Eperu 1–6

Mafaufau e faaali atu se ata o se mea na tupu mai le soifuaga o le Faaola e pei o le ata o loo i le amataga o le lesona lenei. Valaaulia tagata aoga e toe iloilo puupuu le mea na tupu o loo faaalia. Ona fesili atu lea:

• O le a se mea e mafai ona tatou aoaoina e uiga i uiga o Iesu Keriso mai lenei mea na tupu?

• E mafai faapefea e le aoao atili e uiga i matafaioi, faalagiga, ma uiga o Iesu Keriso ona faamalosia lo tatou faatuatua ia te Ia?

Faamalamalama atu faapea i lana tusi i tagata Eperu, na faamatalaina ai e Paulo le tele o faalagiga ma matafaioi a le Faaola. Mafaufau e valaaulia tagata aoga e fatu se lisi o matafaioi, faalagiga, ma uiga o le Faaola latou te faailoa mai i lenei gaoioiga e aoao ai. Valaaulia tagata aoga e gauai atu i mea ua aoaoina i latou e le Agaga Paia e uiga ia Iesu Keriso a o latou suesue.

Ina ia fesoasoani i tagata aoga ia latou suesuega, e mafai ona e faailoa atu ia faatonuga nei.

1. Suesue i ni nai fuaiupu nei, ma vaavaai mo faalagiga, matafaioi, ma uiga o Iesu Keriso: Eperu 1:1–6, 9–12; 2:7–10, 17–18; 3:1–2; 5:8–10.

2. Vaavaai mo auala e mafai ona e faamaeaina ai le fuaitau lenei: “E mafai ona ou maua le faatuatua ia Iesu Keriso ona …” (Mo se faataitaiga, E mafai ona ou maua le faatuatua ia Iesu Keriso ona e faatumauina e Ia mea uma e ala i le mana o Lana afioga [tagai i le Eperu 1:3].)

3. Filifili se matafaioi se tasi pe lua, faalagiga, po o uiga o le Faaola e suesue loloto atili ai. Faaaoga vaefaamatalaga, le Taiala i Tusitusiga Paia, po o le vaega o sailiga i le Gospel Library e sue ai fuaitau o mau, aoaoga a taitai o le Ekalesia, ma isi anotusi aoga.

Valaaulia tagata aoga e faasoa atu mea na latou aoaoina e uiga i le Faaola i se paga po o se vaega toalaiti. E mafai foi ona e valaauliaina i latou e talanoa i fesili nei.

• E mafai faapefea e le malamalama i lenei matafaioi, faalagiga, po o uiga ona faamalosia ai lou faatuatua ia Iesu Keriso?

• O le a se mea o fautua mai e lenei faalagiga, matafaioi, po o uiga e uiga i le auala e mafai ai e le Faaola ona fesoasoani ia te oe?

Faaiu le gaoioiga e aoao ai e ala i le faasoa atu o lau molimau ia Iesu Keriso. E mafai ona e valaaulia ni nai tagata aoga e faasoa mai a latou molimau. Uunaia tagata aoga e faaauau pea ona vaavaai i le taimi o a latou suesuega patino mo mea o loo aoao mai e tusitusiga paia e uiga i le Faaola.

Toe foi i le “Filifiliga o Gaoioiga e Aoao Ai.”

Mafaufau e amata lenei gaoioiga e aoao ai e ala i le talanoaina faatasi o fesili nei.

• O a nisi o luitau e sili ona taatele o feagai ma talavou matutua? (E mafai ona e tusiina tali a tagata aoga i luga o le laupapa.)

• O fea e liliu atu i ai tagata a o latou taumafai e taulima nei lu’itau?

Valaaulia se tamaitiiti aoga e faitau le saunoaga lenei a Peresitene Russell M. Nelson:

Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso. Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia! (“O Iesu Keriso Lava le Tali,” Liahona, Me 2023, 127)

• Aisea e te manatu ai o tali i o tatou luitau po o fesili e mafai ona maua i taimi uma i le soifuaga ma aoaoga a Iesu Keriso?

Valaaulia tagata aoga e mafaufau pe faafia ona latou liliu atu i le Faaola pe a latou feagai ma luitau po o fesili. Uunaia i latou a o latou suesue e gauai atu i uunaiga faaleagaga e mafai ona fesoasoani ia i latou ia maua le faatuatua sili atu ia Iesu Keriso.

Valaaulia tagata aoga e suesue le Eperu 2:7–18; 4:14–16, vaavaai mo aoaoga e uiga i le Faaola e mafai ona faateleina ai lo tatou manao e liliu atu ia te Ia. (Ina ia fesoasoani i tagata aoga ia malamalama lelei i le talaaga e faatatau i nei aoaoga, mafaufau e valaaulia i latou e faitau foi le “Eperu 1:4–2:10. Aisea na faatusaina ai Iesu Keriso i agelu?” i le Fesoasoaniga mo Tusituisga Paia: Feagaiga Fou.)

Mafaufau e fa’aali atu fesili nei. Valaaulia tagata aoga e talanoaina ma se paga po o se vaega toalaiti.

• O a aoaoga mai nei fuaiupu na e iloa e sili ona anoa? Aisea?

• E mafai faapefea e le malamalama i nei aoaoga ona aafia ai lo tatou manao e liliu atu ia Iesu Keriso pe a tatou feagai ma luitau?

A uma le talanoaga a tagata aoga, valaaulia niisi o i latou e faasoa o latou malamalamaaga ma le vasega. Afai e le o ta’ua e tagata aoga aoaoga mai le Eperu 2:18, mafaufau e faasino atu lo latou mafaufau i lena fuaiupu ma fai atu le fesili lenei:

• O le a sou manatu i le uiga o le faapea o Iesu Keriso “e mafai ai e ia ona fesoasoani i e ua tofotofoina”? (Afai e aoga, faitau faatasi le “Eperu 2:18. E mafai faapefea e Iesu Keriso ona fesoasoani ia i tatou pe a tofotofoina i tatou?” i le Fesoasoaniga mo Tusitusiga Paia: Feagaiga Fou.)

Valaaulia tagata aoga e faasoa mai se upumoni ua latou aoaoina e uiga ia Iesu Keriso mai le fuaiupu e 18. Atonu latou te faasoa mai se mea faapenei: Ona sa mafatia Iesu Keriso ma sa tofotofoina i mea uma, e mafai ai ona Ia fesoasoani mai ia i tatou i taimi o manaoga. (Na aoao mai foi e le perofeta o Alema i le Tusi a Mamona lenei upumoni. E mafai ona e valaaulia tagata aoga e faitau le Alema 7:11–12 ma, afai e faaaoga tusitusiga paia faaeletonika, ia faafesootai i le Eperu 2:18.)

• E mafai faapefea e le malamalama i lenei upumoni ona fesoasoani ia te oe e faalagolago atu ai i le Faaola? (I le avea ai ma se vaega o la outou talanoaga, e mafai ona e faasoa atu le saunoaga lenei a Elder Ulisses Soares.)

O le Faaola ua ofoina mai ia i tatou le toomaga ma le faamafanafanaga a o tatou feagai ma o tatou puapuaga, faaosoosoga, ma vaivaiga o le olaga faitino. E mafai ona ou faamautinoa atu e silafia e le aunoa e Keriso ia faigata tatou te oo i ai i le olaga nei. E malamalama o Ia i mea oona, matuitui, mafatiaga, ma tiga faaletino uma faapea foi i luitau faalelagona ma faaleagaga tatou te fetaiai. Ua faatumulia le loto o le Faaola i le alofa mutimutivale, ma ua Ia saunia pea e fesoasoani mai ia i tatou. E mafai e lenei mea ona sa Ia oo i ai ma tauaveina i Ona lava luga i le tino le tiga o o tatou vaivaiga. (“Iesu Keriso: O Le Tausisoifua o o Tatou Agaga,” Liahona, Me 2021, 83)

Valaaulia tagata aoga e mafaufau ma faasoa mai ni faataitaiga e faaalia ai le gafatia o le Faaola e fesoasoani ai i Lona nuu. E mafai ona avea nei mea ma faataitaiga mai o latou lava olaga, olaga o tagata latou te iloa, po o tagata i tusitusiga paia. Afai e manaomia e tagata aoga se fesoasoani e mafaufau ai i se faataitaiga, e mafai ona latou suesueina le Ioane 11:21–27, 32–36; Mosaea 24:11–15po o le Mataupu Faavae ma Feagaiga 122:5–9.

Valaaulia tagata aoga e manatunatu i mea na latou aoaoina ma lagonaina i le taimi o lenei gaoioiga suesue. Uunaia i latou e mafaufau ma faamaumau ni faatinoga na uunaia i latou e le Agaga Paia e fai. Molimau atu i le alofa o le Faaola mo i tatou ma Lona tomai e fesoasoani ai ia i tatou.

Toe foi i le “Filifiliga o Gaoioiga e Aoao Ai.”

Mafaufau e amata lenei gaoioiga e aoao ai i le faasoaina atu o le vaaiga faataitai lenei:

Sa avea Ieremia ma se tagata o le Ekalesia i ni nai tausaga. Talu ai nei, sa mafaufau ai o ia e toe foi i lona ala sa i ai muamua o le olaga aua ua ia lagonaina o le avea ma se tagata o le Ekalesia e manaomia ai le tele o mea.

• O ā ni ou manatu o i ai e uiga i lenei vaaiga faataitai?

• O le a se mea atonu e faigata ai i tagata ona avea ma tagata o le Ekalesia a le Faaola?

Valaaulia tagata aoga e mafaufau pe latou te iloa tagata o loo i ai i se tulaga e pei o lea o loo faamatalaina i le vaaiga faataitai. E mafai foi ona e valaaulia tagata aoga e mafaufau i isi tulaga latou te feagai e mafua ai ona latou lagona le lofituina po o le vaivai. Uunaia tagata aoga a o latou suesue e vaavaai mo upumoni e mafai ona fesoasoani ia i latou i nei tulaga.

Ina ia saunia tagata aoga e suesue le Eperu 3–4, faamalamalama atu faapea i le taimi o Paulo, sa oo ai Kerisiano Iutaia i sauaga ona o o latou talitonuga. E toatele na mafaufau e toe foi i o latou olaga sa i ai muamua ina ia ‘alofia ai nisi sauāga. O se tasi o faamoemoega o Paulo i le tusiaina o le tusi o Eperu o le fesoasoani lea i nei tagata ia tumau mausali i la latou tautinoga ia Iesu Keriso. (Mo nisi faamatalaga, tagai i le “O ai na tusia i ai le tusi o Eperu ma aisea?” i le Fesoasoaniga mo Tusitusiga Paia: Feagaiga Fou.)

Na faasoa mai e Paulo le tala ia Mose ma le fanauga a Isaraelu e fesoasoani ai i Kerisiano Iutaia ia malamalama i le matautia o le toe foi atu i se olaga fouvale ma le le talitonu. Valaaulia tagata aoga e suesue le Eperu 3:7–19 ma faailoa mai le savali a Paulo.

• O ā aoaoga na e maua atonu na fesoasoani i Kerisiano Iutaia o ē na mafaufau e lafoa’ia o latou talitonuga?

Faailoa atu o se tasi o taunuuga na feagai ma tagata Isaraelu o le le faatagaina lea o i latou e ulu atu i le laueleele folafolaina po o le malologa o le Alii (tagai i le Eperu 3:11, 18). Valaaulia tagata aoga e faitau le Eperu 4:11, ma vaavaai mo le valaaulia a Paulo i Kerisiano Iutaia.

• O le a sou manatu o le uiga o le ulufale atu i le malologa o le Alii? (Ina ia fesoasoani i tagata aoga ia malamalama lelei i lenei fuaitau, e mafai ona e valaaulia i latou e faitau le “Eperu 3:7–4:16. O le a le uiga o le ulu atu i le malologa a le Alii?” i le Fesoasoaniga mo Tusitusiga Paia: Feagaiga Fou.)

• O le a se mea ua e aoaoina mai aoaoga a Paulo e uiga i le auala e mafai ona tatou ulu atu ai i le malologa o le Alii? (Fesoasoani i tagata aoga e faailoa mai se upumoni e pei o lenei: Afai tatou te tumau faamaoni i le Faaola ma aua le faamaaaina o tatou loto, o le a tatou ulu atu i le malologa o le Alii [tagai foi Alema 12:34–37].)

• Aisea e te manatu ai o le malologa o le Alii o se faamanuiaga e taua ona tulituliloaina?

I le avea ai ma se vaega o la outou talanoaga o nei fesili, mafaufau e faasoa le saunoaga lenei a Peresitene Russell M. Nelson:

Uso e ma tuafafine pele, ou te faanoanoa mo i latou o ē tu’ua le Ekalesia ona ua latou lagona ua tele mea ua manaomia mai ia i latou i le avea ai ma tagata auai. Latou te le’i iloaina lava o le osiga ma le tausiga o feagaiga e faafaigofieina moni ai lava le olaga. O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. Faamolemole ia mafaufau loloto i lena upumoni ofoofogia!

O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. O lea, o ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua. …

… E ui i mea faalavefau ma mea taufaasese ua siomia ai i tatou, e mafai lava ona e mauaina le malologamoni—o lona uiga, o le mapusaga ma le filemu—e oo lava i le lotolotoi o ou faafitauli sili ona faigata. (“Manumalo i le Lalolagi ma Maua le Malologa,” Liahona, Nov. 2022, 96)

Valaaulia tagata aoga e mafaufau loloto pe na faapefea ona latou oo i le malologa o le Alii ma po o a ni faatinoga patino na latou faia na fesoasoani ia i latou e maua ai le malologa o le Alii. E mafai ona e valaaulia ni nai tagata aoga e faasoa mai o latou aafiaga. Atonu e te mafaufau e faasoa atu sou lava foi aafiaga.

Uunaia tagata aoga e mafaufau i mea e mafai ona latou faia e maua ai le tele o le malologa o le Alii i o latou olaga. Valaaulia i latou e faamaumau uunaiga faaleagaga latou te maua mai le Agaga Paia. Molimau atu e uiga i upumoni na outou talanoaina i lenei aso.

Toe foi i le “Filifiliga o Gaoioiga e Aoao Ai.”