Suesueina o le Feagaiga Fou

O le Feagaiga Fou o se faamaumauga o le soifuaga, aoaoga, ma le misiona a Iesu Keriso. O loo aoao mai ma molimau mai i Lana taulaga togiola ma le Toetu. O loo tuuina mai ai foi se tala i le galuega a Ona soo e faasalalau atu le talalelei ma faatuina Lana Ekalesia.

O le upu sa faaliliuina o le testament [feagaiga] e mafai foi ona faaliliuina o le covenant [feagaiga]. O lea la, o le Feagaiga Fou o le feagaiga [maliliega] fou. Ua faamamafa mai i le Feagaiga Fou na faataunuuina e Iesu Keriso le tulafono a Mose—le feagaiga tuai. Sa aoao atu e le Faaola ma Ona soo le feagaiga fou e fesoasoani ai i fanau a le Atua e toe foi atu e nonofo i Lona afioaga.

E 27 tusi i le Feagaiga Fou. O nei tusi sa tele lava ina tusia, e ui e le na o Aposetolo, a le Alii o Iesu Keriso. Ua masani ona vaevaeina i Evagelia, o Galuega a le Au Aposetolo, o tusi a Paulo, o Tusi lautele, ma le tusi o Faaaliga.

E leai ni uluai tusitusiga o loo i ai na tusia e tusitala o le Feagaiga Fou. O uluai tusiga o tusi taitasi o loo i ai i le Feagaiga Fou na sosoo ma le 200 T.A. O uluai faaputuga o tusi o le Feagaiga Fou na iloaina e oo mai i le seneturi lona fa.

Mai lava i le ulua‘i senituri, na amata ona gaosia e Kerisiano ni kopi o tusitusiga o le Feagaiga Fou i se tusi. O se tusi sa i ai se faatulagaga o se tusi, e eseese itulau e fusia faatasi, nai lo o se tusi tā‘ai, lea sa avea ma auala masani e tusia ai tusitusiga o le Feagaiga Tuai. Atonu o se mea moni lea o le atinaega o le aofaga o tusi ua lauiloa nei o le Tusi Paia. O le upu Tusi Paia e maua mai i le faa-Eleni o le biblia, ma o lona uiga moni o “tusi.” O le tusi gaosi, o se aofaiga tele o tusi e mafai ona fatuina i se voluma tuufaatasi.

O nisi o uluai tusi o le Feagaiga Fou na lapatai mai e uiga i le liliuese i le uluai Ekalesia. O le liliuese o le taimi lea e liliuese ai tagata taitoatasi po o vaega mai mataupu faavae o le talalelei. Ina ua uma ona fasiotia Aposetolo a Iesu Keriso, sa faatelevaveina le liliuese. Sa faaseseina ma suia upumoni ma feagaiga o le talalelei. A o faasolo ina salalau solo le liliuese, sa aveesea e le Alii Ana ki ma le pule o le perisitua mai le lalolagi.

Na oo mai faatasi ma le liliuese ni vaega faatauva o Kerisiano. Sa maua e vaega taitasi le lagolago faaletusi paia mo o latou talitonuga eseese. A o faateteleina finauga, na lagona e Kerisiano le mana‘omia ona aoina mai se tuufaatasiga o tusitusiga faa-Kerisiano ua taliaina. Sa latou talitonu o nisi o tusitusiga sa moni a o isi sa fesiligia, o nisi foi sa tele atu le taua nai lo isi.

Mulimuli ane, na taumafai ai ta‘ita‘i Kerisiano o le senituri lona tolu ma le fā e iloa po o ā mau o le a taliaina e avea ma tusitusiga paia. O se tasi o tuutuuga sa latou faaaogaina o le, pe na tusia se tusiga e se Aposetolo pe na fesootai foi. Na latou iloiloina fo‘i le lelei o le ōgatusa o se mau ma talitonuga masani faa- Kerisiano. O le fuafaatatau lona tolu na iloiloina ai pe o se tusi na lagolagoina lautele e tagata Kerisiano.

I le faaaogaina o nei vaega, i le T.A. 367 na fautuaina ai e Athanasius, le epikopo o Alesania i Aikupito, se lisi o loo i ai tusi e 27 o loo i ai nei i le Feagaiga Fou o loo faaaogaina e le toatele o Kerisiano. E ui lava ina sa taliaina lautele lana lisi, ae e leai lava se lisi o tusi o le Feagaiga Fou o loo faaaogaina ma malilie i ai Kerisiano uma.

I le faitau selau o tausaga mulimuli ane, na faaliliuina ai lomiga eseese o le Feagaiga Fou i gagana o loo tatou faaaogaina i aso nei. O le toatele o tagata na nafa ma le faaliliuina ma le mauaina o le Tusi Paia na faia ni osigataulaga tetele, “e oo lava i le oti, e aumai ai le afioga a le Atua mai le le iloa.”

Mai le 1604 e oo i le 1611, pe tusa ma le 50 tagata atamamai na tofia e le tupu o Egelani o James I, na galulue i se faaliliuga fou faaPeretania o le Tusi Paia. Na lauiloa le King James Version, o nisi taimi e ta‘ua o le Lomiga Faatagaina.

Sa faalagolago le ‘aufaaliliu i faaliliuga o le Tusi Paia faaPeretania muamua. Sa latou sa‘ili fo‘i i isi punaoa aogā, e aofia ai tusiga o mau o le Tusi Paia i le gagana Eperu ma le Eleni. O le Lomiga a King James o le Tusi Paia lea na suesueina e Iosefa Samita. O le King James Version e tumau lona taua i le Ekalesia toefuataiina a Iesu Keriso o le Au Paia o Aso e Gata Ai. O lana vaogagana ma le ituaiga o gagana e mafai ona vaaia i le Tusi a Mamona atoa faapea foi le Mataupu Faavae ma Feagaiga.

Na tusia e le Au Peresitene Sili e faapea:

E ui o isi lomiga o le Tusi Paia atonu e sili ona faigofie ona faitauina nai lo le Lomiga a King James, ae i mataupu faaaoaoga faavae e lagolagoina ai e faaaliga o aso e gata ai le Lomiga a King James e sili atu nai lo isi faaliliuga faaPeretania. O Peresitene uma o le Ekalesia, e amata mai i le Perofeta o Iosefa Samita, ua latou lagolagoina le Lomiga a King James e ala i le fautuaina o le faaaogaina pea i le Ekalesia. I se faamalamalamaga o mea uma o i luga, o le Tusi Paia i le gagana Peretania lea o loo faaaogaina e Le Ekalesia a Iesu Keriso o le Au Paia o Aso e Gata Ai.

I le faaputuga o Tusitusiga Paia i le Potutusi o le Talalelei, e mafai ona e maua ai Faaliliuga ma Faatulagaga. Filifili le “Tusi Paia” e vaai ai i se lisi o faaliliuga o le Tusi Paia ua lolomiina pe ua taliaina e faaaoga e Le Ekalesia a Iesu Keriso o le Au Paia o Aso e Gata Ai.

Na faaalia e le Perofeta o Iosefa Samita se alofa ina a maoae mo le Tusi Paia i lona soifuaga atoa. Ae ui i lea, na ia iloa na i ai ni faaletonu i le tusiga. Sa ia saunoa mai: “Ou te talitonu i le Tusi Paia i le faitauina mai i tusitusiga a uluai tusiupu. O le au faaliliu le magafagafa, o le au tusitusi faatamala, po o ositaulaga taufaasese ma le le faamaoni na latou faia ni mea sese e tele.”

I le taumafanafana o le 1830, na amata ai e le Perofeta se faafouga po o se faaliliuga o le King James Version o le Tusi Paia i le faaPeretania. Sa ia manatu i ai o se vaega o lona valaauga faaperofeta. Na faamaeaina e Iosefa le tele o ana galuega ia Iulai 1833, e ui ina sa faaauau pea ona ia faia ni suiga laiti i lana tusitusiga seia oo ina maliu o ia i le 1844.

E lei faaliliuina e le Perofeta le Tusi Paia mai le tasi gagana i le isi. E le‘i faaaogā fo‘i e ia tusitusiga Eperu ma Eleni pe faalagolago fo‘i i tusitusiga. Nai lo lena, na faitau ma suesue Iosefa i fuaitau mai le Lomiga a le King James o le Tusi Paia, ona faia lea o faasa‘oga ma faaopoopoga e pei ona musuia ai e le Agaga Paia. O lana ulua‘i faaliliuga na i‘u ai i ni fuaitau uumi na faalauteleina ai tala ma a‘oa‘oga faale-tusipaia. O faataitaiga o lenei mea e aofia ai le tusi a Mose ma Iosefa Samita—Mataio. O isi faafouga na aofia ai “suiga laiti na faaleleia ai le kalama, faamanino ai le uiga, gagana faaonapo nei, faasa‘oina o manatu o aoaoga faavae, po o le faaitiitia o le le ogatusa.”

Sa taua e Elder Dallin H. Oaks e faapea o le Faaliliuga a Iosefa Samita o le Tusi Paia “o se tasi o le aigatupu o tusitusiga paia. … E tatau ona matauina ma faamamaluina i soo se taimi pe a i ai.”

O le tele o faafouga musuia a le Perofeta e mafai ona maua i le Faaopoopoga o le Faaliliuga a Iosefa Samita, o loo maua i le Fesoasoani mo Suesuega i le Potutusi o le Talalelei. E mafai foi ona maua i vaefaamatalaga ma le faaopoopoga o le Tusi Paia i lomiga a le Au Paia o Aso e Gata Ai o le Tusi Paia.

• M. Russell Ballard, “O le Vavega o le Tusi Paia,” Liahona, Me 2007, 80–82.

• Neal A. Maxwell, “O Le Feagaiga Fou—o se Ata e Le Mafaatusalia o le Faaola,” Liahona, Tes. 1986, 20–27

• Shon D. Hopkin, “OLe Auala na Fausia ai Soo o le Feagaiga Fou i Luga o Faavae o le Feagaiga Tuai” (na o le tusiga faafuainumera), Liahona, Ian. 2023, Potutusi o le Talalelei

• Autu o Talafaasolopito o le Ekalesia, “Faaliliuga a Iosefa Samita o le Tusi Paia,” Potutusi o le Talalelei

• “O Faamanuiaga o Tusitusiga Paia” (3:03) o loo faamatala ai le saofaga a Viliamu Tiniteli i le faaliliuina ma le lolomiina o le Tusi Paia i le Igilisi.

  

  3:4

• “History of the Translation of Biblia Sagrada” (5:41) o loo faamatala ai le tala ia Joao Ferreira Annes de Almeida, le faaliliu o le Tusi Paia i le gagana Potukale.

  

  5:41