Faaaliga 1–5

Mafaufau e tusi le upu faatusa i luga o le laupapa. Faamalamalama atu e masani ona faaaoga e le Alii faatusatusaga i tusitusiga paia e fesoasoani ai ia i tatou ia malamalama lelei po o ai o Ia ma aoao i tatou e uiga i Lana talalelei. E mafai ona e valaaulia tagata aoga e talanoaina faatasi fesili nei ma se paga.

• O a ni nai faatusa e mafai ona e mafaufau i ai o loo ta’ua i tusitusiga paia?

• O a mea e mafai e nei faatusa ona aoaoina ai oe e uiga ia Iesu Keriso ma Lana talalelei?

Faailoa atu o le tusi o Faaaliga ua tumu i faatusa tamaoaiga. Atonu e fesoasoani le faamatala atu faapea o le Faaaliga na tusia e le Aposetolo o Ioane. I le tusi lenei, na tusia ai e Ioane upumoni na faailoa atu ia te ia e uiga ia Iesu Keriso, Lana matafaioi i le ata o le faaolataga a le Tama Faalelagi, o mea e tutupu e tau atu i Lona Afio Mai Faalua, ma Lana nofotupu i le Meleniuma. (Mo nisi faamatalaga, tagai i le “O ai na tusia i ai le tusi o Faaaliga ma aisea?” i le Fesoasoaniga mo Mau: Feagaiga Fou

I lenei gaoioiga e aoao ai, o le a aoao ai tagata aoga mai nisi o faatusa o loo maua i le Faaaliga 1. Ina ia saunia tagata aoga mo lenei gaoioiga, mafaufau e faailoa atu ia i latou motugaafa e tolu mai le “Malamalama i Faatusa i Tusitusiga Paia” i le Tomai mo le Suesueina o Tusitusiga Paia.

Fa’aali atu fa’atonuga nei. Valaaulia tagata aoga e faaaoga motugaafa mo le malamalama i faatusa ma saili le taitaiga faaleagaga i a latou suesuega.

1. Suesue i le Faaaliga 1:3–6, 9–20 (e aofia ai le Faaliliuga a Iosefa Samita mo le Faaaliga 1:1–8 [Gospel Library] ma le 1:20 [i le Faaaliga 1:20, vaefaamatalagae]).

2. Faaaoga punaoa o loo maua i le Fesoasoaniga mo Mau: Feagaiga Fou, “Faaaliga 1–5,” e fesoasoani ai ia te oe ia malamalama lelei i le uiga ma le faatusa o nei fuaiupu.

3. Sauni e faasoa atu mea nei:

   • O se faatusa na e maua

   • O le a se mea e mafai ona aoao atu e le faatusa ia te oe e uiga ia Iesu Keriso, lau sootaga ma Ia, po o Lana matafaioi i le fuafuaga a le Atua

Tuu atu i tagata aoga se taimi e faasoa atu ai i se paga po o se vaega toalaiti mea na latou mauaina. Ona fai atu lea o fesili e pei o fesili nei, ma valaaulia ni nai tagata aoga e faasoa mai o latou manatu i le vasega:

• O a nisi o upumoni na e aoaoina e uiga ia Iesu Keriso mai faatusa na e suesueina? (O ni nai faataitaiga o le tele o upumoni e ono faasoa mai e tagata aoga e aofia ai: E ala mai ia Iesu Keriso e mafai ona faamamaina ai i tatou mai a tatou agasala [tagai i le Faaaliga 1:5]. O Iesu Keriso o loo vaaia ma tuuina atu le tausiga i Ona soo faamaoni [tagai i le Faaaliga 1:13–20]. O Iesu Keriso o se tagata toetu faamamaluina, o lē ua i ai le mana i luga o le oti ma seoli [tagai i le Faaaliga 1:17–18].)

• E mafai faapefea e le manatuaina o nei upumoni e uiga i le Faaola ona aafia ai oe?

Uunaia tagata aoga e faaauau pea ona saili ia malamalama i faatusa i a latou suesuega o le tusi o Faaaliga. E mafai ona e tulitataoina lesona i le lumanai e ala i le valaauliaina o i latou e faasoa mai mea ua latou aoaoina mai faatusa ua latou maua.

Toe foi i le “Filifiliga o Gaoioiga e Aoao Ai.”

Mafaufau e amata lenei gaoioiga e a’oa’o ai e ala i le talanoaina o le saunoaga lenei a Peresitene Russell M. Nelson:

O loo tatou ola i le taimi nei o le mea moni o se taimi aupito sili ona faigata i le talafaasolopito o le lalolagi. O mea lavelave ma lu’itau ua tuua ai le tele o tagata e lagonaina le lofituina ma le vaivai. (“Manumalo i le Lalolagi ma Maua le Malologa,” Liahona, Nov. 2022, 95)

• O a nisi o lavelave ma luitau i le olaga e mafai ona tuua ai tagata e lagona le lofituina ma le vaivai? (Mafaufau e tusi tali a tagata aoga i luga o le laupapa.)

Faamalamalama atu e faapea o le Au Paia na lauga atu i ai Ioane i le tusi o Faaaliga sa ola foi i se taimi faigata. Sa latou feagai ma le tele o luitau, e aofia ai sauaga ogaoga ma le liliuese mai totonu o le Ekalesia. E ala mai ia Ioane, na tuuina mai ai e le Faaola upu o fautuaga ma faamalosiauga. Valaaulia tagata aoga e mafaufau i ni luitau patino atonu o loo feagai ma i latou i o latou olaga. Uunaia i latou a o latou suesue e gauai atu i mea ua aoaoina ai i latou e le Agaga Paia e uiga i le faatoilaloina o o latou luitau.

Faaali atu fuaitau nei. Faamalamalama atu o fuaitau taitasi o se savali i se tasi o paranesi e fitu o le Ekalesia lea na saunoa i ai Ioane i le tusi o Faaaliga.

• Faaaliga 2:1–7

• Faaaliga 2:8–11

• Faaaliga 2:12–17

• Faaaliga 2:18–20, 26–28

• Faaaliga 3:1–5

• Faaaliga 3:7–12

• Faaaliga 3:14–21

Valaaulia tagata aoga e filifili se fuaitau se tasi pe sili atu e suesue ai. E mafai ona e uunaia i latou e faaaoga Fesoasoaniga o Mau: Feagaiga Fou, “Faaaliga 1–5,” mo le fesoasoani e malamalama ai i upu po o fasifuaitau faigata. Valaaulia i latou e saunia e faasoa mai tali i fesili nei:

• O a luitau o loo faamatalaina i nei fuaiupu sa manaomia ona faatoilaloina?

• O ā ni mea ua e a’oa’oina e uiga i le Alii mai Ana aoaoga i nei Au Paia?

• O a faamanuiaga na folafola atu e le Alii ia i latou o e manumalo?

Valaaulia tagata aoga e faasoa a latou tali ma se paga po o se vaega toalaiti. A mae’a a latou talanoaga, faasino atu o seti taitasi o fautuaga i le Au Paia sa i ai se folafolaga mai le Alii ia i latou o e manumalo. Afai e manaomia, valaaulia tagata aoga e toe iloilo lenei fautuaga i le Faaaliga 2:7, 11, 17, 26–28; 3:5, 12, 21. Pe mafai foi ona e faasoa atu le saunoaga lenei a Elder Neil L. Andersen:

O faamanuiaga ua folafola mai e le Alii ia i latou o e manumalo i le lalolagi e ofoofogia lava. O le a “faaofuina [i latou] i ofu sisina … ma [tusi lona igoa] i le tusi o le ola.” O le Alii foi “o le a ta’u atu [o latou] igoa i luma [o le] Tama, ma luma o ana agelu”[Faaaliga 3:5]. E tofu tagata taitoatasi ma “vaega i le uluai toetutu” [Mataupu Faavae ma Feagaiga 76:64], maua le ola e faavavau, ma “e le toe ulufafo lava ia” [Faaaliga 3:12] mai le afioaga o le Atua. (“Manumalo i le Lalolagi,” Liahona, Me 2017, 59)

• E faapefea ona e aoteleina faamanuiaga ua folafola mai e le Alii ia i latou o e tauivi e faatoilalo le lalolagi ma ona luitau e fesootai ai? (E mafai ona faailoa mai e tagata aoga se upumoni e pei o lenei: Afai tatou te faatoilaloina le amioleaga o le lalolagi, ona tuuina mai lea e le Faaola ia i tatou faamanuiaga o le faaeaga.)

• E mafai faapefea e le manatuaina o faamanuiaga folafolaina a le Faaola ona fesoasoani ia te oe e faatoilalo ai ou luitau?

Mafaufau e faitau le Ioane 16:32–33 ma le saunoaga lenei a Peresitene Russell M. Nelson. Valaaulia tagata aoga e talanoaina pe faapefea e nei aoaoga ona aumaia ia i tatou le faamoemoe a o tatou saili e faatoilalo le lalolagi.

Talu ai na manumalo Iesu Keriso i lenei lalolagi pa’ū, ma talu ai na Ia togiola mo i tatou taitoatasi, e mafai foi ona e faatoilaloina lenei lalolagi tumu i agasala, manatu faapito, ma e masani ona vaivai. …

O le manumalo i le lalolagi e le o se mea e tupu i se aso se tasi pe lua. E tupu i le olaga atoa pe a tatou taliaina pea lava pea le mataupu faavae a Keriso. …

Pe a tatou tauivi e ola i tulafono maualuluga atu a Iesu Keriso, o le a amata ona suia o tatou loto ma o tatou natura tonu lava. E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa. (“Manumalō i le Lalolagi ma Maua le Malōlōga,” Liahona, Nov. 2022, 96–97)

Na faapefea ona e lagonaina le faamalosia [o oe] e Iesu Keriso e faatoilalo le lalolagi ma ona luitau? (I le avea ai o se vaega o la outou talanoaga, e mafai ona tou matamata i le “Overcoming Challenges” [5:02]).

5:2

Valaaulia tagata aoga e mafaufau ma le agaga tatalo i mea atonu e finagalo le Alii latou te faatoilaloina faatasi ma Lana fesoasoani. Uunaia i latou e fuafua po o le a se mea o le a latou faia e saili ai le fesoasoani a le Atua i le faatoilaloina o nei luitau.

Toe foi i le “Filifiliga o Gaoioiga e Aoao Ai.”

Faaali atu se ata o Iesu Keriso e pei o lea mai le amataga o le lesona. Valaaulia tagata aoga e vaai faalemafaufau o loo latou talanoa ma se uo e le tele sona iloa e uiga i le Faaola. Na fesili le uo, “O le a le mea e ese ai Iesu mai isi tagata e pei o oe ma a’u?”

• E ono fa’apefea ona e tali atu i lau uo?

Faamalamalama atu na vaai le Aposetolo o Ioane i se faaaliga vaaia e mafai ona fesoasoani ia i tatou ia malamalama ai i le mana ma le mamalu o Iesu Keriso. Uunaia tagata aoga a o latou suesueina lenei tala ina ia talia lagona mai le Agaga Paia lea e mafai ona fesoasoani ia i latou e lagona ai le alofa ma le migao sili atu mo le Faaola.

Ina ia faailoa atu i tagata aoga lenei faaaliga, faamalamalama atu na vaai Ioane i le Atua le Tama o nofo i Lona nofoalii i le lagi. Sa siomia le nofoalii e ni tagata faamamaluina ma manu feai eseese o loo vivii ma tapuai atu ia te Ia. (Tagai i le Faaaliga 4:1–11). Ina ia fesoasoani i tagata aoga ia malamalama i faatusa mai nei fuaiupu, e mafai ona e faasino i latou i Fesoasoaniga mo Mau: Feagaiga Fou, “Faaaliga 1–5.” E mafai foi ona latou suesueina le Mataupu Faavae ma Feagaiga 77:1–5.)

Faitau le Faaaliga 4:8–11, ma vaavaai po o le a le tala ma mea na fai e i latou na faapotopoto faataamilo i le Tama Faalelagi.

• O le a se mea e tulaga ese mai ia te oe e uiga i upu ma amioga a i latou na faataamilo i le nofoalii o le Atua? Aisea?

• O le a sou manatu o le a le mea e mafai ona faatusa i ai toeaina na lafo o latou pale i luma o le nofoalii o le Tama Faalelagi? (O tali e ono aofia ai lo latou iloa o le silisili ese o le Tama Faalelagi; o lo latou faailoaina atu ua nofoaitalafu lo latou faaeaga ia te Ia; ma lo latou faaaloalo, faamemelo, ma le usitai tuuto atu ia te Ia.)

Valaaulia tagata aoga e suesue le Faaaliga 5:1–14, ma vaavaai mo le matafaioi taua na faia e Iesu Keriso i lenei faaaliga vaaia. Faailoa atu e tele faatusa o loo i nei fuaiupu. Uunaia tagata aoga e faaaoga Fesoasoaniga mo Mau: Feagaiga Fou, “Faaaliga 1–5,” mo se fesoasoani e malamalama ai i nisi o nei faatusa. (O le a fesoasoani foi mo oe o le faiaoga le faamasani i anotusi o lenei vaega o Fesoasoaniga mo Mau ina ia mafai ona e saunia e talanoaina manatu ma fesili a tagata aoga.)

Valaaulia tagata aoga e faasoa mai o latou manatu mai le Faaaliga 5. Pe a manaomia, mafaufau e faaaoga fesili e pei o nei:

• O le a se upumoni na e aoaoina mai po o sou lagona e uiga ia Iesu Keriso a’o e suesueina nei fuaiupu? (A o tali mai tagata aoga, atonu e faailoa mai e nisi se upumoni e pei o lenei: Na togiolaina i tatou e Iesu Keriso e ala i Lana taulaga togiola.)

• Aisea ua na’o Iesu Keriso ai e agavaa ma mafai ona togiolaina i tatou?

• E mafai faapefea e le lagonaina o le alofa faamaoni ma le lotofaafetai mo le Tama Faalelagi ma Iesu Keriso ona aafia ai faaiuga e te faia?

Fa’amanatu i tagata a’oga le vaaiga faataitai mai i le amataga o le gaoioiga e aoao ai. Valaaulia i latou e sue isi mau e mafai ona latou faasoa atu i a latou uo o le a fesoasoani ia i latou ia malamalama ai i le matafaioi taua o loo faia e Iesu Keriso i le ata o le faaolataga a le Tama Faalelagi. E mafai ona latou sueina na o latou ia fuaitau, pe mafai foi ona latou suesueina nisi o mau nei: Ioane 14:6; Mosaea 3:17; 15:1; Mataupu Faavae ma Feagaiga 19:16–19; 38:1–3.

A mae’a ona suesue tagata aoga, tuu atu ia i latou se avanoa e faasoa atu ai i se paga po o se vaega toalaiti mea na latou maua. Valaaulia i latou e faamatala mai pe aisea latou te lagona ai e taua fuaitau na latou filifilia. A leai, e mafai ona e tuuina atu i tagata aoga se taimi e tusi ai se tali i le uo mai le vaaiga faataitai. Ona latou faasoa atu lea o a latou tali i se paga po o i ni vaega toalaiti.

Mafaufau e valaaulia ni nai tagata aoga e faasoa mai a latou molimau i a Iesu Keriso i le vasega. E mafai ona e faaiu i le faasoa atu o lau molimau.

Toe foi i le “Filifiliga o Gaoioiga e Aoao Ai.”