e fono ai soo o Iesu Keriso. Na mulimuli ane avea Mareko ma soa faafaifeautalai a le Aposetolo o Paulo. E tusa ai ma uluai punaoa faa-Kerisiano, sa malaga faatasi foi Mareko ma le Aposetolo o Peteru i Roma, lea na tusia ai e Mareko lana Evagelia e faavae i manatuaga o Peteru.

O uluai punavai na faaasoina tusiga a Mareko i se taimi e lei leva ona mavae le maliu faamaturo o Peteru, atonu i le va o le 65 ma le 70 T.A. O Lana Evagelia atonu o le uluai talalelei lea na tusia o le toafa.

I lana Evagelia atoa, o loo faamatala ai e Mareko i ana tagata faitau ia aganuu, faataatiaga faafaafanua, ma gagana a Iutaia. O se tasi lenei o mafuaaga ua manatu ai nisi o tagata atamamai e faapea, na ia tusia mo tagata o nuu ese, po o tagata e le o ni Iutaia, tagata liliu mai i le faa-Kerisiano, aemaise lava tagata Roma.

E foliga mai na tusia e Mareko lana tala i se vaitaimi na faailogaina i tofotofoga ogaoga o le faatuatua mo le toatele o tagata o le Ekalesia i le Malo atoa o Roma. O le tasi vaetolu o le Evagelia a Mareko o loo faamatala ai aoaoga a le Faaola ma aafiaga i le taimi o le vaiaso faaiu o lona soifua. Na tuuina mai e Mareko le molimau e faapea, o le Alo puapuagatia o le Atua na manumalo aoao i le leaga, agasala, ma le oti. Atonu na tusia e Mareko lana Evagelia e taialaina ai tagata talitonu ma faamalosia ai lo latou faatuatua i taimi o sauaga matautia.

O isi autu nei ma vaaiga tulaga ese o le Evagelia a Mareko:

• O le Evagelia a Mareko o le Evagelia aupito puupuu lea ma o loo faamamafa mai ai gaoioiga a Iesu. O loo amata le Mareko i le toe faamatalaina o le papatisoga ma le galuega a le Faaola i le olaga nei. Na tausisia se faatinoga vave, e vave lava ona ia toe faamatalaina mea na tutupu. E tele ona faaaoga e Mareko ia upu e pei o le lava loa, i lea lava taimi, ma le anon (taimi vave), e aumaia ai le aafiaga o le vave ma le faatinoga.

• Sa lē malamalama [tagata] ma teenaina Iesu. O nisi o autu taua i le Mareko o fesili po o ai Iesu ma po o ai na malamalama i Lona faasinomaga. Sa le malamalama [tagata], teenaina, ma fasiotia Iesu, ae sa Ia faatoilaloina mea uma, e aofia ai le oti. E ui lava sa faia e Iesu vavega tetele ma aoao atu ma le mana, ae sa teena o Ia e Ona uso Iutaia, e aofia ai i latou i Lona nuu moni ma tagata o Lona aiga. E oo lava i Ona lava soo sa lei malamalama atoatoa i Lana misiona paia.

O Luka e masani ona talitonuina o le “fomai pele” lea na faasino i ai le Aposetolo o Paulo. O le uiga o le gagana Eleni i lana Evagelia atoa ua faaalia ai sa lelei lona aotauina. Atonu o ia o se Nuuese, pe e le o se tagata Iutaia. Ina ua mavae lona liua, na avea Luka ma soa faafaifeautalai a Paulo.

E lē o iloa tonu le taimi na tusia ai e Luka lana Evagelia, ae ua taumatemate le au atamamai e faapea, sa o le va o le 80 ma le 90 T.A. O punavai a Luka o tagata na “na molimau vaaitino mai le amataga” i le soifuaga ma le galuega a le Faaola.

Na tusi atu e Luka lana Evagelia iā Teofilo, o lē atonu o se alii Eleni e i ai sona tulaga taualoa faaagafesootai. “O Teofilo a le o se tagata e puipuia Luka po o se uo ma se tagata talitonu lea na manao Luka e faamalosia i le faatuatua ia Iesu Keriso.”

Talu ai o Teofilo o lona uiga o le “uo a le Atua,” atonu foi o ia o se sui o soo se tagata talitonu ia Keriso. Afai o le tulaga lea, atonu la o le galuega a Luka sa faamoemoe mo tagata o le Ekalesia, aemaise lava i tagata liliu mai o nuuese. E foliga mai sa manao Luka ia i latou o e faitau i lana molimau ia “iloaina le faamaoni” o le Alo o le Atua—Lona agaalofa, Togiola, ma le Toetu.

O Luka o le Evagelia aupito umī lea o Evagelia e fā ma o loo i ai anomea e sili ona tulaga ese o le otootoga o Evagelia. O nisi autu nei ma vaaiga tulaga ese o le Evagelia a Luka:

• O Iesu o le Faaola mo tagata uma. Sa faamamafa mai e Luka le malamalama lelei o le Faaola mo i latou o e o loo mafatia ma Lona popole mo i latou ua manatu ua faate’aeseina ma agasala. Ua na o le Evagelia a Luka o loo tusi faamaumau ai faatonuga a le Faaola i Fitugafulu e folafola atu le talalelei i tagata uma.

• O le malumalu o le maota o le Atua. O le Evagelia a Luka e amata ma faaiu i tala o tagata i le malumalu, e faailo mai ai le taua o le malumalu o se nofoaga autu o fegalegaleaiga a le Atua ma Ona tagata.

• Sa i ai se matafaioi taua o tamaitai i le soifuaga o Iesu. E amata le Luka i tala i ni tamaitai faamaoni se toalua na filifilia e le Atua—o Elisapeta, le tina o Ioane le Papatiso, ma Maria, le tina o Iesu. Na ia ta’ua isi tamaitai faamaoni o e na mulimuli ia Iesu ma lagolagoina o Ia. Na ia ta’ua foi, o se vaega o tamaitai faamaoni na mua’i tautino mai ua toetu mai Iesu mai le oti.

• Ua i ai ia Iesu se tino toetu o aano ma ivi. O le talaaga o Luka o se fomai atonu e mafai ona faamatala ai ni faamatalaga patino o loo aofia ai i lana Evagelia. Mo se faataitaiga, ua na o le Evagelia a Luka o loo ta’ua ai le tafetotoi o le Faaola mai puafu uma i Ketesemane ma i ai se tino toetu o “aano ma ivi.”

E lei faasino lava le tusitala o le Evagelia a Ioane ia te ia lava i lona igoa, e ui ina ta’ua o ia o le “soo ua alofaina e Iesu.” Ua faamautu mai e faaaliga o aso e gata ai e faapea, o le “soo ua alofaina e Iesu” o Ioane ma sa faaee i ai e le Faaola le mana e faaauau ai ona galue i le lalolagi seia oo i le Afio Mai Faalua.

Na fautua mai uluai tusitala Kerisiano e faapea, na tusia e Ioane lenei tusi i Efeso, lea sa i Asia Itiiti (o Take i aso nei). E talitonu le au atamamai atonu na tusia e Ioane lana Evagelia i se taimi i le va o le 90 ma le 110 T.A.

O le tala a Ioane ua faamatalaina o se Evagelia na tusi atu i tagata o le Ekalesia o e ua uma ona i ai sina malamalama e uiga ia Iesu Keriso. Ae i lana Evagelia, na valaaulia ai e Ioane tagata uma ina ia “talitonu o Iesu o le Keriso.” O lenei valaaulia e aofia ai i latou e le’i talitonu ia Keriso faapea foi i latou o loo saili e faamalosia lo latou faatuatua ia te Ia.

Pe tusa o le 92 pasene o le anomea o le Evagelia a Ioane e le o maua i isi Evagelia. Mo se faataitaiga, mai vavega e fitu na lipotia mai e Ioane, e lima e le o tusi faamaumauina i se isi Evagelia. E ui o loo tuuina mai e Mataio, Mareko, ma Luka se faamatalaga tele e uiga i le galuega a Iesu i Kalilaia, sa tusi faamaumauina e Ioane le tele o mea na tutupu i Iutaia.

O le Evagelia a Ioane e oa i aoaoga faavae, faatasi ai ma nisi o ona autu tetele o le paia o Iesu o le Alo o le Atua, o le Togiola a Keriso, ola e faavavau, o le Agaga Paia, ma le uiga ma le taua o le talitonu.

O nisi nei o isi autu ma vaaiga tulaga ese o le Evagelia a Ioane:

• Ua lisi mai e Ioane le tele o igoa ma faalagiga mo Iesu Keriso. O Ioane o loo aofia ai ni faalagiga mo Iesu e le o maua i isi Evagelia. Mo se faataitaiga, ua faamatalaina e Ioane ia Iesu o le Upu, o le Tamai Mamoe a le Atua, o le Malamalama o le Lalolagi, ma le Leoleo Mamoe Lelei.

• O Iesu o le avefeau a le Tama Faalelagi i le lalolagi. E sili atu i lo se isi lava tusitala o Evagelia, sa faamamafaina e Ioane le paia o Iesu o le Alo o le Atua. Na tusi faamaumauina e Ioane le molimau a Iesu lava ia i Lona paia ma le faailoa mai o Ieova o le Feagaiga Tuai. Na tusi faamaumauina e Ioane le tele o taimi na faasino atu ai Iesu i Lona Tama. Ua faamamafa mai i le Evagelia a Ioane e faapea, na auina mai Iesu e le Tama ma e na o Ia lava e mafai ai ona tatou toe foi atu i le Tama.

• Na fofogaina e le Faaola le Tatalo o le Faatoga. O se tasi o saofaga tele a Ioane, o lona faaaofia ai lea o aoaoga a le Faaola i Ona soo i nai itula a o loma Lona maliu, e aofia ai le Tatalo o le Faatoga.