Iosefa Samita—Mataio 1; Mataio 24–25; Mareko 12–13; Luka 21

Mafaufau e faaali atu se ata se tasi pe sili atu o ata nei o le Afio Mai Faalua o le Faaola. Valaaulia tagata aoga e vaai faalemafaufau ma faasoa mai pe faapei le vaai atu ia te Ia ua toe foi mai. Ona tuu atu lea i tagata aoga e faamaumau soo se fesili po o ni o latou popolega e uiga i le Afio Mai Faalua.

Faamalamalama atu faapea i le vaiaso mulimuli o le soifuaga o le Faaola, sa i ai ni fesili a Ana Aposetolo e uiga i Lona toe foi mai i le lalolagi (tagai Iosefa Samita—Mataio 1:4). A o suesue e tagata aoga le tali a le Faaola i Ana Aposetolo, valaaulia i latou e vaavaai mo tali e ono i ai i a latou lava fesili ma popolega.

Manatua: Iosefa Samita—Mataio, o loo maua i le Penina Tau Tele, o le faaliliuga musuia lea a Iosefa Samita, o le Mataio 24. Atonu e fesoasoani le faitauina o le “O le a se mea e mafai ona tatou aoao mai ia Iosefa Samita—Mataio?” i le Fesoasoaniga mo Tusitusiga Paia: Feagaiga Fou ina ia mafai ai e tagata aoga ona malamalama i le auala e aumaia ai e le Faaliliuga a Iosefa Samita le manino sili atu i le Mataio 24. (Tagai i le tomai “Faaaogaina o Tusitusiga Paia o le Toefuataiga e Malamalama ai i le Tusi Paia” i le Tomai mo le Suesueina o Tusitusiga Paia.)

Valaaulia tagata aoga e suesue na o i latou le Iosefa Samita—Mataio 1:22–23, 27–33 pe faatasi foi ma se paga. Valaaulia i latou e vaavaai mo faailoga na fetalai mai le Faaola o le a muamua atu i Lona Afio Mai Faalua. A maea ona faitau e tagata aoga ia fuaiupu, valaaulia i latou e faasoa mai faailoga na latou maua. E mafai ona e lisiina ia faailoga i luga o le laupapa ma fai atu fesili nei:

• Aisea e ono tuua ai i tatou e nisi o nei faailoga ma le popole po o le faanoanoa?

• Aisea e te manatu na faasoa mai ai e le Faaola nei faailoga? (Afai e manaomia, tuu atu i tagata aoga e iloilo fuaiupu 22–23 ina ia mafai ona latou faailoa mai se upumoni e pei o lenei: Na faaali mai e le Faaola faailoga a o lumanai Lona Afio Mai Faalua ina ia le atuatuvale ai Ona tagata o le feagaiga.) Ina ia aoao atili e uiga i e ua filifilia, tagai i le “Iosefa Samita—Mataio 1:22. O ai ’e filifilia e tusa ma le feagaiga?’” i le Fesoasoaniga mo Tusitusiga Paia: Feagaiga Fou.

• O le a se mea ua aoaoina oe e le iloaina na faaali mai e Iesu Keriso nei faailoga a o lei taitai ona oo mai Lona Afio Mai Faalua e uiga ia te Ia?

Ina ia fesoasoani i tagata aoga ia lagona le filemu sili atu e uiga i mea o le a tutupu a o lei oo i le Afio Mai Faalua o le Faaola, valaaulia i latou e faamaea le gaoioiga lenei i ni vaega toalaiti. Faaali le faamatalaga lenei pe saunia o se pepa e tufatufa atu.

Mafaufau e faaiu le gaoioiga e ala i le faasoa atu o le saunoaga lenei a Peresitene Russell M. Nelson:

O’u uso e ma tuafafine pele, e anoanoa’i mea matagofie o loo i luma atu. I aso o le a oo mai, o le a tatou vaai ai i faailoga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia “faatasi ma le mana ma le mamalu silisili” [Iosefa Samita—Mataio 1:36], O le a ia faae’e mai avanoa e le mafaitaulia, faamanuiaga, ma vavega i luga o e faamaoni. (“Manumalo i le Lalolagi ma Maua le Malologa,” Liahona, Nov. 2022, 95)

Valaaulia tagata aoga e mafaufau i uunaiga faaleagaga na latou maua a o latou suesue ma talanoaina nei upumoni. Faamalosiau i tagata aoga e tusifaamaumau ma faatino o latou lagona.

Toe foi i le “Filifiliga o Gaoioiga e Aoao Ai.”

E mafai ona e amata i le fai atu i tagata aoga e lisi mea latou te manatu o mea aupito sili ona taua o loo latou faia i o latou olaga. Ona faasoa atu lea o le saunoaga lenei mai a Elder D. Todd Christofferson:

E matua taua lava le saunia o le lalolagi mo le Afio Mai Faalua o le Alii o Iesu Keriso. (“Saunia mo le Toe Afio Mai o le Alii,” Liahona, Me 2019, 81)

• Aisea e te manatu ai o le sauniaina o le lalolagi mo le Afio Mai Faalua o le Faaola e “matua taua lava”?

Valaaulia tagata aoga e mafaufau loloto pe faafia ona latou mafaufau e uiga i le sauniaina o i latou lava ma isi mo le Afio Mai Faalua o le Faaola. Faamalamalama atu faapea i le Mataio 25, na aoao mai ai e le Faaola ni faataoto se tolu e aoao ai i tatou i le auala e mafai ona tatou saunia ai mo Lona Afio Mai Faalua.

Mafaufau e tufatufa atu le pepa e tufatufa atu “Faataoto e uiga i le Saunia mo le Afio Mai Faalua o le Faaola” ma faatulaga le vasega i ni vaega toalaiti. Tuuina atu se tasi o faataoto i vaega taitasi, ma valaaulia tagata aoga e galulue faatasi e faatumu le pepa e tufatufa atu. Afai e manaomia, e mafai ona outou suesue faatasi o se vasega se tasi o faataoto e faataitai ai le auala e mafai ai e tagata aoga ona faatumu laasaga o loo lisiina i luga o le pepa e tufatufa atu.

A uma ona lava se taimi e suesue ai tagata aoga, valaaulia vaega taitasi e tusi i luga o le laupapa le upumoni na latou faailoa mai. E mafai ona faailoa mai e tagata aoga ni upumoni e pei o nei:

• E mafai ona ou saunia mo le Afio Mai Faalua o le Faaola e ala i le taumafai pea e faateleina la’u molimau ma le liua ia Iesu Keriso (tagai Mataio 25:1–13).

• E mafai ona ou saunia mo le Afio Mai Faalua o le Faaola e ala i le faaaogaina ma le faamaoni o meaalofa ma tomai ua tuuina mai e le Atua ia te au (tagai Mataio 25:14–30).

• E mafai ona ou saunia mo le Afio Mai Faalua o le Faaola e ala i le alofa ma auauna atu i isi (tagai Mataio 25:31–46).

Valaaulia tagata aoga e talanoaina pe faapefea e le faaaogaina o le upumoni na latou faailoaina ona fesoasoani e saunia ai i tatou mo le Afio Mai Faalua o le Alii. A o latou faasoa mai, mafaufau pe i ai se fesili o i lalo e mafai ona faalolotoina ai lo latou malamalama:

• O anafea na e vaai ai o faatino lenei mataupu faavae?

• E mafai faapefea e le ola ai i lenei mataupu faavae ona faateleina lou manao mo le toe afio mai o le Faaola?

Tuu atu i tagata aoga se taimi e faamaumau ai se mea o le a latou faia e saunia ai i latou lava mo le toe afio mai o le Alii. Pe a lava le taimi, mafaufau e fai atu i ni nai tagata aoga e faasoa mai i le vasega mea na latou tusia.

Toe foi i le “Filifiliga o Gaoioiga e Aoao Ai.”

Mafaufau e tusi le faamatalaga lenei i luga o le laupapa: E le tele ni mea ou te ofoina atu.

• O le ā se mafuaaga e mafua ai ona tatou lagona ai faapea?

Valaaulia tagata aoga e mafaufau i se taimi atonu na latou lagonaina ai lenei lagona. E mafai ona latou faamaumauina o latou aafiaga. Uunaia tagata aoga e faamaumau soo se uunaiga mai le Agaga Paia a o latou suesueina le tala i tupe iti a le fafine ua oti lana tane.

E mafai ona e faaali atu le ata lenei. Faamalamalama atu faapea i le taimi o le Faaola, o se tasi o lotoa o le malumalu sa i ai ni laulau e mafai ai e tagata ona faia taulaga tautupe i le faleteuoloa o le malumalu. O se tupe iti o se tupe siliva laitiiti kopa ma o se tupe itiiti lava (tagai i le “Mareko 12:41–44. O le a le mea e faatusa i ai le tupe iti?i le Fesoasoaniga mo Tusitusiga Paia: Feagaiga Fou).

Valaaulia tagata aoga e faitau le Mareko 12:41–44 pe matamata i le “Ua Aoao Atu Iesu e uiga i Tupe Iti a le Fafine ua Oti lana Tane” (1:14). Tuu atu ia i latou e vaavaai pe na faapefea ona iloiloina e le Alii taulaga a le fafine ua oti lana tane.

1:15

• O le a se mea ua aoao mai e lenei tala ia te oe e faatatau i le auala e silasila ai le Alii ia tatou taulaga? (E mafai ona faailoa mai e tagata aoga se mataupu faavae e pei o lenei: E talia ma faatauaina e le Alii a tatou taulaga pe a tatou tuuina atu ma le naunautai mea ua tatou maua ia te Ia.)

• O a nisi o taulaga eseese e mafai ona tatou avatu i le Alii? (Fesoasoani i tagata aoga e faailoa mai faataitaiga o mea laiti ma faigofie.)

Mafaufau e faasoa atu le faamatalaga lenei a Elder Dieter F. Uchtdorf:

Faatasi ai ma lenei matauga faigofie [o le fafine ua oti lana tane ua foai atu tupe iti e lua], na aoao ai i tatou e le Faaola i le ala e fuaina ai taulaga i Lona malo—ma e fai lava si ese mai le ala e masani ona tatou fuaina ai mea. I le Alii, o le taua o le foai sa le fuaina i le aafiaga o le foai i le mea e teu ai tupe ae e ala i le aafiaga o le foai i le loto o le tagata foai. (“O Tatou Loto Uma,” Liahona, Me 2022, 122)

• E mafai faapefea e le manatuaina o le auala e fuaina ai e le Faaola au taulaga ona aafia ai au amioga?

• O anafea na e lagonaina ai le faamaoniga a le Alii mo se taulaga na e faia ia te Ia? Na faapefea ona e aafia ai?

Valaaulia tagata aoga e mafaufau i se taulaga e mafai ona latou tuuina atu i le Alii. Valaaulia i latou e faatino soo se uunaiga ua latou maua.

Toe foi i le “Filifiliga o Gaoioiga e Aoao Ai.”