Mataio 28; Mareko 16; Luka 24; Ioane 20–21

E mafai ona e amata i le faaali atu pe faasoa atu le aafiaga lenei na faamatala e Elder John M. Madsen e uiga i le faalogo atu i se lauga a Elder Bruce R. McConkie.

Sa tuuina atu e Elder McConkie se lauga e uiga i le Pa’u ma fesili atu, “E faapefea ona e faamaonia o Iesu o le Keriso?” Sa leai se tasi na tali mai. Ona ia ta’ua lea, “E totonugalemu uma lava i le Toetu.” Na sosoo ai ma lana fesili, “E faapefea ona e faamaonia le Toetu?” Sa toe filemu foi, seia oo ina tautino mai e Elder McConkie, “E totonugalemu uma lava i … ” (tagai Marianne Holman, “Easter Is ‘the Lord’s Day,’” Church News, Ape. 1, 2013).

Fesili atu i tagata aoga pe ono faapefea ona latou faaumaina le fuaiupu. Ona faasoa atu lea o le tali a Elder McConkie o “molimau.”

• O le a se mea tulagaese ua e mauaina mai le tali a Elder McConkie? (Afai e manaomia, toe iloilo nisi o mau faasino i le tulafono o molimau i le “Molimau” i le Taiala i Tusitusiga Paia [Potutusi o le Talalelei] pe matamata i le “Tulafono a Molimau” [0:26]).

  

  0:27

• Aisea e taua ai mo i tatou taitoatasi le faalagolago i le tulafono o molimau a le Alii?

Faamalamalama atu o le a suesue e tagata aoga tala ia i latou o e na avea ma molimau patino o le Keriso toetu. Faaali atu tala nei o le Toetu o le Faaola, ma fai atu i tagata aoga e fai ni vaega e toatolu tagata. Fai atu i tagata taitoatasi o le vaega e filifili se tala e ese mai e suesue ai. A o latou suesue filemu i la latou tala filifilia, valaaulia i latou e vaavaai mo (1) po o a aafiaga na maua e tagata taitoatasi po o tagata faatasi ma Keriso toetu ma (2) mea na latou aoaoina e uiga ia te Ia ma Lona Toetu. Fai atu ia i latou e faasoa mai i a latou vaega mea na latou aoaoina pe lagonaina a o latou faitauina la latou tala.

• Maria le Makatala: Ioane 20:11–18

• O soo e toalua i le ala i Emau: Luka 24:13–32

• Aposetolo e Toasefulu: Luka 24:33–48

A mae’a le taimi mo talanoaga faalevaega, valaaulia nisi o tagata aoga e faasoa mai pe na faapefea ona uunaia lo latou faatuatua ia Iesu Keriso e ala i le faitau ma talanoa e uiga i aafiaga o nei molimau.

Faailoa atu o nisi tagata atonu e tauivi e talitonu i upu a nei molimau aua, mo i latou, o le vaai o le talitonu lea. Valaaulia tagata aoga e faitau le Ioane 20:24–29, ma vaavaai mo mea na aoao atu e le Faaola ia Toma e uiga i le talitonu.

• O le a le upumoni taua na aoao atu e le Faaola ia Toma? (Fesoasoani i tagata aoga e saili se upumoni e pei o lenei: Ua faamanuiaina i tatou i le filifili e talitonu o loo soifua Iesu Keriso e tusa lava pe tatou te lei vaai ia te Ia.)

• O a faamanuiaga ua oo mai (pe mafai foi ona oo mai) ia te oe mo le filifili e talitonu ia Iesu Keriso e aunoa ma le vaai ia te Ia? O le a le mea na sili ona fesoasoani ia te oe e faamalosia ai lau molimau ma le talitonu i le Faaola?

Mafaufau e faaali atu le fuaitau lenei a Peresitene Henry B. Eyring:

Sa aoao e le Alii Lana Aposetolo o Toma, sa manao i se faamaoniga faaletino o le Toetu o le Faaola e ala i le tagotago i Ona manua, o le faaaliga o se faamaoniga saogalemu atu: “Ua fetalai atu Iesu ia te ia, Toma e, ua e talitonu, aua ua e vaai mai ia te au: Amuia o e le vaai mai, a e talitonu mai pea” (Ioane 20:29).

O upumoni o loo faailoga ai le ala i le aiga i le Atua ua faamaonia e le Agaga Paia. …

O le faamaoniga o le upumoni e oo mai i se atalii po o se afafine o le Atua o lē ua mauaina le aia tatau e maua ai le Agaga Paia. (“O le Agaga Paia e fai ma Au Soa,” Liahona, Nov. 2015, 105)

• O le a se mea e mafai ona tatou aoao mai le saunoaga a Peresitene Eyring e uiga i le matafaioi a le Agaga Paia?

Valaaulia tagata aoga e tusi se molimau puupuu i le auala na latou iloa ai, pe fia iloa ai, na toetu Iesu Keriso. E mafai foi ona latou faamaumauina o latou lagona e faatatau i le uiga o lena mea mo i latou ma tagata taitoatasi i le lalolagi. Uunaia i latou e faasoa atu mea na latou tusia i se isi tagata i le vasega, e ala i ala o faasalalauga faaagafesootai, po o isi auala.

Toe foi i le “Filifiliga o Gaoioiga e Aoao Ai.”

E mafai ona e faaali atu ata o loo i ai ma valaaulia tagata aoga e faasoa mai ni lagona atonu na lagonaina e soo a o latou vaavaai atu i le maliu o Iesu ma vaaia ai Lona tino ua leai se ola o faataoto i se tuugamau. Faailoa atu e oo mai i le taimi lenei, latou te lei malamalama lelei i le uiga o le tala a Iesu Keriso ina ua Ia fetalai mai o le a toetu mai o Ia (tagai Luka 18:34; Ioane 12:16).

• Aisea ua avea ai le maliu o se tasi e pele o se aafiaga faigata tele?

Mafaufau e faaali atu le saunoaga lenei a Peresitene Gordon B. Hinckley:

Pe a uma le manava mulimuli o le ola, e i ai se faaiuga e faatusatusa i se isi lava faaiuga. Pe a faataoto e se tamā ma se tina le tino o se fanau pele i le malulu o le tuugamau, e iai le faanoanoa e toetoe lava a le mafai ona faamāfanafanaina. Pe a tanumia e se [toalua] le soa o [lo latou] olaga, e i ai se lagona tuuatoatasi e ootia ma e le mapu. … Pe a leai ni matua o fanau na alolofa ma tausia i latou, e i ai se mativa matautia e leai se isi lava mativa e faatusatusa i ai. E paia le olaga, ma e faanoanoa le oti. E fiafia ma faamoemoe le olaga. O le oti e paia ma pogisa. E matagofie i lona filemu ma le mautinoa. (“The Empty Tomb Bore Testimony,” Liahona, Me 1988, 66)

Faitau faatasi le Luka 24:36–48 pe matamata le “Ua Faaali Mai le Alii Toetu i Aposetolo” (2:21), ma vaavaai mo mea na aoaoina e Aposetolo e uiga i le Toetu o le Faaola. (E mafai ona faailoa mai e tagata aoga se upumoni e talitutusa ma lenei: O Iesu Keriso e i ai sona tino toetu ma le tino e mafai ona pa’i atu i ai o aano ma ivi.)

2:22

Ina ia fesoasoani i tagata aoga e mafaufau loloto e uiga i le auala e mafai ai e le talitonu i le Toetu o le Faaola ona suia le vaaiga a se tasi i le oti, tuuina atu le pepa e tufa atu “Mauaina o le Faamoemoe i le Toetu o Iesu Keriso”:

A ua lava se taimi e suesue ma mafaufau loloto ai tagata aoga, valaaulia i latou e faatulaga ni vaega toalaiti ma faasoa mai po o a upumoni o le a latou aoaoina atu i la latou lauga o le maliu. Uunaia i latou e faasoa mai foi o latou lagona e uiga i le Toetu o le Faaola.

E mafai ona e faaiuina i le matamata i le “Mauaina o le Faamoemoe e ala i le Toetu o Keriso” (4:41) ma valaaulia tagata aoga e faasoa mai pe faape’i le toe feiloai atu i e pele ua maliliu i le tino.

4:42

Toe foi i le “Filifiliga o Gaoioiga e Aoao Ai.”

Mafaufau e valaaulia tagata aoga e faamaumau mea na faaaluina o latou taimi i nai aso ua mavae atu. Faamatala o le a latou faaaogaina le lisi lenei i se taimi mulimuli ane o le gaoioiga e aoao ai.

Valaaulia tagata aoga e su’e i le Ioane 21. Faailoa atu o mea na tutupu i lenei tala na tutupu ina ua mavae le toetu o Iesu Keriso ma ua le toe nonofo faatasi ma Aposetolo. Otooto le Ioane 21:2–14, ona valaaulia lea o tagata aoga e faitau le Ioane 21:15–17, ma vaavaai mo le savali a le Faaola ia Peteru. E mafai ona e faaali atu le ata lenei ma talanoaina po o le a le mea e ono faatusa i ai le vaa, upega, ma le i’a i le olaga o Peteru.

• Afai e fetalai atu Iesu ia te oe i fesili lava nei na fesiligia ai Peteru, o le a sou manatu i le mea o le a Ia faatatau i ai upu “latou nei” i lou olaga? (E mafai ona vaai tagata aoga i mea na latou faamaumauina i le amataga o lenei gaoioiga mo tali e ono i ai.)

• O le a le mea na aoao atu e Iesu Keriso ia Peteru? (E mafai ona faailoa mai e tagata aoga se mataupu faavae e pei o lenei: Afai tatou te alolofa ia Iesu Keriso, o le a tatou fafagaina Ana mamoe ma auauna atu i manaoga o isi.)

• Aisea e te manatu ai sa taua mo Peteru ona iloa le sootaga i le va o le alofa mo le Faaola ma le auauna atu i isi?

Mafaufau e faasoa atu le faamatalaga lenei a Elder Patrick Kearon:

Aisea na fesili faatolu ai le Faaola ia [Peteru] pe alofa ia te Ia? … Sa Ia manaomia ia malamalama Peteru i le uiga o le avea ma se soo o Keriso toetu. … O le a le mea na finagalo ai le Alii mai ia Peteru? Sa manao o Ia ia Peteru e fafaga Ana mamoe, Ana tamai mamoe. O le galuega lea sa manaomia ona fai. …

E mafai ona faapea lau fesili, e tali atu ai i le valaau e auauna atu, “O fea ou te amata ai?” Amata i le tatalo. …

Fesili i lou Tama i le Lagi po o le a se mea e mafai ona e faia, ma mo ai. Soo se galuega itiiti lava o le agalelei atu e mafua ai ona tatou mafaufau i isi ma oo mai ai ona lava faamanuiaga. Tali atu i soo se uunaiga e te mauaina, po o le a lava le itiiti e ono foliga mai ai. Galue ai. …

E pei ona ta’ua e Sister Jean B. Bingham, “O nisi taimi tatou te manatu ai e ao ona tatou faia se mea silisili ma toa e ‘faitaulia’ ai o se auaunaga i o tatou tuaoi. Ae o faatinoga faigofie o auaunaga e mafai ona i ai ni aafiaga loloto i isi—faapea foi i tatou lava” [“Auauna Atu e Pei ona Faia e le Faaola,” Liahona, Me 2018, 104]. (“O Se Faailoga o le Ekalesia Moni ma le Ola a le Alii” [faigalotu i le lalolagi atoa mo le autalavou matutua, Me 6, 2018], broadcasts.ChurchofJesusChrist.org)

E mafai ona e fai atu i tagata aoga e faasoa mai ni faataitaiga o faatinoga faigofie o auaunaga na latou mauaina talu ai nei ma o latou lagona e uiga ia i latou. Valaaulia i latou e mafaufau ma le agaga tatalo i se faatinoga faigofie o le auaunaga e mafai ona latou tuuina atu i le asō po o taeao e faaali atu ai lo latou alofa mo le Faaola.

Toe foi i le “Filifiliga o Gaoioiga e Aoao Ai.”