Galuega 16–21

E mafai ona e faaali atu le iloiloga lenei ma valaaulia tagata aoga e faamae’a e i latou lava.

I le faaaogaina o se fua o le 1 i le 10, faatulaga faamatalaga taitasi (1 = toetoe lava a leai; 10 = toetoe lava o taimi uma).

• O le Atua o le aafiaga sili ona taua i lo‘u olaga.

• E faamuamua le siufofoga o le Atua nai lo isi leo uma.

• Ou te naunau e faataga soo se mea o finagalo o Ia ou te faia ia avea o se faamuamua nai lo isi faanaunauga uma.

Faamalamalama atu e mafai ona tatou aoao mai ia Paulo ma isi i le auala e mafai ona tatou faia ai le galuega a le Atua a o tatou faatagaina Lona finagalo e manumalo i o tatou olaga. Ina ia fesoasoani i tagata aoga ia iloa lenei upumoni i le faatinoga, tuu atu ia i latou le pepa e tufa atu “Tuu atu i le Uunaiga a le Atua e Manumalo i o Tatou Olaga.” Valaaulia tagata aoga e filifili le autu latou te mananao e suesue i ai. Ona mafai lea ona latou faia ni vaega toalaiti faatasi ma i latou na filifilia le autu lava lea e tasi.

Ina ia faalolotoina le malamalama o tagata aoga i lenei upumoni, e mafai ona e faaali atu le saunoaga lenei mai ia Peresitene Russell M. Nelson. Tuu atu i tagata aoga se taimi e mafaufau ai i ana fesili ma tusi faamaumau o latou manatu ma lagona. Ia fautuaina i latou e galulue i soo se uunaiga latou te maua.

O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua nai lo se isi lava leo? Pe o e loto e faataga soo se mea o finagalo o Ia e te faia ia faamuamua i lo isi faanaunauga uma? … O’u uso e ma tuafafine, a o e filifili e faamuamua le Atua i o outou olaga, o le a outou lagonaina mo outou lava o lo tatou Atua o “se Atua o vavega” [Moronae 9:11]. (“Ia Faamuamua le Atua,” Liahona, Nov. 2020, 94, 95)

Toe foi i le “Filifiliga o Gaoioiga e Aoao Ai.”

Valaaulia tagata aoga e faasoa puupuu mai nisi o faataitaiga o talitonuga o loo i ai i tagata e ese mai i o latou lava talitonuga. Faamalamalama atu ina ua alu Paulo i Atenai, sa ia feiloai i tagata e matuai ese lava o latou talitonuga mai ona talitonuga. (Atonu e mafai ona fesoasoani le toe ilfaamanatu o le “Galuega 17:15–32. O a talitonuga na fetaiai ma Paulo i Atenai?” i le Fesoasoaniga mo Tusitusiga Paia: Feagaiga Fou.)

Valaaulia tagata aoga e faitau le Galuega 17:16–31, ma vaavaai pe na faapefea ona saunia e Paulo le ala e aoao atu ai upumoni taua e uiga i le Tama Faalelagi ma Iesu Keriso i tagata Atenai. (Mo i latou o loo faaaogaina le lomiga a le Au Paia o Aso e Gata Ai o le Tusi Paia a King James, faasino atu le uiga o le “faataulaitu tele” i le fuaiupu 22 [tagai Galuega 17:22, vaefaamatalagaa].) A uma ona tuu atu i tagata aoga se taimi e suesue ai i tusitusiga paia, e mafai ona e fesili atu:

• O le ā se mea e te fiafia ai i le auala na a’oa’o ai e Paulo i latou e eseese o latou talitonuga mai iā te ia?

• Na faapefea ona faavaeina e Paulo talitonuga sa tutusa ai o ia ma tagata i Atenai? (Atonu e faailoa mai e tagata aoga mea e pei o nei: [1] Na faamautu e Paulo le fiafia o tagata Atenai i tapuaiga, [2] sa ia iloa le auala na latou taulimaina ai lotu, [3] sa ia fesootai atu le “atua e le mailoa” i le Atua moni, ma [4] sa ia sii maia se upumoni mai se fatusolo Atenai ma atinae i luga o lena upumoni.)

• Ina ua uma ona maua talitonuga sa tutusa ai o ia ma tagata Atenai, o a upumoni na aoao mai e Paulo e uiga i le Tama Faalelagi ma Iesu Keriso? (E mafai ona faailoa mai e tagata aoga upumoni e pei o nei: Na foafoaina e le Atua le lalolagi. Ua tuu atu e le Atua le ola i mea ola uma. Na fuafua e le Atua ia taimi ma nofoaga e nonofo ai atunuu o tagata. Afai tatou te sailia le Alii e mafai ona tatou maua o Ia. O i tatou o fanau a le Atua. Ua poloaiina e le Atua tagata uma ia salamo. O le a faamasinoina i tatou e le Atua i le aso mulimuli. Sa toetu mai Iesu.)

• E mafai faapefea e le aoaoina o nei upumoni ona suia ai le olaga o se tasi? Na faapefea ona suia e nei upumoni lou olaga?

Ina ia fesoasoani i tagata aoga e faataitai ma faaaoga mea o loo latou aoaoina, e mafai ona e fai atu ia i latou e faatulaga ni vaega toalaiti ma talanoaina le ata faataitai lenei. Valaaulia tagata aoga e mafaufau i talitonuga taatele o loo ia i latou ma Lusia ma pe faapefea ona latou taulimaina lona popolega.

A uma ona tuu atu i tagata aoga se taimi mo talanoaga faalevaega, valaaulia i latou e faasoa mai pe faapefea ona latou faavaeina ni talitonuga tutusa ma Lusia. Tuu atu i tagata aoga e faasoa mai pe faapefea ona latou aoaoina o ia o se afafine o le Atua. Pe e mafai foi ona e fai atu i tagata aoga e faatino le auala e mafai ona latou tali atu ai ia Lucia.

Ona valaaulia lea o tagata aoga e mafaufau i se tasi latou te iloa atonu e le malamalama i lo latou faasinomaga moni o se atalii o le Atua. E mafai e tagata aoga ona tusi faamaumau nisi o auala e mafai ona latou fesoasoani ai i lenei tagata ia malamalama lelei i lenei upumoni. Uunaia i latou e mafaufau pe faapefea ona latou mulimuli i le faataitaiga a Paulo o le aoao atu ma le molimau atu ia Iesu Keriso e ala i le Agaga.

Toe foi i le “Filifiliga o Gaoioiga e Aoao Ai.”

Valaaulia tagata aoga e mafaufau i soo se uo Kerisiano po o ni tagata masani o loo saili ma le faamaoni e mulimuli i le Faaola. Atonu e faasoa mai e tagata aoga se mea latou te faamemelo i ai e uiga i le auala e ola ai a latou uo i o latou olaga.

• Aiseā e tāua ai ona faasoa atu o tatou talitonuga i isi Kerisiano?

Faamalamalama atu o Akula ma Pisila o se ulugalii faaipoipo. Sa latou fesoasoani iā Paulo i le faaletino ma le faaleagaga i ana taumafaiga faafaifeautalai. Ua tuuina mai e Akula, Pisila, ma Paulo ni faataitaiga o le auala e faasoa atu ai o tatou talitonuga ia i latou ua uma ona talitonu i le Faaola. Valaaulia tagata aoga e faitau le Galuega 18:24–28 ma le Galuega 19:1–7, ma vaavaai mo mea na faia e Akula, Pisila, ma Paulo e faamalosia ai le faatuatua o isi tagata talitonu.

Mafaufau e fai atu fesili nei:

• O le a se mea e faagaeetia ai oe e uiga ia Apolo? O le a se mea ua faagaeetia ai oe e uiga i soo na aoaoina e Paulo?

• O a ni mea e mafai ona tatou aoao mai i faataitaiga a Akula, Pisila, ma Paulo? (E mafai ona faailoa mai e tagata aoga se upumoni e pei o lenei: A o tatou faasoa atu le atoatoaga o le talalelei i isi soo o Iesu Keriso, e mafai ona latou malamalama lelei i le auala e mafai ai e le talalelei ona faamanuiaina o latou olaga.)

• E mafai faapefea e le faasoaina atu o lou alofa ma le molimau ia Iesu Keriso i isi tagata talitonu ona faamalosia lou faatuatua ia Keriso?

E mafai e tagata aoga ona faasoa mai ni aafiaga na latou maua i le talanoa ai e uiga i le talalelei i isi Kerisiano. E mafai e tagata aoga ona talanoaina mea na lelei po o mea semanu e sili atu ona lelei na latou faia.

Valaaulia tagata aoga e tusi i lalo upumoni, avanoa, ma faamanuiaga e tulaga ese i le talalelei toefuataiina a Iesu Keriso. E mafai ona e tusia a latou tali i luga o le laupapa. E mafai e tagata aoga ona galulue taitoalua po o ni vaega toalaiti ma talanoaina pe faapefea ona latou faasoa atu nei upumoni i isi Kerisiano.

Toe foi i le “Filifiliga o Gaoioiga e Aoao Ai.”

E mafai ona e amata i le faaali atu o le ata lenei o Paulo o loo aoao atu. Ona fai atu lea o fesili nei.

• O le a se lagona o Paulo e uiga i le Faaola?

• O le a se mea e mafai ona tatou aoaoina e uiga i le Faaola mai le olaga o Paulo?

Faamalamalama atu e mafai ona tatou aoao atili e uiga i le Faaola e le gata e ala i aoaoga a Ana Aposetolo ma perofeta ae faapea foi i le ala na latou ola ai i o latou olaga. E mafai ona e faaali atu le saunoaga lenei a Elder Bruce R. McConkie:

E le taumate e tele mea e tutupu i olaga o le tele o perofeta ua vaetofiaina ai na tagata amiotonu o ni ituaiga ma ata o lo latou Mesia. E atoatoa ma talafeagai ona vaavaai mo faatusa o Keriso i soo se mea ma faaaoga pea lava pea e ala i le tuuina o ia ma ana tulafono silisili i o tatou mafaufau. (The Promised Messiah: The First Coming of Christ [1978], 453)

Ina ia fesoasoani i tagata aoga e aoao e uiga i le Faaola mai uiga, faatinoga, ma faataitaiga a Paulo, e mafai ona latou faaaogaina le tomai “Taulai atu ia Iesu Keriso i Tusitusiga Paia” i le Tomai mo le Suesueina o Tusitusiga Paia. Faaali atu fesili ma fuaitau o mau o loo i lalo. Valaaulia tagata aoga e faitau fuaitau taitasi ma faaaoga fesili e taialaina ai i latou i a latou suesuega.

O le a se mea ua aoao atu e faatinoga a Paulo ia te oe e uiga ia Iesu Keriso, Lona soifuaga, ma Lana misiona?

O le a se mea e mafai ona e aoaoina e uiga i le ituaiga tagata ma uiga o Iesu Keriso mai le faataitaiga a Paulo?

• Galuega 20:7–12

• Galuega 20:17–27

• Galuega 20:28–38

• Galuega 21:10–14

A uma ona tuu atu i tagata aoga se taimi ia lava e suesue ai, valaaulia i latou e faasoa mai mea na latou maua e uiga i le Faaola e ala i uiga, faataitaiga, ma amioga a Paulo. E mafai foi e tagata aoga ona faasoa mai mea ua latou aoaoina e uiga i le Faaola e ala i soifuaga o perofeta anamua ma aso nei.

Ina ia fesoasoani i tagata aoga ia iloa pe faapefea ona latou faasoa atu le talalelei a Iesu Keriso e ala i a latou lava faataitaiga, mafaufau e fesili atu:

• O ai e te iloa e faamanatu atu ai ia te oe le Faaola?

• O a ni uiga o loo ia te oe e pei o uiga o le Faaola?

• O le a se mea e mafai ona e faia e avea atili ai lou olaga e pei o le Faaola?

Toe foi i le “Filifiliga o Gaoioiga e Aoao Ai.”