1 ma le 2 Timoteo; Tito; Filemoni

E tele filifiliga e aoao ai ua tuuina atu mo oe ma au tagata aoga. Filifili ma le agaga tatalo po o lē fea le filifiliga po o filifiliga o le a sili ona anoa mo lau vasega.

Toe foi i le “Filifiliga o Gaoioiga e Aoao Ai.”

Mafaufau e faaali atu le iloiloga faaletagata lenei. Tuu atu i tagata aoga se taimi e faamae’a ai e i latou lava.

Uunaia tagata aoga a o latou auai i lenei gaoioiga e aoao ai ina ia gauai atu i uunaiga mai le Agaga Paia lea e mafai ona fesoasoani ia i latou e tutu atu ai o ni molimau a Iesu Keriso.

Ina ia fesoasoani i tagata aoga ia malamalama i le talaaga e faatatau i nisi o aoaoga a Paulo ia Timoteo, atonu e fesoasoani le faamalamalama atu o Timoteo o se paaga vavalalata ma faatuatuaina a Paulo (tagai i le 1 Korinito 4:17). Sa auauna atu Timoteo o se taitai o le Ekalesia i Efeso (tagai i le 1 Timoteo 1:3), o se aai tele sa taatele ai le ifo i tupua ma le ola le mama (tagai i le Galuega 19:35). Sa faaataata atu e Paulo e faapea sa masalomia e nisi o tagata o le au paia ia tomai faaletaitai a Timoteo ona e laitiiti (tagai 1 Timoteo 4:12). Mo nisi faamatalaga e uiga ia Timoteo, tagai i le “O ai na tusia i ai le 1 Timoteo ma aisea?” ma le “O ai na tusia i ai le 2 Timoteo ma aisea?” i le Fesoasoaniga mo Tusitusiga Paia: Feagaiga Fou.

Valaaulia tagata aoga e suesue le 1 Timoteo 4:12–16 ma le 2 Timoteo 1:7–9, ma vaavaai mo le fautuaga a Paulo ia Timoteo. Ina ia fesoasoani i tagata aoga ia talanoaina mea sa latou mauaina, mafaufau e fai atu ia fesili nei:

• O a ni mea na e mauaina i nei fuaiupu na taua ia te oe? Aisea? (A o faasoa mai e tagata aoga a latou tali i nei fesili, e mafai ona e fesoasoani ia i latou e faailoa mai upumoni e pei o nei: Afai o i tatou o ni faataitaiga o e talitonu ia Iesu Keriso, e mafai ona tatou fesoasoani e aumai le faaolataga ia i tatou lava ma isi [tagai i le 1 Timoteo 4:12, 16]. A’o tatou saili ma le faamaoni ia maua le Agaga e faatasi ma i tatou, e mafai ona tatou faatoilaloina le fefe ma lē mamā ai i a tatou molimau ia Iesu Keriso [tagai i le 2 Timoteo 1:7–9].)

Faamanatu i tagata aoga faapea i le 1 Timoteo 4:12, na lisiina ai e Paulo le tele o auala e mafai ona avea ai i tatou ma faaa’oa’o i e talitonu. Faailoa atu o le upu “upu” i lenei fuaiupu e faatatau i a tatou uiga po o amioga. Mafaufau e tusi upu nei mai le fuaiupu e 12 o ni ulutala i luga o le laupapa: upu, amio, alofa, loto, faatuatua, ma le le gaoia. E mafai ona e vaevaeina le vasega i ni vaega laiti ma atofa atu i vaega ta’itasi se upu se tasi o lo o lisi i luga o le laupapa. Valaaulia i latou e talanoa faatasi i fesili nei:

• Na faapefea ona avea Iesu Keriso ma faataitaiga atoatoa i lenei auala?

• O a ni auala patino e mafai ona avea ai oe ma se faaa’oa’o i se tagata talitonu i lenei auala?

Valaaulia tagata aoga mai vaega taitasi e faasoa mai a latou tali i fesili na latou talanoaina. E mafai ona e tusia po o se tasi o vaega taitasi tali a tagata aoga i luga o le laupapa, i lalo ifo o ulutala e faatatau i ai.

E mafai foi ona o outou talanoaina fesili e pei o nei:

• O le a se mea e faigata ai le avea o se faaa’oa’o i e faatuatua? O a mea e mafai ona fesoasoani ia i tatou e faatoilalo ai nei luitau?

• Na faapefea ona fesoasoani taumafaiga a isi e avea ma se faaa’oa’o i e talitonu ia te oe e te latalata atili atu ai ia Iesu Keriso?

Fautuaina tagata aoga e fuafua pe faapefea ona latou faaaogaina atoatoa le fautuaga a Paulo ina ia avea ma faaa’oa’o i e talitonu. Fautuaina i latou e faamaumau ma faatino uunaiga latou te maua mai i le Agaga Paia.

Toe foi i le “Filifiliga o Gaoioiga e Aoao Ai.”

Faaali atu se fasi tupe i le vasega. Ona valaaulia lea o tagata aoga e talanoaina fesili nei ma se tasi o nofo i o latou autafa:

• O a ni auala e mafai ona aoga ai le i ai o tupe?

• O a ni tulaga lamatia faaleagaga e mafai ona fesootai ma tupe?

Faamalamalama atu na faailoa mai e Paulo se talitonuga sese sa i ai i nisi tagata o le Ekalesia—e faapea “o le mea e maua ai le oloa o le amio Atua lea” (1 Timoteo 6:5). Uunaia tagata aoga a o latou suesue i aoaoga a Paulo e mafaufau poo a mea e mafai ona latou aoaoina mai le Agaga Paia e mafai ona fesoasoani ia i latou i o latou tulaga patino.

Suesue faatasi le 1 Timoteo 6:6–10. Valaaulia tagata aoga e vaavaai mo lapataiga a Paulo e uiga i le tamaoaiga.

• O le a sou manatu o le a le uiga o le fasifuaitau “o le manao i le tupe o le pogai lea o mea leaga uma”? (1 Timoteo 6:10).

Mafaufau e faasoa atu le saunoaga lenei mai ia Peresitene Daliin H. Oaks o se vaega o la outou talanoaga.

E leai se tupuaga leaga e uiga i tupe. O le samaria agalelei na faaaogaina tupe e auauna ai i ona tagatanuu ae sa faaaoga e Iuta tupe lava ia e tasi e faalata ai le Matai. “O le manao i tupe [o le] pogai lea o mea leaga uma lava.’(1 Timo. 6:10; faaopoopo le faatusilima.) O le eseesega ogaoga o le tikeri o faaleagaga tatou te faaaogaina e ala i le vaaia, iloiloina, ma le puleaina o mea o lenei lalolagi” (“Spirituality,” Ensign, Nov. 1985, 63).

• E mafai faapefea e le soona faamuamuaina o tupe po o meatotino ona aafia ai la tatou sootaga ma le Tama Faalelagi ma Iesu Keriso?

Valaaulia tagata aoga e faitau le 1 Timoteo 6:11–12, 17–19, ma vaavaai mo le fautuaga a Paulo ia Timoteo ma i latou o loo i ai oa. Ina ia valaaulia tagata aoga e faasoa mai mea na latou aoaoina mai nei fuaiupu, mafaufau e fai atu ni fesili e pei o fesili nei:

• O le a se fautuaga na e maua e faapitoa lava le fesoasoani? Aisea?

• O a upumoni ua e aoaoina mai aoaoga a Paulo e mafai ona taialaina ai mea tatou te faamuamua i o tatou olaga? (E tele upumoni e ono faailoa mai e tagata aoga i nei fuaiupu, e aofia ai upumoni nei: O le faalagolago i le Atua soifua nai lo oa e le mautonu e saunia ai i tatou mo le ola e faavavau.)

Ina ia fesoasoani i tagata aoga ia malamalama lelei ma lagona le taua o lenei upumoni, valaaulia i latou e sue “Oa” i le Taiala i Tusitusiga Paia (Gospel Library) ma suesue nisi o fuaitau o mau e faatatau i ai. Valaaulia tagata aoga e faasoa mai soo se malamalamaaga sa latou maua mai a latou suesuega. E mafai foi ona e fai atu se fesili e pei o lenei:

• O le a se mea ua e iloa e uiga i le Tama Faalelagi ma Iesu Keriso e mafai ona fesoasoani ia te oe e faamuamua ai lau sootaga ma i La’ua nai lo tupe po o meatotino faaletino? (I le avea ai o se vaega o lenei talanoaga, e mafai ona outou matamata i le “E Mafai Ona Tatou Maua le Fiafia” [6:18].)

  

  6:23

Valaaulia tagata aoga e mafaufau pe faapefea ona latou faaaogaina upumoni na tou talanoaina i lenei aso i o latou olaga. Valaaulia i latou e faamaumau ni faatinoga o le a latou faia ma soo se isi lava uunaiga na latou maua mai le Agaga Paia.

Toe foi i le “Filifiliga o Gaoioiga e Aoao Ai.”

Mafaufau e amata lenei gaoioina e a’oa’o ai e ala i le talanoaina o le saunoaga lenei a Peresitene Russell M. Nelson:

O’u uso e ma tuafafine pele, e anoanoa’i mea matagofie o loo i luma atu. I aso o le a oo mai, o le a tatou vaai ai i faailoga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia “faatasi ma le mana ma le mamalu silisili” [Iosefa Samita—Mataio 1:36], O le a ia faae’e mai avanoa e le mafaitaulia, faamanuiaga, ma vavega i luga o e faamaoni.

Peitai, o loo tatou ola i le taimi nei i le mea moni o se taimi aupito sili ona faigata i le talafaasolopito o le lalolagi. O mea lavelave ma lu’itau ua tuua ai le tele o tagata e lagonaina le lofituina ma le vaivai. (“Manumalo i le Lalolagi ma Maua le Malologa,” Liahona, Nov. 2022, 95)

• O a ni ou manatu o i ai e uiga i lenei saunoaga?

• O a nisi o lavelave ma luitau o o tatou taimi e mafai ona tuua ai tagata e lagona le lofituina ma le vaivai?

Faamalamalama atu faapea na lapatai mai perofeta anamua ma aso nei e uiga i lavelave ma luitau e fesootai ma aso e gata ai. Na faasoa mai e Paulo nisi o nei lapataiga i lana tusi lona lua iā Timoteo. Uunaia tagata aoga a o latou suesue e mafaufau pe faapefea e le fautuaga a Paulo ona fesoasoani ia i latou e faafoeina luitau o loo feagai ma i latou.

Faitau le 2 Timoteo 3:1–7, 12–13; 4:3–4, ma vaavaai mo faamatalaga a Paulo o mea matautia i aso e gata ai. Mo se fesoasoani e malamalama ai i upu po o fasifuaitau faigata i nei fuaiupu, mafaufau e faasino tagata aoga i le “2 Timoteo 3:1–7. O le a le mea na aoao mai e Paulo e uiga i tulaga lamatia o aso e gata ai?” i le Fesoasoaniga mo Tusitusiga Paia: Feagaiga Fou.

• O a faataitaiga o tulaga na faamatalaina e Paulo ua e vaaia i le lalolagi i aso nei?

Atonu e fesoasoani le faasoa atu o le aafiaga lenei na oo ia Peresitene Boyd K. Packer a o faitauina le valoaga a Paulo o loo faamaumauina i le 2 Timoteo 3. Na faamatala e Peresitene Packer:

A o ou suesue i se tasi aso, sa ou faitau ai i lena tulaga ma nofo ma mafaufau loloto i faamaoniga uma ua faamautuina nei elemene uma o lena valoaga. Sa i ai se lagona o le faanoanoa tele ma le muai iloaina, o se lagona matautia o le le fiafia, toetoe lava a leai se aoga. Sa ou tilotilo ifo i lalo i le itulau, ma sa tulaga ese se upu se tasi, ou te manatu e le o se mea faafuasei. Sa ou faitauina ma le naunautai ona ou iloa ai lea o le aposetolo na valoia na faafitauli uma na faaaofia ai i le lauga lava lea e tasi le tui puipui e faasaga i na faafitauli uma. (“A’oa’o Atu Tusitusiga Paia” [lauga i faiaoga o le Ofisa o Aoga a le Ekalesia, Oke. 14, 1977], 5)

Faamalamalama atu o le upu na tulaga ese ia Peresitene Packer o le tusi paia (tagai i le 2 Timoteo 3:15). Valaaulia tagata aoga e suesue le 2 Timoteo 3:14–17, ma vaavaai mo le fautuaga a Paulo e uiga i mea e mafai ona tuuina mai e tusitusiga paia ia i tatou i le lotolotoi o tulaga lamatia o o tatou aso.

• E faapefea i lou manatu ona fesoasoani afioga a le Atua i tusitusiga paia e tuuina atu ai tui puipui mai tulaga lamatia o aso e gata ai?

• E faapefea ona e aoteleina mea sa aoao mai e Paulo e uiga i tusitusiga paia? (I le faaaogaina o a latou lava upu, e mafai ai e tagata aoga ona faailoa mai se upumoni e pei o lenei: A o tatou suesue i le afioga a le Atua, e mafai ona tatou maua le poto lea o le a taitai atu ai i tatou i le faaolataga e ala i le faatuatua ia Iesu Keriso.)

• O a nisi o afioga a le Atua i tusitusiga paia ua fesoasoani ia te oe e faafoeina ai luitau o o tatou aso? (Mafaufau e valaaulia ni tagata aoga e tali mai i le fesili lenei. E mafai ona latou faitauina a latou mau filifilia i le vasega ona faamatala lea pe na faapefea ona faamanuiaina i latou e aoaoga a le Alii i lenei fuaitau.)

Uunaia tagata aoga e mafaufau i ni auala e mafai ona latou faaleleia atili ai a latou suesuega o tusitusiga paia ina ia mafai ona latou maua atili ai le taitaiga a le Alii i o latou olaga. Uunaia i latou e mulimuli i soo se uunaiga latou te maua mai le Agaga Paia.

Toe foi i le “Filifiliga o Gaoioiga e Aoao Ai.”