“O Le Keriso Soifua,” Tusi Lesona a le Faiaoga Inisitituti o le Feagaiga Fou (2025)

O Le Keriso Toetu, saunia e Walter Rane

O Le Keriso Soifua

I le aso 1 o Ianuari, 2000, na tuuina mai ai e le Au Peresitene Sili ma le Korama a Aposetolo e Toasefululua se folafolaga ua ta’ua “O Le Keriso Soifua: O Le Molimau a le Au Aposetolo” (Gospel Library). I lenei pepa o faamatalaga faasolopito, ua molimau mai ai Aposetolo i le soifuaga e le mafaatusalia, misiona paia, ma matafaioi paia a Iesu Keriso.

Manatua: E mafai ona aoaoina lenei lesona i soo se vaega i le taimi o lenei kosi. Mo se faataitaiga, e mafai ona e aoao atu lenei mea o le lesona muamua o le kosi, i le vaiaso o le Eseta, pe a uma ona suesue i Evagelia e fa, po o le faaiuga o le kosi.

O Punaoa Faaopoopo

Manatua: O le “Faatomuaga i le Kosi” ua tuuina mai ai le taitaiga i le auala e faaaoga ai elemene faatulagaina e fa o lesona o loo mulimuli mai.

Fautuaina Suesuega Faaletagata Lava Ia

A o lei amataina le vasega, mafaufau e auina atu i tagata aoga se tasi o savali nei, e faalagolago lea i le taimi o le tausaga e te aoaoina atu ai lenei lesona. E mafai foi ona e filifili e faasoa atu ni a oe lava ia savali.

Ae e te lei amataina lau suesuega o le Feagaiga Fou, faitau le “O Le Keriso Soifua: O Le Molimau a le Au Aposetolo.” A o e faitau, faailoa mai upumoni e uiga ia Iesu Keriso e te manao ia malamalama lelei ai ma lagona loloto atili.
Ua uunaia i tatou e Peresitene Russell M. Nelson ina ia taulai atili atu i le Faaola i le vaiaso a o lumanai le Eseta (tagai “This Easter, Find Peace in Jesus Christ,” Inspiration (blog), Mat. 28, 2021, ChurchofJesusChrist.org). Faitau ma mafaufau loloto i le “O Le Keriso Soifua: O Le Molimau a le Au Aposetolo” ina ia avea ai lau Eseta o se aafiaga e sili atu ona taulai atu ia Keriso.
A o faaiuina la tatou suesuega o le Feagaiga Fou, faitau le “O Le Keriso Soifua: O Le Molimau a le Au Aposetolo.” Mafaufau pe na faapefea ona faatupulaia lau lava molimau i le Faaola i le taimi o lenei kosi o suesuega.

Fesili ma Fetufaa’iga

Tuu atu se taimi i tagata aoga e fai ai fesili ma faasoa mai ni malamalamaaga ma upumoni na latou maua i a latou suesuega faaletagata lava ia “O le Keriso Soifua: O le Molimau a le Au Aposetolo.”

Aoaoga o Tomai

O le gaoioiga suesue i le pepa e tufa atu “Suesue ’O Le Keriso Soifua’” e mafai ona avea o se nofoaga aoga e faaaoga ai le tomai “Saili i Tusitusiga Paia ma le Gospel Library” i le Tomai mo le Suesueina o Tusitusiga Paia.

Gaoioiga e Aoao Mai Ai

O Le Keriso Soifua: O Le Molimau a le Au Aposetolo

O le a se mea e mafai e le “O Le Keriso Soifua” ona aoao mai ia te au e uiga i le Faaola?

Valaaulia tagata aoga e vaai faalemafaufau faapea na fesili mai se tasi e le auai i la tatou faatuatuaga, “O le a se mea e te talitonu i ai e uiga ia Iesu Keriso?”

Valaaulia tagata aoga e faaalu ni nai minute ma tusifaamaumau mea e sili ona taua latou te mananao e faasoa atu e uiga i le Faaola.

A uma ona maua se taimi e tusifaamaumau ai e tagata aoga o latou manatu, faamanatu atu ia i latou faapea, i le aso 1 o Ianuari, 2000, na faasoa mai ai e le Au Peresitene Sili ma le Korama a Aposetolo e Toasefululua mea sa latou lagonaina sa taua e uiga i le Faaola i le “O Le Keriso Soifua: O Le Molimau a le Au Aposetolo.”

A o lei suesueina le “O Le Keriso Soifua,” mafaufau e faasoa atu le saunoaga lenei a Elder Robert D. Hales:

O loo o ese le lalolagi mai le Alii i se saoasaoa faateleina nai lo se isi lava taimi muamua. Ua faasaolo solo le tiapolo i le lalolagi. Ua tatou matamata, faalogo, faitau, suesue, ma faasoa atu upu a perofeta ina ia muai lapataiina ma puipuia ai i tatou. Mo se faataitaiga, “O Le Aiga: O Se Folafolaga i le Lalolagi” ua leva ona tuuina mai ae tatou te le i taitai oo i luitau ua feagai nei ma aiga. “O Le Keriso Soifua: O Le Molimau a Aposetolo” ua leva ona tapena mo le taimi o le a sili ona tatou manaomia ai. (“Konafesi Aoao: Faamalosia o le Faatuatua ma le Molimau,” Liahona, Nov. 2013, 7)

O le a se mea na tulagaese ia te oe mai lenei saunoaga?

Tufatufa atu le pepa e tufa atu ua faaulutalaina “Suesue i le ’O Le Keriso Soifua.’” Tuu atu i tagata aoga se taimi e faatumu taitoatasi ai le pepa e tufa atu. E mafai ona e valaaulia tagata aoga e suesue atoa le “O Le Keriso Soifua“ mo lenei gaoioiga e aoao ai. Pe mafai foi ona e tofia tagata aoga i ni vaega eseese o le pepa o faamatalaga e suesue ai.

Suesue le pepa na tufa atu, “O Le Keriso Soifua”

A mae’a ona suesue tagata aoga, valaaulia i latou e faasoa a latou tali mai a latou pepa e tufa atu i se paga po o se vaega toalaiti. Ona mafaufau lea e talanoaina faatasi o se vasega ni nai fesili e pei o fesili nei:

O a ni mea na e aoaoina po o ni ou lagona e uiga i le Faaola ao e suesue i le “O Le Keriso Soifua”?
O a ni auala e te manatu e taua ai upumoni o loo aoaoina i le “O Le Keriso Soifua” i le lalolagi i aso nei? O ai e mafai ona e faasoa atu i ai nei upumoni?
E mafai faapefea e le iloaina ma le talitonu i upumoni o loo i le “O Le Keriso Soifua” ona uunaia le auala e te ola ai i lou olaga?

Ina ia faaiu, tuu atu i tagata aoga se taimi e mafaufau ai po o le a se mea latou te ono faaopoopo i mea na latou tusia i le amataga o lenei gaoioiga. E mafai e tagata aoga ona faasoa atu o latou manatu toe faafouina e uiga i le Faaola i se paga po o ni vaega toalaiti.

Molimau atu i upumoni e uiga ia Iesu Keriso na outou talanoaina i le lesona lenei. Uunaia tagata aoga e tusifaamaumau musumusuga faaleagaga na latou maua ma faatino i latou.