Galuega 10–15

Faailoa atu le faamatalaga lenei: “E le talafeagai a’u ma o outou tagata i le Ekalesia”

• Aisea e ono lagona ai faapea se tasi?

Faamalamalama atu faapea, i lenei gaoioiga aoaoina, o le a aoao ai tagata aoga mai le aafiaga o Konelio ma Peteru e uiga i le taua o le taliaina ma le lagolagoina o i latou mai aganuu ma talaaga eseese.

Tusi le igoa Konelio i luga o le laupapa. Valaaulia tagata aoga e aoao mea uma latou te mafaia e uiga ia Konelio e ala i le faitauina o le Galuega 10:1–8 ma le “Galuega 10:1–8. O le a le mea sa taua i le liua o Konelio i le faa-Kerisiano?” i le Fesoasoaniga mo Tusitusiga Paia: Feagaiga Fou.

• O ā papupuni faaleaganuu atonu na feagai ma Konelio ina ua taumafai e liliu mai i le faa-Kerisiano?

Faamalamalama atu sa i ai se faaaliga vaaia a Peteru e fesoasoani e saunia ai le ala mo tagata liliu mai o Nuuese e pei o Konelio ina ia avea ma tagata auai atoatoa i le Ekalesia a le Faaola. Ina ia fesoasoani i tagata aoga ia malamalama i le faaaliga a Peteru, tuu atu ia i latou le pepa e tufa atu “Malamalama i le Faaaliga a Peteru.” E mafai e tagata aoga ona galulue taitoatasi, i paga, po o vaega toalaiti.

A uma ona tuu atu se taimi mo suesuega ma talanoaga, valaaulia tagata aoga e faasoa mai pe na faapefea ona latou taliina fesili o loo i le pepa e tufa atu. Ia mautinoa ua latou faailoa mai se upumoni e pei o lenei mai le Galuega 10:34–35: Ona e le faailoga tagata le Atua, o lea ua Ia ofoina mai ai le faaolataga i Ana fanau uma. Ina ia fesoasoani i tagata aoga e faaloloto lo latou malamalama e uiga i lenei upumoni, mafaufau e fai atu fesili nei:

• E te manatu o le a le uiga o le e le faailoga tagata le Atua? (E mafai foi ona tou faitauina le 2 Nifae 26:33.)

• O a uiga o le Tama Faalelagi ma Iesu Keriso o loo faaalia mai i lenei upumoni? E mafai faapefea e nei uiga ona aafia ai ou lagona e uiga ia i La’ua?

• E mafai faapefea e le iloaina o lenei upumoni ona aafia ai le auala e te taulimaina ai i latou o aganuu ma talaaga eseese?

Mafaufau e faitau ma talanoaina le saunoaga lenei a Peresitene Dieter F. Uchtdorf, a o avea ma se tasi o le Au Peresitene Sili:

Atonu e fai mai nisi, “E le talafeagai a’u ma o outou tagata i le Ekalesia.” …

O lou talaaga po o lou tuputupu ae atonu e foliga mai e ese mai mea e te vaaia i le tele o tagata o le Au Paia o Aso e Gata Ai, ae e mafai ona avea ma se faamanuiaga. Uso e ma tuafafine, uo pele, matou te manaomia a outou taleni ma manatu tulagaese. O le eseesega o tagata taitoatasi ma tagata e toatele i le salafa o le kelope, o le malosiaga lea o lenei Ekalesia. (“Sau, Auai Faatasi ma i Matou,” Liahona, Nov. 2013, 23)

E mafai ona e fai atu i tagata aoga e faasoa mai taimi na taliaina ai ma le fiafia i latou po o se isi tagata e ese mai le aganuu po o le talaaga i le Ekalesia a le Alii.

Faaali atu fesili nei, ma valaaulia tagata aoga e mafaufau loloto ma tusi faamaumau o latou manatu ma lagona:

• O le a se mea e mafai ona ou faia ina ia sili atu ai lo’u taliaina ma le lagolagoina o tagata o aganuu ma talaaga eseese?

Afai e te manatu e aoga, e mafai e le vasega ona matamata i le “Is There a Place for Me?” (3:59).

4:0

Toe foi i le “Filifiliga o Gaoioiga e Aoao Ai.”

E mafai ona tou amata e ala i le faasoa atu o le saunoaga lenei a Peresitene Russell M. Nelson:

“Ona o loo faifai pea le Toefuataiga, o le a mautinoa lava le faaauauina o suiga o aiaiga faavae.” (“The Love and Laws of God” [Brigham Young University devotional, Sept. 17, 2019], 4, speeches.byu.edu)

I le avea ai o se vaega o le Toefuataiga faifai pea, o nisi taimi e faasilasila atu ai e taitai o le Ekalesia a le Alii ia suiga i le Ekalesia. Ia maua faatasi o se vasega ni faataitaiga lata mai nei o nei suiga, e pei o fetuunaiga i faiga po o aiaiga faavae a le Ekalesia.

• Aisea e ono tauivi ai nisi o tagata o le ekalesia pe a tupu ni suiga i le Ekalesia?

Faamalamalama atu faapea i le Galuega 10, na maua ai e Peteru se faaaliga mai le Alii lea na saunia ai le ala mo se suiga taua i le Ekalesia e faatatau i Nuuese. Ina ia fesoasoani i tagata aoga ia malamalama i le auala na oo mai ai le suiga, tuu atu ia i latou le pepa e tufa atu “Pe Mafai e Nuuese Ona Avea ma Se Vaega o le Ekalesia a le Faaola?” A o lei amataina e tagata aoga le pepa e tufa atu, e mafai ona e iloiloina puupuu le tomai “Malamalama i Tusitusiga Paia i le Talaaga” i le Tomai mo le Suesueina o Tusitusiga Paia.

A uma ona maua e vaega se taimi e talanoaina ai pe na faapefea ona oo mai le suiga, mafaufau e fai atu fesili nei:

• O le a le upumoni na faaali mai e le Alii ia Peteru lea na saunia ai le ala mo se suiga e faatatau i Nuuese? (Atonu e te manao e tuuina atu le faamamafa i le Galuega 10:34–35.)

• O le a se mea e mafai ona aoao mai e lenei tala ia i tatou e uiga i le auala e taitaia ai e le Alii Lana galuega? (E mafai ona faailoa mai e tagata aoga se upumoni e pei o lenei: E taitaia e Iesu Keriso Lana Ekalesia e ala i faaaliga e ala mai i perofeta soifua.)

• Aisea e taua ai ia i tatou taitoatasi ona maua a tatou lava molimau faapea o le Ekalesia a le Faaola e taitaia e faaaliga faifai pea? (E mafai ona e valaaulia tagata aoga e faasoa mai ni aafiaga patino i le auala na latou talitonu ai o le Ekalesia a Iesu Keriso e taitaia e faaaliga.)

Faailoa atu e ui lava ina ua uma ona maua e Peteru le faaaliga na faatonuina ai o ia e talia Nuuese i le Ekalesia, ae sa tauivi nisi o tagata o le ekalesia e talia lenei suiga (tagai Galuega 15:1–5). Sa faia se fonotaga a le Ekalesia e taulima ai nei popolega (tagai Galuega 15:6–31). E ui lava ina ua uma ona tuuina mai se faamaninoga faaopoopo, ae sa teena lava e nisi o tagata o le ekalesia lenei suiga (tagai Kalatia 5:2–10; 6:13).

Valaaulia tagata aoga e filifili se aoaoga, faiga masani, po o se aiaiga faavae a le Ekalesia o loo latou tauivi ai po o tauivi ai se tasi latou te iloa. Ona tuu atu lea i tagata aoga o le pepa e tufa atu ma valaaulia i latou e mafaufau pe faapefea ona faaaoga laasaga o loo i lenei pepa e tufa atu i le tulaga o loo latou mafaufau i ai.

Toe foi i le “Filifiliga o Gaoioiga e Aoao Ai.”

Valaaulia tagata aoga e faasoa mai ni faataitaiga o auala na latou oo ai po o se tasi latou te iloa i le tetee a o saili e faasoa atu le talalelei. Ona mafai lea ona e tusia le upumoni lenei i luga o le laupapa: A o tatou faatinoina le faatuatua ia Iesu Keriso, o le a tatou maua le malosi e fai ai Lana galuega.

Tusi le fuaitau lenei i luga o le laupapa. Valaaulia tagata aoga e filifili se fuaitau se tasi ma faitau i ai, ma vaavaai mo mea nei e uiga i tagata o loo i le tala: (1) o le tetee na latou oo i ai, (2) le auala na latou faatinoina ai le faatuatua ia Iesu Keriso, ma le (3) auala na faamalosia ai i latou e le Faaola.

• Ua faafalepuipuiina Peteru: Galuega 12:1–11

• Ua fetaiai Paulo ma Panapa ma se faataulaitu: Galuega 13:1–13

• Ua lototoa Paulo ma Panapa: Galuega 13:42–52

• Ua faaosofia e tagata Iutaia lē talitonu le tetee: Galuega 14:1–7

• O nisi tagata Iutaia mai Anetioka ma Ikunia na tauaia i maa ia Paulo: Galuega 14:19–28

A uma ona tuu atu se taimi mo tagata aoga e suesue ai a latou fuaitau filifilia, valaaulia i latou e faatulaga ni vaega toalaiti faatasi ma i latou o e na suesueina se isi fuaitau ma faasoa mai mea na latou aoaoina.

Mafaufau e faitau faatasi le saunoaga lenei a Peresitene Jeffrey R. Holland pe matamata i le “Puipuia Ou Talitonuga” (0:57):

0:57

Ia faamalosi. Ola ma le faamaoni i le talalelei e tusa lava pe e le o ola ai isi o siomiaina outou. Puipui o outou talitonuga ma le amio solia ma le agaalofa, ae ia puipuia i latou. … O le savalia ma le lototoa o sea ituaiga ala, o le a e maua ai le faatuatua le maluelue, ma o le a maua le saogalemu e tetee atu i matagi o le amioleaga, e oo lava i ave o asiosio, ma o le a e maua le malosi e pei o le papa o lo tatou Togiola lea afai o le a outou fausia ai le avea o outou ma soo faamaoni, o le a le mafai ona outou pauu. (“O Le Tau—ma Faamanuiaga—o le Avea ma Soo,” Liahona, Me 2014, 9)

E mafai e tagata aoga ona faasoa mai ni faataitaiga o le auala na fesoasoani ai le Faaola ia i latou po o se tasi latou te iloa e puipuia o latou talitonuga ma le lototele ma le agaalofa. E mafai ona avea nei mea ma aafiaga na latou maua i luga o ala o faasalalauga faaagafesootai, i le avea ai ma se faifeautalai, po o fegalegaleaiga faafesagai ma tagata faigaluega, uo, po o aiga.

Valaaulia tagata aoga e mafaufau loloto ma faamaumau pe faapefea ona latou faaaogaina le faatuatua sili atu i le Faaola pe a latou feagai ma teteega.

Toe foi i le “Filifiliga o Gaoioiga e Aoao Ai.”